1 Corinthians 9

Sotho 1951 (BIBELE)

← Chapter 8 Jump to: Chapter 10 →

1A ga ke molokologi? A ga ke Moapostola? A ga ka bona Jesu Kriste Mong wa rena? Modiro wa ka Moreneng a ga se bolena?

2Ge nka be ke se Moapostola wa ba bangwe, ge e le go lena ke yena hle; gobane bohlatse bja ge ke le Moapostola ke bolena Moreneng.

3Ke yona phetolo ya ka ge ba ntshekiša.

4A ga go a re lokela ge re eja, ge re enwa?

5A ga go a re lokela ge re ka sepela le mosadi e lego modumedi ka rena, e le mogatša wa rena, ra etša Baapostola ba bangwe, le bana ba boMorena, le Kefase?

6A ke nna fela le Baranaba ba re sa lokelwago ke go lesa modiro wa diatla?

7Mohlabani ke mang e a phelago ka tše a itirelago tšona? Ke mang e a šemago marara, a se je dienywa tša yona? Ke mang e a dišago mohlape, a se je maswi a wona?

8Ge re realo, a ke go fo bolela mokgwa wa batho? A ga se gore le Molao o realo?

9Gobane Molaong wa Moše go ngwadilwe gwa thwe: Pholo ge e fola, o se ke wa e tlemelela molomo. A Modimo ge a realo e be e le go babalela dipholo fela?

10A ga ke re o ra rena ka moka? Di ngwaletšwe rena, gore molemi a leme a holofetše, e a folago a holofele go tlo abelwa sa gagwe.

11Ge re le bjaletše tša moya, a ke tabakgolo ge re buna tša mmele mo go lena?

12Ge ba bangwe ba loketšwe ke go abelwa tša lena, a ga se rena ba ba loketšwego gagolo? Fela, rena re be re sa latiše ditokelo tše bjalo; sa rena e be e le go kgotlelela gore re se ke ra diba tsela ya Ebangedi.

13A ga le tsebe gore ba modiro wa tše kgethwa ba ja tša Ntlokgethwa? Le ba go lotola aletare ba abelwa tša aletare?

14Le yena Morena o laetše a re: Bagoeledi ba Ebangedi ba phele ka yona.

15Gomme nna, le se tee sa tšona tšeo ga nka ka ikhola ka sona. Le ditaba tše ga nka ka di ngwala, gore e be nna ke direlwago tšeo; gobane ga ke rate go senywa leina ke motho; kaone e ka ba ge nka hwa.

16Gobane ge ke ruta Ebangedi, ga ke direle go tumišwa; ke kwa ke gapeletšwa; mme nka ba yo madimabe ge nka lesa go bolela Ebangedi.

17Gobane ge e ka be e le modiro wa go ithatela ga ka, moputso nka be ke sa o hloke. Ge nka be ke dira ke sa o rate, gona e ka be e fo ba bolaki bja go nkgafelwa.

18Bjale moputso wa ka ke eng? Moputso wa ka ke ge ke bolela Ebangedi ya Kriste e sa rekwe, ke ge ke dira ke sa ikhole ka yona Ebangedi.

19Gobane le ge ke le molokologi ruri, ke itirile mohlanka wa bohle, gore ke rue ba bantši.

20Bajuda ba nkhweditše ke le wa gabobona, e le gore ke rue Bajuda, ba go bušwa ke Molao ba nkhwetša ke le wa gabobona, e le gore ke rue bona ba go bušwa ke Molao.

21Ba e sego ba Molao ba nkhwetša ke le wa gabobona, le ge Molao wola wa Modimo o sa mpuša, o mpuša ka Molao wa Kriste; ke realo gore ke rue bona ba e sego ba Molao.

22Bafokodi ba nkhweditše ke le wa gabobona, e le gore ke rue bafokodi. Bohle ba nkhweditše ke le wa bona, e le gore mo go fela ke be le ba ke ba ruago.

23Tše ka moka ke di dira ka baka la Ebangedi, gore le nna ke be wa gabo bao e lego ba yona.

24A ga le tsebe gore ba ba šianago dipapading ba kitima bohle; mphapahlogo wa tla wa tšewa ke o tee. Kitimang ka mokgwa woo, gore le tle le o tšee.

25Ka moka ba ba katanago dipapading, ba ikona tšohle; ge ba dira tšeo e le gore ba tšee mphapahlogo wo o onalago, rena re ba go tšea wo o sa onalego.

26Nna gomme ga ke kitime ke sa tsebe mo ke yago; ge ke itia, ga ke etše wa go itia leswiswi.

27Ke otlaka mmele wa ka gore ke o thapiše; gore e se be ke le motsenedi wa ba bangwe, nna mong ka nyatšega.

← Chapter 8 Jump to: Chapter 10 →