1 Corinthians 10

Sotho 1951 (BIBELE)

← Chapter 9 Jump to: Chapter 11 →

1Bana bešo, ga ke rate ge le dula le sa tsebe ge botatawešo ka moka ba kile ba okamelwa ke leru, ka moka ba tšwa ka gare ga lewatle.

2Ka moka ke bakolobetšwa ba Moshe ka leru leo le ka lewatle.

3Ka moka ba lle selewa se tee sa moya.

4Ka moka ba nwile senwewa se tee sa moya; ba nwile se se bego se etšwa leswikeng le bego le ba felegetša; mme leswika leo e be e le yena Kriste.

5Ba bantši ba bona ga ba ka ba kgahla Modimo, ba rapalatšwa lešokeng.

6Gomme dilo tšeo di diregile gore di re lemoše gore re lese go kganyoga tše mpe, re se etše bona ba go di kganyoga.

7Le se ke la etša ba bangwe ba bona la hlankela modimo wa seswantšho; boka ge go ngwadilwe gwa thwe: Setšhaba sa dulela go ja le go nwa, sa tsebo ema sa bapala.

8Le gona re se ke ra dira bootswa, ra etša ba bangwe ba bona ba nago ba dira bootswa, gwa fedišwa ba dikete tše masome a mabedi a metšo e meraro ka tšatši le tee.

9Le gona le se ke la leka Kriste boka ba bangwe ba nago ba mo leka, ba bolawa ke dinoga.

10Le gona le se ke la tsota boka ba bangwe ba bona ba nago ba tsota, ba bolawa ke Mofediši.

11Tšeo ka moka di diregetše bao gore e be go lemoša; di ngwadilwe gore e be go eletša rena ba re fihletšwego ke bofelo bja mabaka.

12Ke gona, e a rego ke eme, a bone gore a se ke a wa.

13Ga lešo la hlohlwa ke moleko o kago pala batho. Modimo ke Mmotegi; a ka se ke a lesa la lekwa ka tše di kago le palela; gotee le moleko o tlo fela a bea sebaka sa go tlo efoga, gore le kgone go kgotlelela.

14Ka baka leo, baratwa ba ka, tšhabang mediro ya medimo e šele.

15Ke bolela le ba tlhaologanyo, ke re: Latišang le bone ge se ke se bolelago e le therešo.

16Senwelo sa tšhegofatšo se re se šegofatšago, a ga se kopano ya madi a Kriste? Senkgwa se re se ngwathago, a ga se kopano ya mmele wa Kriste?

17Senkgwa e le se tee, rena ba re lego ba bantši re ba mmele o tee; gobane senkgwa re ja se tee ka moka ga rena.

18Bonang Baisiraele; ke ra bao e lego bona ka go tswalwa; ge ba eja dihlabelo, a ga se go kopana aletareng?

19Ke rang ge ke realo? A ke re modimo o šele ga se selo?

20Ga ke realo; se e lego taba ke didimo tše ba ntle ba di dirago ba di direla diriti tše mpe; ga ba di direle Modimo. Gomme nna ga ke rate ge le ka ba ba go kopana le diriti tše mpe.

21Le ka se kgone go nwa senwelo sa Morena, la tla la nwa le senwelo sa diriti, le ka se kgone go ba ba go abelwa mogopo wa Morena, la tla la abelwa le mogopo wa diriti.

22A re ka se rumole Modimo? A re ka mo phala ka maatla?

23Ke dumeletšwe dilo tšohle; fela, ga se gore ka moka di a hola. Ke dumeletšwe dilo tšohle; fela, ga se gore ka moka di a agiša.

24A motho a se ke a inyakela tša gagwe; a a nyake sa go hola ba bangwe.

25Tšohle tše di bapatšwago mapatlelong a go reka nama, le ka di ja le sa latiše mo di tšwago; le dire bjalo ka baka la letswalo.

26Ka gobane lefase ke la Morena, le tšohle tše di tletšego mo go lona.

27Ge le laleditšwe ke motho wa go se dumele, mme le rata go ya, le je tšohle tše a le abelago tšona, le sa botšiše mo di tšwago, ka baka la letswalo.

28Fela, ge motho a ka le botša a re: Ke nama ya sedimo! Le se ke la e ja; le lese ka baka la eo wa go le botša, le ka baka la letswalo.

29Letswalo ke ra la eo e mongwe, e sego la gago; gobane o tlo ba o direlang ge o fo itshodišwa bolokologi ke letswalo la e mongwe?

30Ge nna nka ja ke leboga, ke tlo ba ke direlang ge ke ithogiša ka tše ke di lebogago?

31Ke gona ge le eja, ge le enwa, tšohle tše le di dirago le di dire gore Modimo a retwe ka tšona.

32Le se ke la ba ba go kgopiša Bajuda le ge e le Bagerika le ge e le phuthego ya Modimo,

33bjalo ka ge nna ke kgahliša batho bohle dilong ka moka ke sa nyake se se holago nna, ke nyaka se se holago ba bantši, gore ba phologe.

← Chapter 9 Jump to: Chapter 11 →