Zechariah 11

Sidamo

← Chapter 10 Jump to: Chapter 12 →

1Libaanoosi! Giira daguwakki ittanno gede, waalchuwakki fani.

2Daguwu uwino daafira, ki'ne hoomme, «Woo!» yitinanni wi'le. Xirchaame haqqe duuchanti ba'ino; wo'me noo dubbi dolamino daafira, Baasaani qilxooti, «Woo!» yitinanni wi'le.

3Shaqqadu saada hosiisidhanno dargi co'o yee bainohura, allaalaasine, «Woo!» yite wi'litanno. Yordaanoosi Laga doyisse noo dubbi baino daafira, doobbiyu ittananna macciishshe.

4Kaaliiqi Magani'ya, «Hanni umokki ge'reewo gorrara haa're ha'ranno allaalaanchi gedeeha assi.

5Hidhino manni ge'reewo gorri'riro, qorichishannonsahu dino; hiri mannino, ‹Duroonsinonkehu Kaaliiqi galatamo› yaanno; uminsa allaalaasine nafa dimarartannonsa» yiinoe.

6Kaaliiqi, «Anino kunni ka'a baattote aana hee'rannoha ayeno dimarereemmo; ani umi'ya mitto mittonka olliichisiranna gashshaanchisira sayise eemmo; insa gobba gadadissanno; anino angansanni digatiseemmonsa» yaanno.

7Ge'reewo hirtannoriranna hidhitannorira kiranya ikke gorrinara worroonni ge'reewo allaaleemmoha ikkoommo; 2 siqqo fushshi're, mitte, «Elto» yee, layinkita, «Mittimma» yee su'mise, ge'reewo seekke allaaloommo.

8Woloota 3 allaalaasine, mittu agani giddo allaala agurtanno gede assoommo. Ge'reewuno giwinoe; anino dihagiidhoommonsa.

9Hakkunni gedensaanni ge'reewono, «Ani kunni ka'a allaalaancho'ne di"ikkeemmo; reyannohu reyo; ba"annohu bao; gattinorino mimmitonsa guddo.»

10Qoleno, «Elto» yinanni siqqo'ya haa're hiiqqummo; konne assa'yanni, Israeelete gosa ledo eoommo gondooro diigoommota leellisheemmo.

11Kunni garinni, gondooru hakko barranni diigami; konne asseemmo woyite, ge'reewo hirtanninna hidhitanni noori ane widira higge la'anni, Kaaliiqi ani assoommori widoonni qole coyi'rinota affu.

12Anino, «Baxxiniro daafuri'ya waaga uuyye"e; gibbiniro agurre» yuummonsa; insa kayinni daafuri'yara 30 kinchu birra uyitue.

13Kaaliiqino, hakkonne ikkinosi yite uyitinoe woxe, «Qullaawu Mini uduunne worranni saaxine giddo tugi» yiie. Anino, ikkinosi yite uyitino birra masse Qullaawu Mini uduunne maanxanni saaxinera worummo.

14Hakkunni gedensaanni, «Mittimma» yinannita layinki siqqo haa're hiiqqummo; hatto assa'yanni Yihudunna Israeelete mereero noo mittimma diigummo.

15Qoleno Kaaliiqi anera, «Xa atenee tidhinokki allaalaanchi gede assi;

16kuneeti gobbate ge'reewo'ya agarannoha mitto allaalaancho kayiseemmo; ikkollana kayinni, isi gawajjantinore ditowatanno; ba'inore dihasanno; hiiqqantinore disissanno; keere noore ditowatanno; towata agure misinoha gorre itanno; culunqansano cancananno.

17«Ge'reewo towatannokkihura tidhinokki allaalaanchira aanne'e! Bise cigilesinna qiniiticho illesi qasso! Cigilesi co'o yite laanshaabbo! Qiniiticho illesino co'o yite ballito!» yiie.

← Chapter 10 Jump to: Chapter 12 →