Acts 3

Sotho 1951 (BIBELE)

← Chapter 2 Jump to: Chapter 4 →

1Petro le Johane ba kile ba rotogela Ntlongkgethwa, e le nako ya senyane, ya thapelo.

2Gomme go be go na le monna e a belegwego e le segole, yo ba bego ba mo rwala ba mmea mojako wa Ntlokgethwa, wo ba rego ke mojako o botse, gore a lope dineo tša kgaugelo go ba ba tsenago Ntlongkgethwa.

3Yena eo a re go bona Petro le Johane ge ba tsena Ntlongkgethwa, a ba kgopela neo.

4Petro a mo iša mahlo, a bolela a re: Re gadime!

5Motho eo a ba lebelela a holofetše gore ba tlo mo nea selo.

6Petro a re: Silifera le gauta ga ke na natšo. Se ke nago le sona ke a go nea: Ka leina la Jesu Kriste wa Natsaretha tsoga o sepele!

7A mo swara ka seatla se setona, a mo emiša; mme maoto a gagwe le dikokoilane tša gagwe tša napa tša tia,

8a nanoga a ema, a sepela, a tsena Ntlongkgethwa le bona, a tšama a sela, a reta Modimo.

9Batho ka moka ba mmona a sepela a reta Modimo.

10Le gona ba be ba mo tseba ge e le yena a bego a duletše dineo mojakong o botse, wa Ntlokgethwa; ba golelwa ke go tšhoga le go tlabega ka tše di diregetšego motho eo.

11Bjale, ka gobane segole seo se fodišitšwego se gomarela Petro le Johane, batho ka moka ba tla go bona, ba kgobokana mo mathuding a ba rego ke mathudi a Salomo, ba tla ba tlabegile ruri.

12Petro ge a di bona, a bolela le batho bao a re: Lena banna ba Isiraele, le kgotsetšang taba ye? Le reng le lebelela rena, eke go dirile rena ka maatla a rena, goba ka borapedi bja rena ge motho e a sepela?

13Modimo wa Aborahama le Isaka le Jakobo, yena Modimo wa botatawešo, o neile Jesu mohlanka wa gagwe letago, yena eo le mo gafetšego Pilato, la mo lahla pele ga gagwe, mola Pilato a ahlola a re a a lokollwe.

14Le lahlile yena Mothomokgethwa Moloki, la kgopela go setšwa ka senokwane sela,

15la bolaya yena mong wa bophelo. Yena eo Modimo o mo tsošitše bahung; mme rena re dihlatse tša taba yeo.

16Gomme motho yo le mmonago le mo tseba, ke leina la Jesu le mo tiišitšego ka tumelo. Ke tumelo ka lona leina la gagwe e mo neilego go fola sa ruri, ka mo le di bonego bohle.

17Gomme bjale, bana bešo! Ke tseba gore tše le di dirilego, le di dirišitšwe ke go se tsebe, le bagolo ba lena le bona.

18Modimo yena a phetha ka mokgwa woo tše a bego a di boletše pele ka melomo ya baporofeta ba gagwe bohle, a re: Kriste o tlo tlaišega.

19Ke gona itsholeng gee, le sokologe, gore le phumolwe dibe tša lena.

20Gore go tle mabaka a tapologo e tšwago go Morena, ge a tlo roma Jesu Kriste, yo a mmeetšego bolena.

21Gomme yena, legodimo le swanetše go ba le mo gorošitše, go be go tle mabaka a go tsoša tšohle, a Modimo a a boletšego ka melomo ya baporofeta ba bakgethwa ba gagwe bohle.

22Gobane Moše o boletše le botatawešo, a re: Morena Modimo wa lena o tlo le tsošetša Moporofeta e a swanago le nna e a tšwago mo gare ga lena le go bana beno; yena eo le mo theetšeng ditabeng ka moka tše a tlogo le botša tšona.

23Gomme motho e a sa kwego Moporofeta eo, o tlo kgaolwa setšhabeng.

24Baporofeta bohle, go tla ka Samuele, le ba ba mo hlatlamilego ba bolela, ba šupile tša ona matšatši a.

25Mme lena le bana ba baporofeta bao, le ba kgwerano ye Modimo a e tlemilego le botatawešo ge a bolela le Aborahama, a re: Meloko ka moka ya lefase e tlo šegofatšwa ka peu ya gago.

26Bjale ge Modimo a tsošitše ngwana wa gagwe, o diretše bolena; o thomile ka bolena, a mo roma gore a le šegofatše, gore a sokolle bohle, mang le mang a fularele bokgopo bja gagwe.

← Chapter 2 Jump to: Chapter 4 →