bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sotho
/
Sotho 1951 (BIBELE)
/
Acts 21
Acts 21
Sotho 1951 (BIBELE)
← Chapter 20
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 22 →
1
Ge re kgaogana le bona ra namela leselawatle. Ra tloga ka lona ra leba Kosi; ka la ka moswana ra leba Rodo, ra yo tsena Patara.
2
Moo ra hwetša leselawatle la go ya Fenikia, ra namela lona ra tloga.
3
Ge re tla Tsipero, ra tiela sehlakahlake seo go la ntšogošo ra leba Siria, ra tla ra tsena Tiro, gobane e be e le moo leselawatle le bego le iša dithoto.
4
Rena ra yo bona barutiwa, ra dula matšatši a šupago. Barutiwa ba botša Paulo ka Moya ba re a se ke a rotogela Jerusalema.
5
Ge re feditše matšatši ao ra tšwa ra sepela re felegetšwa ke bona ka moka, le ka basadi le bana; ba re fihliša ka ntle ga motse. Moo lebotong la lewatle ra khunama ka matolo ra rapela.
6
Ra laelana; rena ra namela leselawatle; bona ba boela ga gabo bona.
7
Ge re tlogile Tiro, ya ba go fetša leeto la rena ka leselawatle. Ra goroga Petolomai, ra dumediša badumedi, ra dula letšatši le tee re na le bona.
8
Ka la ka moswana ra tsoga re na le Paulo ra wela tsela ra ya Kesarea, ra tsena ngwakong wa Filipi moruti yola wa Ebangedi, e bego e le e mongwe wa ba ba šupilego bala; ra dula ga gagwe.
9
Filipi o be a na le barwedi ba bane ba dikgarebe ba ba bego ba porofeta.
10
Ya re ge re šetše re feditše matšatši a mantši re dutše gona, gwa fihla moporofeta yola a tšwago nageng ya Juda; leina la gagwe ke Agabo.
11
A tla go rena, a tšea moketwana wa Paulo, a itlema matsogo le maoto; a re: Moyamokgethwa o re: Monna yo e lego mong wa moketwana wo Bajuda ba Jerusalema ba tlo mmofa ka wona mokgwa wo, ba mo gafela diatleng tša bantle.
12
Ge re mo kwa a realo, ra rapela Paulo re na le ba motse woo, ra re a se ke a rotogela Jerusalema.
13
Paulo a fetola a re: Le lla le reng le nkgaola pelo? Ge e le nna ga ka itokišetša go fo tlengwa; ke itokišeditše le go bolaelwa ina la Morena Jesu gona kua Jerusalema.
14
Ra ba ra homola a sa fenyege, ra re: A go direge thato ya Morena.
15
Ge go fetile matšatši ao, ra itokiša, ra rotogela Jerusalema.
16
Ra ya re na le ba bangwe ba barutiwa ba Kesarea; ba re iša go Menasone wa Tsipero, e bego e le morutiwa wa kgale; ra dula ga gagwe.
17
Ge re gorogile Jerusalema, badumedi ba re amogela ka lethabo.
18
Ka la ka moswana Paulo a ya go Jakobo a na le rena. Le bagolo bohle ba be ba tlile gona moo.
19
Paulo a ba dumediša, a ba anegela a hlomaganya tšohle tše Modimo a di dirilego ka yena mohlanka wa gagwe mo go bantle.
20
Ba di kwa ba reta Morena. Ba tsebo bolela le Paulo ba re: Ngwanešo! Bajuda ba ba kgodilwego ke ba dikete tše ntši; Gomme ka moka ga bona ke bagale mo go tša Molao.
21
Bjale o boletšwe mo go bona ka go re: Bajuda bohle ba ba falaletšego ditšhabeng o ba ruta go hlanogela Moshe; o re: Ba lese go bolotša bana le go ya ka Molao.
22
Bjale re ka reng? Makoko a tlo kgobokana; go tlo kwala gore o tlile fa.
23
Napo dire se re go botšago sona. Re na le banna ba bane ba ba itlemilego ka keno.
24
Yaa go bona, o hlatswiwe le bona. O ba ntšhetše tša go lefa tlhatso ge ba kotwa dihlogo. Ke mo bohle ba tlogo lemoga gore tše ba go sebago ka tšona ga dio; ba tlo bona ge o le motho wa go ya ka Molao.
25
Ge e le bantle ba ba dumetšego bona re kile ra ba ngwalela, ra ba laya ra re: Sa bona ga se go lotola Molao, ke go ila didimo tša medimo, le madi, le tše di tlimilwego, le bootswa.
26
Ke moka, ka la ka moswana Paulo a tloga le banna bao, a yo hlatswiwa le bona, a tsebo ya Ntlongkgethwa, a ipolela gore o phethile matšatši a go hlatswiwa, gore a ntšhe dineo tša dileboga tša banna bao.
27
Matšatši a šupago ao ge a šetše a tlo felela, Paulo a bonwa ke Bajuda ba ba tšwago Asiana. Bona ba tsoša lešaba ka moka, ba mo iša matsogo.
28
Ba hlaba mokgoši ba re: Banna ba Isiraele! Swarišang! So motho yola a rutago batho bohle ba mafase ka moka, a ba lohlanya le setšhaba le Molao le felo mo. Le gona o tlišitše Bagerika fa Ntlong ya Modimo, a goboša felo mo gokgethwa mo.
29
Ba realo ka ge ba mmone motseng a na le Terofimo wa Efeso; ba gononwa ba re Paulo o tsene nae Ntlongkgethwa.
30
Motse ka moka wa huduega, setšhaba sa bokana; ba swara Paulo ba mo goga, ba mo ntšha Ntlongkgethwa; mejako ya tswalelwa.
31
Ba sa re ba a mmolaya, mokgoši wa kwala go molaodi wa dira, gwa thwe ke moferefere wa motse ka moka wa Jerusalema.
32
Molaodi a hlaganela a tšwa le ditona, a kganyelela go bona. Ge ba ba swerego Paulo ba bona molaodi wa dira a fihlile, ba lesetša go itia Paulo.
33
Molaodi a tla a mo tšea, a laela a re ba mo tleme ka diketane tše pedi. A botšiša a re: Motho yo ke mang? O dirileng?
34
A kwa legoa la lešaba ge ba bangwe ba goa tša bona, ba bangwe ba goa tša bona, a šitwa go kweša se e lego taba ka lešata; a laela a re a išwe sebong.
35
Ge ba fihla manamelong, bahlabani ba kuka Paulo, e le go mo efoša bogale bja setšhaba.
36
Gobane bontši bja lešaba bo be bo latela bo goa bo re: Mmolayeng!
37
Ge Paulo a šetše a tlo tsentšhwa sebong, a botšiša molaodi a re: A nka se bolele le wena? Molaodi a re: A o tseba Segerika?
38
A ga se wena Moegipita yola wa go tsoša mpherefere maloba, wa go tšwela lešokeng, a na le banna ba dikete tše nne ba babolai?
39
Paulo a re: Nna ke monna wa Mojuda, ke tšwa Tareso. Ke motho wa motse woo o tsebjago wa Tsilitsia. Ke a go kgopela, ntumelele go bolela le setšhaba se.
40
A mo dumelela. Paulo a ema manamelong, a emiša seatla, lešaba la homola; a bolela le bona ka mmolelo wa Sehebere, a re:
← Chapter 20
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 22 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28