bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sotho
/
Sotho 1951 (BIBELE)
/
Acts 13
Acts 13
Sotho 1951 (BIBELE)
← Chapter 12
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 14 →
1
Phuthegong ya Antiokia go be go na le baporofeta le baruti, boBaranaba, le Simone e a bego a bitšwa ka la Nigere, le Lutsio wa Kirene, le Manahene e a godilego e le mogwera wa kgoši Herode, le Saulo.
2
Ya re ba bokanetše merapelo ba ikonne dijo, Moyamokgethwa wa re: Ntlhaoleleng Baranaba le Saulo, ba ye modirong wo ke ba bileditšego wona.
3
Ke moka ba ikona, ba rapela, ba ba bea diatla, ba ba fa tsela.
4
Bona bjalo ba romilwe ke Moyamokgethwa ba fologela motseng wa Seloikia, ba tloga moo ba selela sehlakehlakeng sa Tsipero.
5
Ge ba tsene motseng wa Salami, ba ruta lentšu la Modimo diphuthegong tša Bajuda. Ke ge Johane a na le bona, e le mohlanka wa bona.
6
Ba putla sehlakehlake seo, ba fihla motseng wa Phafo; moo ba hwetša motho wa sedupe wa moporofeta wa maaka wa Mojuda leina la gagwe ke Barajesu.
7
O be a dutše le mokgoma wa gona, Seregio Paulo monna wa tlhaologanyo. Yena e a bitša Baranaba le Saulo, ba tla; a re le yena a kwe lentšu la Modimo.
8
Ke mo ba tsogetšwego ke motho eo wa sedupe, yo leina la gagwe le lengwe e lego Elima; a leka go thibela mokgoma gore a se dumele.
9
Saulo, e lego yena Paulo, a mo hlaba ka mahlo a tletše Moya o mokgethwa,
10
A re: Wena Morwa wa Diabolo towe! O hoše bomenetšamoka le bohlola bjohle! O lenaba la bolo ka moka; o hlwa o raranya ditsela tše di lokilego tša Morena.
11
Bjale tseba! Letsogo la Morena le go wela godimo, wa tlo ba sefofu, wa tlo fetša lebaka o sa bone letšatši. Paulo a sa realo, motho eo a welwa ke bofofu le lewiswi, a dikologa a nyaka ba ba kago mo hlahla ka seatla.
12
Mokgoma ge a bona dilo di eya ka tsela yeo, a dumela, a tlabilwe ke thuto ya Morena.
13
Ba ba bego ba na le Paulo ba tloga moo motseng wa Phafo, ba namela leselawatle, ba tla motseng wa Perege wa nageng ya Pamfilia. Gona moo Johane a kgaogana le bona a boela Jerusalema.
14
Bona ba tloga Perege, ba tla Antiokia wa nageng ya Pisidia. Ka tšatši la Sabatha ba ya phuthegong ya Bajuda, ba dula.
15
Ge go badilwe Molao le Baporofeta, ba bagolo ba phuthego ba roma motho, a tla a ba botšiša a re: Banna ba gešo! Ge le na le lentšu la go kgothatša batho, gona bolelang.
16
Paulo a ema, a emiša seatla, a re: Banna ba Isiraele, le lena le boifago Modimo, kwang.
17
Modimo wa setšhaba se o kgethile botatawešo, a tla a godiša setšhaba mola se falaletše nageng ya Egipita; a ba a se ntšha moo a emišitše letsogo.
18
A fetša nywaga e masome a mane a ba rwele a ba fepa lešokeng.
19
A fediša ditšhaba tše di šupilego nageng ya Kanana, a ba abela naga yeo ya ba ya bona.
20
Mabakeng a a tlilego a ba nea Baahlodi; gwa feta nywaga e makgolo a mane a nago le masome a mahlano, gwa tsebo tsoga Samuele moporofeta.
21
Ya ba gona ba kgopetšego kgoši. Modimo a ba nea Saulo morwa wa Kisi, monna wa moloko wa Benyamini; gwa feta nywaga e masome a mane.
22
A re go mo tloša, a tsoša Dafida, a ba kgoši ya bona; a mmolela a re: Ke hweditše Dafida morwa wa Isai monna wa go kgahla pelo ya ka; ke yena a tlogo dira tše ke di ratago ka moka.
23
Mo molokong woo ke mo Modimo a dirilego se a se boletšego pele, a tšweletša Jesu Mophološi wa Isiraele.
24
Ke yena yo Johane a mo etilegopele, a goelela kolobetšo ya go sokologa setšhabeng ka moka sa Isiraele.
25
Johane ge a phetha tsela ya gagwe, a bolela a re: Yo le ntshemago la re ke nna yena, ga se nna. Fela, tsebang! O etla, yena eo ke sa swanelago go hunolla dieta naong tša gagwe.
26
Banna ba gešo! Lena bana ba moloko wa Aborahama, le ba le nago nabo e le ba ba boifago Modimo! Lentšu la phološo ye le rometšwe bolena.
27
Gobane ba ba agilego Jerusalema, le bagolo ba bona, ka go se mo tsebe ba phethile mantšu a baporofeta a a felago a balwa ka disabatha; ba a phethile ka go mo tšwa.
28
Ba kgopetše Pilato ba re a bolawe, le ge ba sa ka ba hwetša molato go yena wo o swanetšego polao.
29
Ba phetha tšohle tše di ngwadilwego di era yena; ya ba gona ba mo fegolotšego kwateng, ba mmea lebitleng.
30
Gomme Modimo a mo tsoša bahung.
31
Ba ba bego ba na nae ba etšwa Galilea ba tla nae Jerusalema, ba mmone ka matšatši a mantši. Ke bona ba e lego dihlatse tša gagwe pele ga batho.
32
Gomme rena re le begela Ebangedi ya kholofedišo ye botatawešo ba bego ba e filwe,
33
Modimo a tla a e phetha mo go rena bana ba bona ka go tsoša Jesu bahung, bjalo ka ge go ngwadilwe Pesalomeng ya bobedi gwa thwe: O Morwa wa ka, lehono ke go tswetše.
34
Go mo tsoša bahung, a se bone go bola, ke tše a bego a era tšona ge a re: Ke tlo le fa tše kgethwa tše di botegago tša Dafida.
35
Mo gongwe a tla a re: O ka se ke wa lesa Mokgethwa wa gago a bona go bola.
36
Ge e le Dafida, ge a diretše thato ya Modimo mehleng ya gagwe, o ithobaletše, a bolokwa le botatagwe, o bone go bola.
37
E a sa kago a bona go bola ke yo Modimo a mo tsošitšego.
38
Bjale tsebang gee, lena banna ba gešo: Le begelwa tebalelo ya dibe e lego gona ka yena, le go lebalelwa gohle mo le šitilwego go hunologa ka molao wa Moshe.
39
Ka yena e go hunologa mang le mang e a dumelago.
40
Phakgamang ge, gore le se ke la welwa ke se se boletšwego ke baporofeta; šedi:
41
Lebelešang lena banyatši; le tlo kgotsa wa go tšhoga; gobane mehleng yeno ke dira modiro wo le ka se kego la dumela ge le ka fo botšwa.
42
Ya re ge Bajuda ba etšwa phuthegong, bantle ba tla ba ba kgopela ba re ba botšwe ditaba tšeo ka letšatši le lengwe le le hlatlamago Sabatha.
43
Phuthego ge e phatlalala, ba bantši ba Bajuda le basokologi ba borapedi ba latela Paulo le Baranaba. Bona ba ba kgothatša ba re ba gomarele kgaugelo ya Modimo.
44
Ka Sabatha ya ka moso gwa nyako bokana motse ka moka, ba tlile go kwa lentšu la Modimo.
45
Bajuda ge ba bona mašaba a batho, ba ba tlalelwa mona, ba ganetša, tše di bolelwago ke Paulo, ba ganetša ba rogaka.
46
Paulo le Baranaba ba bolela ba sa šie, ba re: Go be go swanetše ge lentšu la Modimo le botšwa lena pele. Bjale gomme ge le phema, la itira ba go se lokele bophelo bjo bo sa felego, gona tsebang: Re ya go bantle.
47
Ke tšona tše Morena a re laetšego tšona ge a re: Ke go bea seetša sa ditšhaba, gore o be phološo pheletšong tša lefase.
48
Bantle ba di kwa ba thaba; ba tumiša lentšu la Morena; gwa dumela bohle ba ba hlaoletšwego bophelo bjo bo sa felego.
49
Gomme lentšu la Morena la enela naga yeo ka moka.
50
Bajuda bona ba hlohleletša basadi ba bagolo, ba e bego e le ba borapedi, le beng ba motse; ba tsošetša Paulo le Baranaba go hlomarwa, mme ba ba raka ba ba ntšha mellwaneng ya bona.
51
Paulo le Baranaba ba ba hlohlorela lerole le naong tša bona, ba ya motseng wa Ikonio.
52
Barutiwa bona ba tlala lethabo le Moyamokgethwa.
← Chapter 12
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 14 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28