1 Corinthians 11

Sotho 1951 (BIBELE)

← Chapter 10 Jump to: Chapter 12 →

1Bang baetši ba ka bjalo ka ge nna ke le moetša Kriste.

2Bana bešo! Ke a le reta, gobane le nkgopola dilong ka moka; mme ditaelo le di lotola ka mo ke le laetšego ka gona.

3Bjale ke rata ge le tseba gore hlogo ya monnamang le mang ke Kriste; mme hlogo ya mosadi ke monna; hlogo ya Kriste ke Modimo.

4Monna mang le mang ge a rapela, goba a porofeta a apešitše hlogo, o nyatšiša hlogo ya gagwe.

5Gomme mosadi mang le mang ge a rapela, goba ge a porofeta a apotše hlogo o nyatšiša hlogo ya gagwe; go swana le ge a kotilwe hlogo.

6Gomme ge a apola hlogo, gona le go kotwa a ka no kotwa. Bjale, ka gobane go kotwa le ge e le go boolwa go a mo nyatšitša, a a apeše hlogo.

7Monna yena a a lese go apeša hlogo, gobane ke yena seswantšho sa Modimo, le bokwala bja Modimo. Mme bokwala bja monna ke mosadi.

8Gobane monna ge a bopša, ga a tšwa mosading; ke mosadi e a tšwilego monneng.

9Le gona monna ga a bopelwa mosadi; ke mosadi e a bopetšwego monna.

10Ka baka leo mosadi a a rwale seka sa go bušwa, ka baka la Barongwa.

11Fela, ka Moreneng mosadi o ba gona ka monna; gomme le monna o ba gona ka mosadi.

12Gobane boka mosadi ge a tšwile monneng, le monna o tšwelela ka mosadi. Mme tšohle di tšwa Modimong.

13Le lena beng le ka di bona ge go swanetše ge mosadi a ka rapela a apotše hlogo.

14Lebopo le batho ba lego ka lona a ga le re rute? A monna a ka se nyatšege ge a ka ba le moriri o motele?

15Mosadi yena ge a na le moriri o motelele, ke bokwala bja gagwe; gobane o filwe moriri o motelele gore e be seaparo.

16Fela, ge go ka ba le wa go rata dikgang, rena mokgwa woo ga re nawo; le diphuthego tša Modimo ga di nawo.

17Se ke le laelago sona sese; mme ga ke le rete ge ke re: Ga le phuthegele go thakga; le phuthegela go senya.

18Gobane sa pele se ke se kwago ke gore le kgobokana phuthegong le na le ditšhitano; gomme ke kgodilwe gore mo gongwe go ka ba bjalo.

19Ge mo go lena go na le dikgaogano, gona go swanetše go ba bjalo, gore babotegi mo go lena ba bonagale.

20Bjale ge lena le phuthegile le le mmogo, ga le tlele go ja dijo tša Morena,

21Gobane ge go lewa, mongwe le e mongwe o thoma go ja dijo tša gagwe; e mongwe a kwe tlala, e mongwe a tagwe.

22A ga le ne nywako mo le kago kgona go itšela le go inwela? A le nyatša phuthego ya Modimo, la nyatša mohloki? -- Ke sa le botšang? A nka le reta? Aowa; moo ga ke le rete.

23Se nna ke se filwego ke Morena, ke sona se nna ke le neetšego sona. Šedi: Morena Jesu, bošego bjo a ekilwego ka bjona o tšere senkgwa.

24A re go se ngwatha a re: Tšeang le je; ke mmele wa ka o newago ka baka la lena. Dirang bjalo e be go nkgopola.

25Ka mokgwa o bjalo a tšea le senwelo ka morago ga selaleo, a re: Senwelo se ke Kgwerano e mpsha mo mading a ka; dirang bjalo ka mehla ge le se nwa, e be go nkgopola.

26Ke gona ka mehla ge le eja senkgwa se, le enwa senwelo se, le tsebatše lehu la Morena go fihla ge a etla.

27Le gona, mang le mang e a jago senkgwa se, a nwa senwelo se a sa swanela, o oba molato mmeleng wa Morena le mading a gagwe.

28Bjale motho a a itekole ge, a tsebo ja senkgwa se a nwa senwelo se.

29Gobane ge a ka ja a nwa a sa swanela, e ba go itšela le go inwela go lahlwa, ka ge a sa hlaologanye mmele wa Morena.

30Ke ka baka leo ge mo go lena go atile bafokodi le balwetši le barobadi ba bantši.

31Gobane ge re ka be re itshola, re ka be re sa solwe.

32Gomme ge re solwa, ke go laiwa ke Morena, gore re se tlo lahlega le lefase.

33Bjale Bana bešo, ge le phuthegela go ja, le letelane.

34Ge e mongwe a swerwe ke tlala, a a je lapeng; le lese go phuthegela kahlolo. -- Ge e le tše dingwe ke tlo le laela mohla ke tlile.

← Chapter 10 Jump to: Chapter 12 →