Acts 5

Sotho 1951 (BIBELE)

← Chapter 4 Jump to: Chapter 6 →

1Monna e mongwe yo ba rego ke Anania, le yena a rekiša naga, a na le Safira mosadi wa gagwe.

2A uta e nngwe ya ditšhelete tša yona a kwane le mosadi wa gagwe, a tliša karolo a e bea fase pele ga baapostola.

3Petro a mmotšiša a re: Anania, ke go reng ge Sathane a tladitše pelo ya gago, wa tla wa aketša Moyamokgethwa, o ikaroletše theko ya naga?

4O reng o sa ka wa itulela le tšhemo ya gago mola e sa le ya gago. Le mola o e rekišitše, e be e sa le atleng tša gago. O reng ge pelong ya gago o eleletša tše o di dirago tše? Ga o akele batho; o akela Modimo.

5Ya re ge Anania a ekwa mantšu ao, a wela fase a hwa. Batho ka moka ba welwa ke poifo e kgolo ge ba ekwa taba yeo.

6Masogana a ema a mo rwala, a mo iša ntle, ba mmoloka.

7Ge go fetile lebaka la nako tše tharo, gwa tla mosadi wa Anania, a tsena a sa tsebe se se diregilego.

8Petro a mmotšiša a re: Mpotše! A le rekišitše, naga yeo ka tše kao? Mosadi a re: E, ka tše kao.

9Petro a re: Le be le reng ge le lakana go leka Moya wa Modimo? Tseba gore maoto a bao ba go fihla monna wa gago a mojako; le wena ba tlo go rwala.

10Ke ge a šetše a wela fase pele ga Petro, a hwa. Masogana ala a boa; a hwetša a hwile; ba mo rwala, ba yo mmoloka mo ba bolokilego monna wa gagwe.

11Poifo e kgolo ya wela phuthego ka moka le bohle ba ba kwago taba ye.

12Gwa dirwa mehlolo e mentši le dika tša bohlatse ka diatla tša baapostola mo setšhabeng; ba fela ba phuthegela mathuding a Salomo, ka moka ga bona ba le pelotee.

13Go ba bangwe go be go se e a betago pelo a fo ba tsena; ge e le setšhaba se be se ba godiša.

14Gomme ba ba dumelago ba fela ba ata, ba kopanywa le Morena, ya ba lešaba le lentši la banna le basadi.

15Ba ba ba rwala balwetši ka malao, ba ba bea mekgotheng, gore e tle e re ge Petro a feta, moriti wa gagwe o apeše e mongwe wa bona.

16Le ba metse ya mathoko ba kgobokana Jerusalema e le ba bantši, ba tliša balwetši ba bona le ba go tlaišwa ke meoya ya ditšhila, mme ba fodišwa bohle.

17Gwa tsoga moperisita e mogolo le bohle ba ba bego ba na nae, ba e bego e le ba karogo ya basadutsei, ba tsoga ba tletše bogale.

18Ba swara baapostola ba ba lokela kgolegong, ye go išwago batlengwa bohle go yona.

19Gomme bošego gwa tla Morongwa wa Morena, a bula mejako, a ba ntšha a re:

20Yang le eme Ntlongkgethwa, le botše setšhaba mantšu a bophelo bjo.

21Ba kwa ge a realo, ba ya Ntlongkgethwa e sa le bosasa, ba ruta batho. Moperisita e mogolo ge a fihla le ba a nago le bona, ba rapa pitšo ya ba lekgotla la ba bagolo ka moka ba Baisiraele; ba tsebo roma bahlanka ba re baapostola ba tlišwe.

22Bahlanka ge ba fihla kgolegong, ba se ke ba ba hwetša gona; ba boa ba laodiša ba re:

23Kgolego yona re hweditše e tswaletšwe ka tlhokomelo, bahlapetši ba eme mejako. Ya re ge re bula, ra hwetša go se motho.

24Baperisita ba bagolo, le tona ya Ntlokgethwa, ge ba ekwa taba ye, ba tšhoga ba re: Naa taba tše di iša kae?

25Ke ge go fihla motho e mongwe, a ba tsebiša a re: Banna bao le ba išitšego kgolegong, šebao Ntlongkwethwa; ba eme ba ruta setšhaba.

26Tona ya Ntlokgethwa ya ya le bahlanka, ya ba tliša e sego ka šiši, gobane ba be ba boifa setšhaba gore se se tlo ba thuma ka maswika.

27Ba ba tliša ba ba emiša gare lekgotleng. Moperisita e mogolo a ba botšiša.

28A re: A ga ra ka ra le laela ka thata ra re le lese go ruta ka leina leo? Bjale šefa, le tladitše motse wa Jerusalema ka thuto ya lena; mme le rata gore madi a motho eo a re wele godimo.

29Gwa fetola Petro, le baapostola ba bangwe, ba re: Mo go batho le Modimo, wa go kwešišwa ke Modimo.

30Modimo wa botatawešo o tsošitše Jesu, yo le mmolailego le mo fegile kwateng.

31Yena eo Modimo o mo godišitše, a mmea Mmuši le Mophološi, gore a nee Isiraele tshokologo le tebalelo ya dibe.

32Gomme rena re dihlatse tša gagwe tabeng tšeo; le wona Moyamokgethwa, wo Modimo a o neilego ba ba mo kwago, ke hlatse.

33Ge ba ekwa ba realo, ba betwa ke dipelo, ba rata ge ba ka bolawa.

34Gwa tsoga Gamaliele, e bego e le e mongwe wa bafarisei, moruti wa mangwalo, e a bego a ratwa ke setšhaba ka moka; a ema lekgotleng, a re baapostola ba išwe ntle lebakanyana.

35A tsebo bolela a re: Banna ba Isiraele! Iphakgameleng tabeng ye ka se le tlogo se dira batho ba.

36Mehleng yela go kile gwa tsoga Theuda, a itira e mogolo, a tlatšwa ke banna ba e bego e ka ba ba makgolo a mane. Yena o bolailwe, le ba ba bego ba mmotile ba gašantšwe, ya ba tša lefela.

37Gwa tsebo tsoga Juda wa Galilea; ke mehla yela ya ge batho ba ngwalwa; a hlanoša batho ba bantši, ba ya le yena. Le yena o timetše; le ba ba bego ba mmotile, ka moka ga bona ba tšitlantšwe.

38Bjalo nna ke re: Tlogelang batho ba. Ba leseng ba sepele, gobane ge morero wo e le o tšwago bathong, o tlo senyega.

39Ge o etšwa go Modimo, gona le ka se ke la kgona go o senya. Ba leseng, gore le se tlo hwetšwa le le ba ba lwago le Modimo.

40Ba lekgotla ba mo dumela. Ba bitša baapostola, ba ba otla ka dikgati, ba ba iletša go ruta ka leina la Jesu; ba kgona ba ba lesa ba tloga.

41Baapostola ba tloga moo lekgotleng ba thabile ka go re, ge ba gobošitšwe ka baka la leina la Jesu, ke gona ge ba godišitšwe.

42Mme ba se kgaotše go hlwa ba ruta Ntlongkgethwa le mo malapeng, ba fela ba kwatša Ebangedi ya gore Jesu ke yena Kriste.

← Chapter 4 Jump to: Chapter 6 →