bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sotho
/
Sotho 1951 (BIBELE)
/
1 Corinthians 15
1 Corinthians 15
Sotho 1951 (BIBELE)
← Chapter 14
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 16 →
1
Banabešo! Ke le gopotša Ebangedi ye ke le anegetšego yona, la e amogela mme la ema ka yona.
2
Ke ye le phološwago ka yona ge le e gomarela e le lentšu leo ke le anegetšego lona, ge e se ge le dumeletše lefela.
3
Gobane tabakgolo ye ke le neilego yona, ye le nna ke e neilwego, ke ye: Kriste o hwile ka baka la dibe tša rena ka mo mangwalo a bolelago.
4
O fihlilwe, a tsoga ka letšatši la boraro ka mo mangwalo a bolelago.
5
Gomme o bonwe ke Kefase, a tla a bonwa ke ba lesome le metšo e mebedi.
6
A buša a bonwa ke bana bešo ba ba fetago makgolo a mahlano ka lebaka le tee. Ba bantši ba bona bao le lehono ba sa le gona; ba bangwe ba bona ba ithobaletše.
7
A buša a bonwa ke Jakobo; a buša a bonwa ke baapostola ka moka.
8
Mafelelong, ge bohle bao ba šetše ba mmone, ke ge a bonwa ke nna ke etšago lefolotšana.
9
Gobane nna ke e monyenyane go baapostola; ga ka swanelwa go bitšwa Moapostola, gobane ke tlaišitše phuthego ya Modimo.
10
Ke ka kgaugelo ya Modimo ge ke le se ke lego sona; mme kgaugelo ya gagwe ga ya ntlela lefela; eupša ke dirile go fetiša bona ka moka; gomme e be e se nna; go dirile kgaugelo ya Modimo e na le nna.
11
Bjale, le ge e ka ba nna, le ge e ka ba bona, se re lego sona re bagoeledi, mme lena la dumela.
12
Bjale ge go tsebatšwa Kriste, gore o tsogile bahung, ba bangwe ba lena ba bolela bjang ge ba re: Tsogo ya bahu ga eyo?
13
Ge tsogo ya bahu e se gona, gona le Kriste ga a tsoga.
14
Gomme ge Kriste a sa tsoga, gona se re se tsebatšago ke lefela, mme le tumelo ya lena ke ya lefela.
15
Le rena re ka hwetšwa re le ba go hlatsela ra re o tsošitše Kriste bahung mola a sa ka a mo tsoša. Go ka ba bjalo ge bahu ba sa tsoge.
16
Gobane ge bahu ba sa tsoge, gona le Kriste ga a ka a tsoga.
17
Gomme ge yena Kriste a sa tsoga, gona tumelo ya lena ke ya lefela, gona le sa le dibeng tša lena.
18
Gona le ba ba ithobaletšego e le ba Kriste ba timetše.
19
Ge re le ba go holofela Kriste bophelong bjona fela, gona ba go ka kwelwa bohloko mo go batho bohle e ka be e le borena.
20
Bjale gomme, Kriste o tsogile bahung a ba yena thakangwaga ya ba ba ithobaletšego.
21
Bjale ka ge lehu le tlile ka motho, le tsogo ya bahu e tlile ka motho.
22
Bjale ka ge bohle ba ehwa ka Adama, ba tlo phedišwa bohle ka Kriste.
23
E mongwe le e mongwe o tlo ba le sebaka sa gagwe. Thakangwaga ke yena Kriste; o tlo hlatlangwa ke bao e lego ba gagwe mohla a tlago,
24
gwa tlo kgono tla bofelo mohla a tlogo bušetša Modimo Tatagwe mmušo, mohla a tlogo ba a fedišitše bobuši bjohle, le bogoši bjohle, le tše maatla ka moka.
25
Gobane go mo swanetše ge a eba kgoši; manaba a gagwe ka moka a be ka tlase ga nao tša gagwe.
26
Lenaba le le tlogo fedišwa ya ba wa bofelo, ke lehu.
27
Gobane tšohle di beilwe ka tlase ga nao tša gagwe. Ge go thwe “tšohle” di bušwa ke yena, ga se go re go balwa le e a mmeilego mmuši.
28
Mohla tšohle di tlogo ba di beilwe ka tlase ga nao tša gagwe, ke mo le yena Morwa a tlogo bewa ka tlase ga e a mmeilego mmuši wa tšohle, gore Modimo e be yena Mobatšohlegobohle.
29
Le gona, ba ba kolobeletšwago bahu ba di direlang ge bahu ba ka be ba sa tsoge? Ba reng ge ba kolobeletšwa bahu?
30
Le rena re direlang ge re itebanya le dikotsi ka nako tšohle?
31
Nna ke wa go hwa ka mehla! Bana bešo! Ke realo ke kgantšha Kriste mong a rena.
32
Ge kua Efeso ke lwile le dibata, go nkholang? Ge bahu ba sa tsoge, gona a nke re re: A re jeng! A re nweng gobane ka moswana re yo hwa!
33
Le se ke la forwa; mehlamo e mebe e senya bokwala.
34
Phafogelang sa ruri, le lese go senya; gobane go na le ba go se tsebe Modimo. Ke realo gore ke le leše dihlong.
35
Ge go le e a rego: Bahu ba ka tsoga bjang? A re: Ba tlo boa ka mmele o bjang?
36
Lešilo towe! Se o se bjalago ga se phedišwe ge se sa hwe.
37
Gomme ge o bjala, ga o bjale sebopo seo se tlogo tšwelela, o bjala thoro fela, e ka ba ya mabele le ge e le ya tše dingwe.
38
E a e fago sebopego ka mo a ratago ke Modimo; ke yena a fago peu e nngwe le e nngwe lebopo le e tlogo ba ka lona.
39
Dinama ga di swane. Nama ya batho e šele; nama ya dikgomo e šele; le ya dihlapi e šele; le ya dinonyana e šele.
40
Le mebele ya legodimo e gona. Le mebele ya lefase e gona. Letago la ya legodimo le šele; le la ya lefase le šele.
41
Letago la letšatši le šele; le letago la dinaledi le šele; mme tšona dinaledi di phalana ka letago.
42
Le go tsoga ga bahu go bjalo. Go bjalwa mmele o bolago; go tlo tsoga wo o sa bolego.
43
O bjalwa o nyatšega; o tlo tsoga o tagile. O bjalwa o fokola; o tlo tsoga e le wa maatla.
44
O bjalwa e le mmele wa nama; o tlo tsoga e le mmele wa moya. Bjalo ka ge go na le mmele wa nama, le mmele wa moya o gona.
45
Bjalo ka ge go ngwadilwe gwa thwe: Motho wa pele, Adama, a napa a ba moya o phelago, le Adama wa mafelelo yena ke moya wo o phedišago.
46
Mmele wa moya ga se wona o thomilego go ba gona; wa pele ke wa nama, wa latelwa ke wa moya.
47
Motho wa pele o tšwa mmung; motho wa bobedi o tšwa legodimong, ke wa gona kua.
48
Ba lefase ba swana le yena yola wa go tšwa mmung; ba legodimo ba swana le yena yo wa go tšwa legodimong.
49
Bjalo ka ge re apere seswantšho sa wa mmu, le seswantšho sa wa legodimo re tlo se apara.
50
Se nna ke se bolelago, lena bana bešo, ke re: Nama le madi ga se tšona di tlogo ja lefa mmušong wa Modimo. Le tša go bola di ka se je lefa la tše di sa bolego.
51
Šedio; ke le botša sephiri. Re ka se ke ra ithobalela bohle; ge e le lebopo le šele re tlo fiwa bohle.
52
E tlo ba ka bjakobjako bja panyagatee, ka moletšo wa phalafala ya bofelo; gobane e tlo lla, bahu ba tlo tsoga ba se sa tlo bola; mme rena re tlo fiwa lebopo le šele.
53
Gobane se se bolago se tlo apešwa go se bole; se se hwago se tlo apešwa go se hwe.
54
Mohla tše di bolago tše ge di apešwa go se bole, ge di hwago tše di apere go se hwe, ke mo go tlogo tšwelela se se boletšwego ke lengwalo le le rego:
55
Lehu le meditšwe ya ba phenyo. Hee Lehu! Lebola la gago le kae! Hee Bodulabahu! Go fenya ga gago go kae!
56
Ge e le lebola la lehu ke sebe; mme maatla a sebe ke Molao.
57
Gomme a go lebogwe Modimo e a re fago go fenya ka Mong wa rena Jesu Kriste.
58
Ke gona, lena banabešo baratwa! Tiang maatla, le se ke la tekema, le tielele modirong wa Morena mo go fela, le tseba gore go itapiša ga lena ga se ga lefela Moreneng.
← Chapter 14
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 16 →
All chapters:
1
2
3
4
5
6
7
8
9
10
11
12
13
14
15
16