1 Corinthians 13

Sotho 1951 (BIBELE)

← Chapter 12 Jump to: Chapter 14 →

1Le ge nka bolela ka maleme a batho le a barongwa, ka upša ka hloka lerato, gona nka ba tshipi e llago, nka ba moropa wo o dumago.

2Le ge nka ba le boporofeta, ka tseba diphiri ka moka, ka ba le tlhaologanyo yohle, ka ba le tumelo wa go šuthiša dithaba, ka upša ka hloka lerato, gona ga ke selo.

3Le ge nka hlallela ba hlokago ka tše e lego tša ka tšohle, ge nka gafa mmele wa ka wa tšhungwa ka mollo, ka upša ka hloka lerato, go ka se nkhole selo.

4Lerato ga le fele pelo. Lerato ke le botho. Lerato ga le tsebe mona; ga le na go ikgantšha, ga le ikgogomoše.

5Ga le dire tša dihlong; ga le tsome go ikhola; ga le hlohloletšege; ga le loge maanomabe;

6ga le thabele bobe; le thaba le therešo.

7Le bipa tšohle; le dumela tšohle; le holofela tšohle; le kgotlelela tšohle.

8Lerato ga le fele neng le neng. Ge e le diporofeto, tšona di tlo fela; le ona maleme a tlo goma; le tsebo e tlo fela.

9Gobane tše re di tsebago ke diripanyana fela; le ge re porofeta, ke diripanyana fela.

10Mohla go tlago tše botlalo, go tlo fela tša boripanyana.

11Mola ke sa le ngwana, ke be ke bolela boka ngwana, ke be ke hlaologanya boka ngwana, ke eleletša boka ngwana. Bjale ke le monna, tša bjana ke di fedišitše.

12Ge e le bjale re bona ka seiponi, re sa kwa ka nyepo; mohla woo re tlo bona re lebane natšo. Se ke se tsebago bjale ke boripanyana fela. Mohla woo ke tlo tseba moka boka le nna ge ke tsebilwe moka.

13Ke moka, di šalago di le gona ke tumelo, le kholofelo le lerato, tše tharo tše. Gomme se segolo mo go tšona ke lerato.

← Chapter 12 Jump to: Chapter 14 →