Acts 6

Sotho 1951 (BIBELE)

← Chapter 5 Jump to: Chapter 7 →

1Mehleng yeo ya ge barutiwa ba ata, gwa tsoga dipelaelo mo go Bagerika, ba tsota Bahebere ba re: Bahlologadi ba rena ba a tingwa, ge go ntšhiwa dikabelo tša matšatši.

2Ba lesome la metšo e mebedi ba botha lešaba la barutiwa, ba bolela ba re: Ga go a loka ge re tlogela lentšu la Modimo, ra ba ba go abela batho dijo.

3Ke gona, bana bešo, hlaolang banna ba ba šupago, ba ba tsebjago gore ba lokile; ba ba tletšego Moyamokgethwa le bohlale, ba re kago ba gafela modiro woo.

4Ge e le rena re tlo fela re tiišetša thapelong le modirong wa thuto.

5Taba ye ya kgahla pitšo ka moka: Ba hlaola Stefano monna e a tletšego tumelo le Moyamokgethwa, le Filipi, le Prokoro, le Nikanoro, le Timone, le Paramena, le Nikolao mosokologi wa Antiokia.

6Ba ba emiša pele ga baapostola; mme bona ba ba rapelela ba ba bea diatla.

7Gomme lentšu la Modimo la enela, palo ya barutiwa ya ba e kgolokgolo motseng wa Jerusalema. Le lešaba le lentši la baperisita la bušwa ke tumelo.

8Stefano yena, ka go tlala tumelo le maatla, a dira mehlolo e megolo le dika tša bohlatse mo setšhabeng.

9Gwa tsoga ba bangwe ba thuto ya Balibertini, le ya Bakirene, le ya ba Alesandria, le ya ba Tsilitsia le Asiana, ba tla ba fetolana le Stefano.

10Ba šitwa go fenya bohlale bja gagwe le moya wo a bego a bolela ka wona.

11Ba ya ba hlohleletša banna ba bangwe ba ba rego: Re mo kwele ge a bolela mantšu a go goboša Moshe le Modimo.

12Ba ferekanya setšhaba le ba bagolo le bamangwalo, ba mo wela godimo ba mo goga, ba mo iša lekgotleng.

13Ba tšweletša dihlatse tša maaka, tša re: Motho e ga a kgaotše go bolela mantšu a go goboša Ngwako o mokgethwa le Molao.

14Rena re mo kwele ge a re: Jesu wa Natsaretha o tlo phušola felo fa, a šatoša melao ye re e neilwego ke Moshe.

15Bohle ba lekgotleng ge ba mo hlaba ka mahlo, ba bona sefahloga sa gagwe se swana le sefahlogo sa morongwa.

← Chapter 5 Jump to: Chapter 7 →