1 Corinthians 3

Sotho 1951 (BIBELE)

← Chapter 2 Jump to: Chapter 4 →

1Le nna, bana bešo, ke be ke sa kgone go bolela le lena wa go bolela le batho ba Moya; ke boletše le lena wa go bolela le batho ba nama, wa go bolela le bana ka Kriste.

2Ke be ke le noša lebese; ga nka ka le fa dijo tše di tiilego, gobane le be le sešo la di kgona; ešita le bjale di sa le palela ka ge le le ba nama.

3Ge mo go lena go sa na le mona le dikgang, a ga se gore le sa ya ka tsela ya batho ba nama le ka mokgwa wa batho?

4Gobane ge e mongwe a re: Nna ke wa Paulo, e mongwe a re: Nna ke wa Apollo! A ga se gona ge le le ba nama?

5Bjale Apollo ke mang? Paulo ke mang? Ke bahlanka ba le dumetšego ka bona, ka mo Mong wa bona a filego e mongwe le e mongwe ka gona.

6Nna ke bjetše; Apollo o nošeditše; gomme Modimo ke yena a medišitšego.

7Mobjadi le monošetši ga se selo; Yo e lego selo ke Mmediši, ke Modimo.

8Mobjadi le monošetši ba a lekana; e mongwe le e mongwe o tlo fiwa moputšo wa gagwe, wo o lebanego modiro wa gagwe.

9Rena re badirišani ba Modimo; lena le tšhemo ya Modimo, le moago wa Modimo.

10Ka kgaugelo ye Modimo a ntshe -- ditšego ka yona, ke dirile bjalo ka moagi yo bohlale ka bea motheo; e mongwe a tla a aga; gomme mang le mang e a agago a bone ka mo a hlatlaganyago dikago.

11Gobane ga go e a kago bea motheo o šele ka ntle ga wo o beilwego, yena Jesu Kriste.

12Bjale ge motho a etla a aga godimo ga motheo woo, a aga ka gauta le ka silifera le ka mabjemahlokwa le ka dikwata le ka mabjang le ka dihlaka,

13Modiro wa e mongwe le e mongwe o tlo bonagala; go na le letšatši la go tlo o bonagatša, la go tlo utologa ka mollo woo o tlogo lekola modiro wa mang le mang wo o dirilwego, gwa tlo bonala ge e le modirodiro.

14Motho eo modiro wa gagwe o tlogo ema, o tlo fiwa moputso.

15Motho eo modiro wa gagwe o swago, o tlo tingwa moputso, yena mong a phologa bjalo ka eke o efolwa mollong.

16A ga le tsebe ge le le Ntlokgethwa ya Modimo, le gore Moya wa Modimo o agile mo go lena?

17Ge motho a senya Ntlokgethwa ya Modimo, le yena Modimo o tlo mo senya, gobane Ntlo ya Modimo ke e kgethwa, ke ra bolena.

18Go se ke gwa ba le e a iphorago. Ge mo go lena go na le wa go itshema a re, ke yo bohlale ka tša mabaka ano, a a be lešilo, a tsebo ba yo bohlale.

19Ge e le bohlale bja lefase leno, Modimo o bona e le bošilo; gobane go ngwadilwe gwa thwe: Ba mahlale o ba tanya ka a bona maano.

20Gwa buša gwa thwe: Morena o tseba kgopolo tša bahlale e le tša lefela.

21Ke gona, a go se be le wa go ikgantšha ka batho; ke ba lena bohle,

22e ka ba Paulo, goba Apollo, goba Kefase; le lefase, le bophelo, le lehu, tša bjale le tše di sa go tla, ka moka ke tša lena.

23Gomme lena le ba Kriste, mme Kriste ke wa Modimo.

← Chapter 2 Jump to: Chapter 4 →