1 Corinthians 5

Sotho 1951 (BIBELE)

← Chapter 4 Jump to: Chapter 6 →

1Hleng go kwala gore mo go lena go na le bootswa; bootswa bjo le go bantle bo sego gona, bja ge motho a na le mosadi wa tatagwe.

2Gomme lena le sa fela le ikgogomoša. Kaone ke ge le ka hlokofala, mme motho eo a dirago tše bjalo la mo tloša makgatheng a lena.

3Ge e le nna, le ge ka mmele ke le kgole, ke na le lena moyeng, nna motho eo wa go dira tše bjalo, ke mo tšwile bjalo ka eke ke gona moo.

4Ke re: Ka leina la Mong wa rena Jesu Kriste, moya wa ka o na le lena le phuthegile, le maatla a Mong wa rena Jesu Kriste a na le rena,

5Motho eo a a gafelwe Sathane, a senyege nama, gore moya o phologe ka letšatši la Mong wa rena Jesu.

6Go itumiša ga lena ga go botse. A ga le tsebe gore komelwana e nyane e bediša bogobe ka moka?

7Swielang komelo ya kgale, gore le tle le be bogobe bjo bofsa; etšwe le le ba ba sa omelwago; gobane re hlabetšwe Kwana ya Paseka ya rena, yena Kriste.

8Ka gona gee, a re bineng monyanya woo re se na komelo ya kgale le ya bobe le bokgopo, re na le bogobe bjo bo sa omelwago bja tshekego le therešo.

9Ka lengwalo le lengwe ke le ngwaletše ka re le se ke la hlakana le diotswa.

10Ga se go re ke ra diotswa tša ba lefase le, le ba megabaru, le bahlakodi, le ba medimo e šele; ge nka be ke era bona, gona e ka ba go re le tloge lefaseng.

11Se ke le ngwaletšego sona ke go re le se ke la hlakana le motho yo le rego ke ngwana weno, moka a ba seotswa, a ba wa megbaru, a ba wa medimo e šele, a ba wa maroga, a ba letagwa, a ba mohlakodi. Motho wa mohuta woo, le go ja le se ke la ja le yena.

12Bantle ke tlo ba ke ba ahlolelang? Hleng lena le lesa go ahlola ba ba lego makgatheng a lena.

13Bantle ba tlo ahlolwa ke Modimo, lena tlošang mothomobe mo gare ga lena.

← Chapter 4 Jump to: Chapter 6 →