Nehemiah 10

Sotho 1951 (BIBELE)

← Chapter 9 Jump to: Chapter 11 →

1Ya re di šetše di eme ka mokgwa wo, ra dira kgwerano, ra e ngwala; mme bakgoma ba rena, le Balefi ba baperisita ba rena, ba bea seka sa bona mo lengwalong leo.

2Ba ba beilego seka šeba: Ke Nehemia molakanaga morwa wa Hakalia, le Tsedekia,

3le Seraya, le Asaria, le Jeremia,

4le Pashuri, le Amaria, le Malakai,

5le Hatusi, le Sebanya, le Maluka,

6le Harima, le Meremothe, le Obadya,

7le Daniele, le Ginithoni, le Baruki,

8le Mesulama, le Abia, le Miyamini,

9le Maasia, le Biligai, le Semaya. Ke bona baperisita.

10Ba Balefi e be e le: Jeshua morwa wa Asanya, le Binui. Wa ga Henadadi e be le Kadimiele,

11le bona ba bobona boSebanya, le Hodia, le Kelita, le Pelaya, le Hanani,

12le Mika, le Rehobo, le Hasaya,

13le Sakuri, le Serebya, le Sebanya,

14le Hodia, le Bani, le Beninu.

15Bagolo ba setšhaba e be e le Pareose, le Phahathe, Moaba, le Elama, le Sathu, le Bani,

16le Banu, le Asigadi, le Bebai,

17le Adonia, le Bigifai, le Adina,

18le Atere, le Hiskia, le Asuri,

19le Hodia, le Hasuma, le Betsai,

20le Harifa, le Anathothe, le Nebai,

21le Magapia, le Mesulama, le Hesira,

22le Mesesabiele, le Tsadoko, le Jadua,

23le Pataya, le Hanani, le Anaya,

24le Hosea, le Hananya, le Hasuba,

25le Halohese, le Pilika, le Sobeke,

26le Rehuma, le Hasabana, le Maaseya,

27le Abia, le Hanani, le Anani,

28le Maluka, le Harima, le Baana.

29Le ba bangwe ba setšhaba, ba baperisita le Balefi, le baletakgoro, le baopedi, le bahlanka ba Ntlokgethwa, le bohle ba ba bego ba ikarogantše le ditšhaba tša dinaga tšeo mme ba bušwa ke molao wa Modimo, le basadi ba bona, le barwa ba bona, le barwedi ba bona, bohle ba ba bego ba na le tlhaologanyo,

30ba tiiša gotee le bana ba bobana ba bagolo, ba ena ba itlema ba re ba tlo swara ka tsela ya molao wa Modimo, wo a o beilego ka Moshe mohlanka wa gagwe, le gore ba tlo o hlokomela, ba dira ka ditaelo ka moka tša Morena Modimo wa rena, ba gomarela mokgwa wa gagwe,

31ra re: Barwedi ba rena re ka se ke ra ba nea ba ditšhaba tša naga ye, mme barwa ba rena ba ka se ke ba tšea barwedi ba bona.

32Le gona ra re: Ge ba ditšhaba ba ka tliša tša go bapatša, e ka ba mabele a mehutahuta, ba a bapatša ka letšatši la Sabatha, re ka se ke ra ba rekela ka la Sabatha, le ge e le ka tšatši le lengwe le lekgethwa; mme ra re: Ka ngwaga wa go šupa re tlo lesa naga ya khutša, ra lesa go bela melato.

33Ra ipeela molao wa go re re tlo ntšha sa boraro sa sekele ka ngwaga, ya ba sa go direla Ngwako wa Modimo wa rena,

34gore go bewe dinkgwaponwa, le dibego tša ka mehla, le sehlabelo sa ka mehla le sa Sabatha le sa kgwedi e mpsha le sa menyanya; le dileboga le diloba tša ge Isiraele a direlwa poelanyo; go dirwe mediro ka moka ya Ngwako wa Morena.

35Ra diriša baperisita le Balefi matengwa ka baka la go rwalela dikgong Ngwakong wa Morena, ba fapakanya medirong ka go ya ka meloko le ka mabaka a ngwaga, ba di iša aletareng ya Morena Modimo wa rena ka mo go ngwadilwego molaong.

36Ra re: Re tlo ntšha dithakangwaga tša mašemo a rena, le dithakangwaga tša dienywa tša dihlare ka moka; di tlišwe Ngwakong wa Morena ka ngwaga o mongwe le o mongwe.

37Le barwa ba rena ba maitšibulo, le maitšibulo a diruiwa tša rena, re a tliša ka mo go ngwadilwego molaong, e lego maitšibulo a dikgomo le a dinku tša rena, a tlišwe Ngwakong wa Modimo wa rena go baperisita ba ba swerego modiro Ngwakong wa Modimo wa rena.

38Re tliše le dithakangwaga tša bupi bja diekaro, le tša dienwya tša dihlare ka moka, tša morara le tša mohlware; re di tliše diphapošing tša Ngwako wa Modimo wa rena; le sa lesome sa mašemo a rena se ntšhetšwe Balefi, gore Balefi ba newe dikarolo tša lesome metseng ka moka e nago le malemo.

39Ge Balefi ba ntšhiša batho sa lesome, go tlo tla le moperisita wa leloko la Arone; mme sa lesome sa dikarolo tšeo se išwe Ngwakong wa Modimo, ba di boloke diphapošing tša Ngwako wa polokelo.

40Gobane diphapošing tšeo Baisiraele le Balefi ba tlo boloka diekaro tša mabele le tša morara le mohlware, gobane ke mo go bolokwago thoto e kgethwa, ke mo go lego baperisita ba go dira mediro e mekgethwa, le baleti ba dikgoro, le baopedi. Gobane ga re rate go lahla Ngwako wa Modimo wa rena.

← Chapter 9 Jump to: Chapter 11 →