Nehemiah 5

Sotho 1951 (BIBELE)

← Chapter 4 Jump to: Chapter 6 →

1Go kile gwa kwala sello se segolo sa batho, le sa basadi ba bona ka baka la bana ba bobona ba Bajuda.

2Ba bangwe ba re: Rena re ba bantši, le barwa ba rena, le barwedi ba rena; re feng mabele, re je, re phele!

3Ba bangwe ba re: Rena re filwe mabele ke ba ba re swareletšego ka mašemo a rena le ka dirapa tša rena tša merara, le ka nywako ya rena!

4Ba bangwe ba re: Rena re adimilwe tšhelete ya motšhelo wa kgoši ke ba ba re swareletšego ka mašemo a rena, le ka dirapa tša rena tša merara,

5etšwe re le selo setee le bona, le bana ba rena ba swana le bana ba bona. Bjale šedi: Re ntšha bana ba rena ba masogana le ba basetsana ya ba bahlanka ba bona. Barwedi ba rena ba bangwe e šetše e le bahlanka ba bona; ga ba sa le maatleng a rena ka ge mašemo a rena le dirapa tša rena e le tša ba bangwe!

6Nna ka re go kwa sello se sa bona le mantšu ao a bona, ka befelwa gagolo.

7Ka eleletša taba ye pelong ya ka, ka omanya ba bagolo le bakgoma, ka ba rera ka re: Le ja batho; le napa le eja bana beno. Gomme ka ba kgobela pitšo e kgolo ka lwa le bona.

8Ka bolela le bona ka re: Bana ba borena ba Bajuda ba ba bego ba rekilwe ke ba ditšhaba, re lekile go ba rekolla bohle. Bjale lena le rekiša bana ba bolena. A fa le re ba tlo rekwa ke rena?

9Ka re: Se le se dirago ga se botse. E ka ba kaone ge le swara ka tsela ya ba ba boifago Modimo; mme la lesa go re nyatšiša go ba ditšhaba ba e lego manaba a rena.

10Gomme le nna, le bahlanka ba ka, re ba adimile tšhelete le mabele. A re ba neeng tšeo re ba adimilego tšona.

11Bušang le ba neele mašemo lehono, le dirapa tša bona tša merara, le dirapa tša bona tša mehlware, le nywako ya bona; mme le lese go ba lopa se se tswalwago ke kadimo ya tšhelete le ya mabele le ya beine le ya makhura.

12Batho bao ba re: Re tlo ba bušetša tšona tšeo, mme re ka se ke ra hlwa re tšea selo go bona; re tlo dira ka mo o boletšego ka gona. Gomme ba bitša baperisita, ba ba eniša gore go tlo dirwa ka mo go boletšwego ka gona.

13Gomme ka udubatša kobo ye ke bego ke a apere, ka re: Ka mokgwa o bjalo Modimo a udubatše mang le mang e a sa dirego se re se boletšego; a mo ntšhe mo ngwakong wa gagwe le mo modirong wa gagwe; a udubatšwe a šale a se na selo! Ba ba bego ba phuthegile ka moka ba re: Ka kgonthe! Ba reta Morena; mme setšhaba ka moka sa dira ka mo go boletšwego ka gona.

14Le gona go tloga ka tšatši leo le ke beilwego ka lona ka ba mokgoma wa bona nageng ya Juda, nna le bana bešo ga ra ka ra ja bogobe bja mokgoma; ke go tloga ka ngwaga wa masome a mabedi wa ge go buša kgoši Arithasasitha go fihla go wa masome a mararo a metšo e mebedi; ke nywaga e lesome la metšo e mebedi.

15Bakgoma ba ba bego ba le gona pele ga ka, bona ba be ba imela setšhaba ka go ntšhiša batho silifera ya sekele tše masome a mane tša bogobe le beine; le bahlanka ba bona ba be ba buša batho ka go ithatela. Nna tše bjalo ke be ke sa di dire ka go boifa Modimo.

16Le Modiro wa go tsoša morako re o phegeletše le ge re se ne naga ya rena ye re e rekilego; mme bahlanka ba ka ka moka ba be ba kgobakanela modiro woo.

17Bajuda ba bakgoma ba e bego e le ba lekgolo le masome a mahlano, le ba bangwe ba ba bego ba etla go rena ba etšwa dileteng thoko tšohle, ba be ba eja dijo tša ka.

18Ka tšatši le lengwe le le lengwe ke be ke hlabelwa pholo e tee, le dinku tše di selelago, le dikgogo; ka tšatši la lesome go be go tlišwa beine e ntši ya mehutahuta. Le ge go le bjalo ga nka ka nyaka dibego tša mokgoma, gobane setšhaba se be se imelwa ke modiro.

19Hle Modimo wa ka! Tšohle tše ke di direlego setšhaba se, o se di lebale, mme o ntire ka botho.

← Chapter 4 Jump to: Chapter 6 →