Nehemiah 13

Sotho 1951 (BIBELE)

← Chapter 12 Jump to:

1Mehleng yeo go be go balwa puku ya Moshe setšhaba se theeditše; gwa hwetšwa mo go ngwadilwego gwa thwe: Baamoni le Bamoaba ba se ke ba tla phuthegong ya Modimo le ka mohla o mongwe,

2ka ge ba sa ka ba gahlanetša Baisiraele ka bogobe le ka meetse, ba ba ba thwala Bileama gore a ba hlolele kotsi; mme mahlolakotsi ao, Modimo wa rena a a fetola a ba ditšhegofatšo.

3Ya re ge ba ekwa molao woo, ba hlaola ba e lego ba mohuta o šele ka moka.

4Mehleng yeo ke ge Eliyasiba, moperisita yo e bego e le yena molaki wa diphapoši tša ngwakong wa Modimo wa rena, a šetše a tswalane le Tobia,

5a mo diretše phapoši e kgolo, ba beile dibego tša dijo ntshe, le dinoko, le dibjana, le tša karolo ya lesome ya mabele le ya mananose a morara le mohlware, tše di bego di laeletšwe Balefi le baopedi le baletakgoro, e le dibego tša baperisita.

6Ge go dirwa tše bjalo, ke ge nna ke se moo Jerusalema, gobane ka ngwaga wa masome a mararo a metšo e mebedi wa pušo ya Arithasasitha kgoši ya Babele, nna ke be ke ile mošate. Ya re ge go fetile matšatši a sego nene, ka kgopela tsela go kgoši.

7Ka boela Jerusalema, ka bona bobe bjo bo dirilwego ke Eliyasiba ge a ekelela Tobia, bja ge a mo diretše phapoši lapeng la Ngwako wa Modimo.

8Bobe bjoo bja ntsheleka gagolo, ka tšea dilo tšeo ka moka tša Tobia ka di lahlela ntle.

9Ka laela ka re ba thakgafatše phapoši yeo, ka tsebo bea dibjana tša Ngwako wa Modimo mo go yona, le dibego tša dijo le diorelo.

10Ka kwa ge ba re: Balefi ga ba ešo ba ntšhetšwa dikabelo tša bona, le gore Balefi le baopedi, ba e lego ba modiro wa Ntlongkgethwa, ba bile ba tlogile ba ile mašemong.

11Ke mo ke omantšego ba bagolo, ka re: Ngwako wa Modimo o tlogetšwe ka baka lang? Ka bitša Balefi bala ka ba bea modirong wa bona.

12Ya ba gona Bajuda ka moka ba tlišago dikarolo tša lesome tša mabele le tša mananose a morara le tša makhura, tša bolokwa nywakong ya polokelo.

13Ka bea Selemia moperisita, le Tsadoko mongwadi, le Pedaya e mongwe wa Balefi, ya ba balebeledi ba polokelo; ba tlatšwa ka Hanani morwa wa Sakuri, morwa wa Mathanya, gobane ba hweditšwe e le bona babotegi; ya ba bona ba go abela bana ba bobona.

14Modimo wa ka! Hle nkgopole ka baka la tšona tše; mme mediro ya ka ya lerato ye ke e diretšego Ngwako wa Modimo wa ka le bahlanka ba wona, o se ke wa e lebala.

15Mehleng yeo ka bona ba bangwe ba Bajuda ba fotela morara dinkgong ka la Sabatha, ba bangwe ba rwala mabele ba belešitše dipokolo, ba rwala dienywa tša morara le tša mogo le merwalo e mengwe ya mehutahuta, ba e tliša Jerusalema ka la Sabatha; ka ba kgala ka tšatši leo ba bapatša dijo tšeo.

16Le Batiro ba ba bego ba agile mo, ba tliša dihlapi le dilo tše dingwe, ba di bapatša go Bajuda ka la Sabatha motseng wa Jerusalema.

17Ka omanya bagolo ba Bajuda ka re: Ke ditaba mang tše mpe tše le di dirago, tše le gobošago la Sabatha ka tšona?

18A ga se tšona tše di bego di dirwa ke botatawešo, mme Modimo wa rena a ba a re tlišetša bošula bjo ka moka ka baka la tšona? Le tlo hlolela Isiraele dikotlo tše di fetišago, ge le goboša Sabatha.

19Ya re ge meriti ya merako ya Jerusalema e gonoga, Sabatha e sešo ya thoma, ka laela gore dikgoro di tswalelwe; ka re di se ke tša bulwa ge e sa le Sabatha; ka bea ba bangwe ba bahlanka ba ka dikgorong, gore ka la Sabatha go se ke gwa tlišwa selo fa motseng.

20Mme babapatši le barekiši ba dilo tša mehutahuta ba lala ntle, ba se ke ba tsena motseng wa Jerusalema; ba dira bjalo gatee gabedi.

21Ka ba kgala ka re: Le reng le robala le batagane le morako? Ge le ka boeletša, ke tlo le swara ka diatla. Ya ba gona ba lesitšego go tla ka Sabatha.

22Ka bolela le Balefi ka re: Ithakgafatšeng le lete dikgoro, gore letšatši la Sabatha le kgethwe! Modimo wa ka! Hle nkgopole ka tše ke di dirilego, o ntire ka kgaugelo ka bogolo bja mabobo a gago!

23Mehleng yeo ka bona Bajuda ba bangwe ba ba tšerego basadi ba Baasidodo le ba Baamoni le ba Bamoaba.

24Mme bana ba bona ge ba bolela ba gobanya le Seasidodo, go se e tsebago go bolela Sejuda, ba bolela sehlakano sa mebolelo.

25Ka ba omanya, ka ba roga, ka ba ka itia ba bangwe, ka ba udubatša meriri, ka ba eniša ka Modimo, ka re: Le se ke la ba tšeiša barwedi ba lena; mme le se ke la tšeiša barwa ba lena barwedi ba bona; le lena le se ke la itšeela bona.

26Ka re: A ga se sona se Salomo kgoši ya Isiraele a sentšego ka sona, mola go se kgoši e nngwe ya ditšhaba e bego e lekana nae; mola a ratwa ke Modimo; mme Modimo a mmeile kgoši ya Isiraele ka moka; gomme le yena a ba a dirišwa dibe ke basadi ba šele.

27A fa le re re ka fo homola re kwile ge le dira bobe bjo bogolo bjoo, ge le hlanogela Modimo ka go tšea basadi ba mohuta o šele?

28E mongwe wa barwa ba Joyada morwa wa Eliyasiba moperisita e mogolo, e be e le mokgonyane wa Sanebalathi wa Horoni; yena yo ka mo raka.

29Modimo wa ka! O se ke wa ba lebala, gobane ba tšhilafaditše boperisita le kgwerano ya baperisita le Balefi.

30Ke dirile ka mokgwa woo ge ke ba ntšha tšhila ya ba ntle, ka tiiša bolebeledi bja baperisita le Balefi, e mongwe le e mongwe a tseba modiro wa gagwe,

31ka tiiša le gore dibego tša dikgong di tlišwe ka mabaka a gona, le tša maitšibulo. Modimo wa ka, o se ntebale, o ntire tše bolo.

← Chapter 12 Jump to: