Acts 17

Sotho 1951 (BIBELE)

← Chapter 16 Jump to: Chapter 18 →

1Ba sepela ba feta motse wa Amfipoli le wa Apolonia, ba tla motseng wa Thesalonika, mo go bego go na le phuthego ya Bajuda.

2Paulo ka mo a lemetšego ka gona, a tsena go bona, a botšana le bona tša mangwalo ka disabatha tše tharo.

3A ba hlathollela ona mangwalo, a ba bontšha gore Kriste o be a swanetše go tlaišwa le go tsoga bahung; a re: Kriste ke yena, Jesu yo nna ke mmolelago go lena.

4Ba bangwe ba bona ba kgodišwa ba dula ba kwana le Paulo le Silase, ba na le lešaba le legolo la Bagerika ba ba boifago Modimo, le basadi ba bantši ba bahumagadi.

5Bajuda ba ba sa dumelego ba hufega, ba thwala banna ba babe ba mapatlelong, ba rapa lešaba, ba ferekanya motse. Ba tla ba dikanetša ngwako wa Jasone, ba rata go swara Paulo le Silase gore ba ba ntšhetše lešabeng.

6Ba hwetša ba se gona; ba napa ba goga Jasone le badumedi ba bangwe, ba ba iša go ba bagolo ba motse, ba goa ba re: Batho ba, ba go ferekanya mafase ka moka, le mono ba tlile.

7Ba gorošitšwe ke Jasone. Ka moka ga bona ba nyatša molao wa Kesara ka go re: Kgoši ke e mongwe, ke Jesu.

8Ba realo ba hlohleletša setšhaba le beng ba motse ba ba bego ba ba kwa.

9Jasone le ba bangwe bala ba lefišwa, ba kgono leswa ba ikela.

10Bošego bjoo badumedi ba hlaganela go iša Paulo le Silase motseng wa Berea. Bona ge ba fihla moo, ba ya phuthegong ya Bajuda.

11Baberea e be e le batho ba mohuta o lego kaone, ba sa etše ba Thesalonika. Ba amogetše lentšu ka go rata; ba hlwa ba bala mangwalo ka mehla ba nyaka mo a kwanago le tšeo ba bego ba di kwa.

12Ba bantši ba bona ba dumela, basadi ba bahumagadi ba Bagerika, le banna ba bantši.

13Bjale Bajuda bala ba Thesalonika ba kwa gore lentšu la Modimo le bolelwa ke Paulo motseng, wa Berea; ba tla fao, ba ferekanya setšhaba ba se hlohleletša.

14Ke mo bana babo ba tumelo ba hlaganetšego ba laelana le Paulo, ba mo felegetša go fihla lewatleng. Silase le Timotheo ba šala.

15Bafelegetši ba Paulo ba mo fihliša motseng wa Athene; ba goma moo ba laeditšwe go re: Silase le Timotheo ba se diege go tla moo go Paulo.

16Paulo a sa ba letetše moo motseng wa Athene, a ja pelo ge a bona motse o tletše medimo ya diswantšho.

17Phuthegong a bolela le Bajuda le ba bangwe ba ba boifago Modimo. Lepatlelong a bolela ka mehla le bao a tianago le bona.

18A ba a fetolana le baruti ba mahlale ba Baepikure le ba Bastoiki. Gomme ba bangwe ba re: Mmolabodi eo o rata go bolelang? Ba bangwe ba re: E ke motsebiši wa medimo e šele. Ba realo ka ge Paulo a ba boditše Ebangedi ya Jesu le ya tsogo ya bahu.

19Ba tloga nae ba mo iša kgorong ya mošate, ba re: A nke re kwe thuto e mpsha yeo o e bolelago;

20gobane o tliša ditaba tše mpsha ditsebeng tša rena. Bjale re rata go tseba se e lego taba.

21Ba realo ka gobane ba Athene bohle, le baeng ba go dula moo, ba be ba se na se sengwe se ba se kganyogago, ge e se go bolela le go kwa madireng a mafsa.

22Paulo a ema kgorong ya mošate, a bolela a re: Banna ba Athene! Ka gohle ke bona ge le le batho ba go boifa medimo gagolo.

23Ke sepetše le motse wo, ka bona mo le išago didimo tša lena; ka hwetša aletare ye e tlokilwego lengwalo la go re: Ke ya MODIMO WA GO SE TSEBJE. Bjale nna ke le tsebiša yena Modimo eo, yo le mo rapelago le sa mo tsebe.

24Yena Modimo e a dirilego legohle, le tšohle tše di lego mo go lona, yena Mong wa legodimo le lefase, ga a dule nywakong ye e agilwego ka diatla;

25ga a direlwe ka atla tša batho, ga a phele ka motho; hleng bophelo, le moya, le tšohle ke yena a di fago bohle.

26Le gona ke yena a dirilego gore meloko ka moka ya batho e tšwe mading a o tee, e enele lefase lohle; a e beela mabaka, le mellwane, le maago;

27a re ba nyake Modimo, ba mo kwe ge a le gona, ba mo hwetše, gobane ga a kgole, o kgauswi le e mongwe le e mongwe wa ba re lego fa.

28Gobane ge re phela, re sepela, re le gona, ke ka yena, boka le ba bangwe ba direti tša geno ba itše; Re ba leloko lagwe.

29Bjale ge re le moloko wa Modimo, ga go a re swanela go re: Modimo a ka swana le sedirwa sa gauta goba silifera, sa go bopša ke makgone ka bohlale bja motho.

30Bjale Modimo o hlokomologile mabaka a go se tsebe; gomme mehleng yeno o laela batho bohle thoko tšohle, o re ba boe.

31Ka gobane o beile tšatši a tlogo ahlola lefase ka lona ka toko. Moahlodi ke Monna yo a mmeilego, a bulela batho bohle tsela ya tumelo ge a mo tsoša bahung.

32Ge ba ekwa a bolela tsogo ya bahu, ba bangwe ba kwera. Ba bangwe ba re: Re tlo buša re go kwa ka mohla o mongwe tabeng yeo.

33Ya re di feletše ka mokgwa woo, Paulo a ba tlogela a ikela.

34Ba bangwe ba banna bao ba kwana nae ba dumela. E mongwe wa bona e be a le Dioniso wa lekgotla la mošate, le mosadi e mongwe leina la gagwe e lego Damarisa, ba na le ba bangwe ba bona.

← Chapter 16 Jump to: Chapter 18 →