Nehemiah 12

Sotho 1951 (BIBELE)

← Chapter 11 Jump to: Chapter 13 →

1Baperisita le Balefi ba ba boilego Babele ba na le Serubabele morwa wa Sealathiele le Jeshua, šeba: Ke Seraya, le Jeremia, le Esera,

2le Amaria, le Maluka, le Hatusi,

3le Sekanya, le Rahuma, le Meremothe,

4le Ido, le Ginithoi, le Abia,

5le Miyamini, le Maadia, le Bilia,

6le Semaya, le Joyariba, le Jedaya,

7le Salu, le Amoka, le Hilikia, le Jedaya. Ke bona ba e bego e le ba bagolo ba baperisita, le bana ba bobona mehleng ya Jeshua.

8Balefi e be e le Jeshua, le Binui, le Kadimiele, le Serebya, le Jehuda, le Mathanya, yena le bana babo e be e le bahlabeledi ba difela tša tebogo.

9Le Bakabukia, le Uni, le bana babo, e be e le ba go dirišana nabo.

10Jeshua a tswala Joyakima; Joyakima a tswala Eliyasiba; Eliyasiba a tswala Joyada;

11Joyada a tswala Jonathane; Jonathane a tswala Jadua.

12Mehleng ya Joyakima baperisita ba e bego e le bagolo ba moloko e be e le Mereya wa ga Seraya, le Hananya wa ga Jeremia.

13Wa ga Esera e be e le Mesulama; wa ga Amaria e be e le Johanani;

14wa ga Maluka e be e le Jonathane; wa ga Sebanya e be e le Josefa;

15wa ga Harima e be e le Adina; wa ga Meyarothe e be e le Helekai;

16wa ga Ido e be e le Sakaria; wa ga Ginithoni e be e le Mesulama;

17wa ga Abia e be e le Sikiri; wa ga Minyamini e be e le Pilitai;

18wa ga Biliga e be e le Samua; wa ga Semaya e be e le Jonathane;

19wa ga Joyariba e be e le Mathanai; wa ga Jedaya e be e le Usi;

20wa ga Salai e be e le Kalai; wa ga Amoka e be e le Ebere;

21wa ga Hilikia e be e le Hasabya; wa ga Jedaya e be e le Nathanaele.

22Ge e le Balefi mehleng ya Eliyasiba le Joyada le Jodua, go be go ngwadilwe ba e lego bagolo ba meloko, le baperisita ba mehla go buša Dario wa Peresia.

23Balefi ba e lego bagolo ba meloko ba ngwadilwe pukung ya ditaba tša kgale go fihla ba mehleng ya Johanani morwa wa Eliyasiba.

24Maina a bagolo ba Balefi šea: Ke Hasabya, le Serebya, le Jeshua morwa wa Kadimiele, le bana ba bobona ba ba bego ba dirišana nabo ditumišong le ditebogong ka mo Dafida monna wa Modimo a laetšego ka gona gwa bapetšwa sehlopha le sehlopha;

25le Mathanya, le Bakebukia, le Obadya, le Mesulama, le Talamoni, le Akuba. E be e le baleti ba dikgoro, ba hlapetša polokelong ya dikgorong.

26Ke bona ba ba bego ba le gona mehleng ya Joyakima morwa wa Jotsadaka, le mehleng ya Nehemia molakanaga, le Esera moperisita moruti wa mangwalo.

27Mohla ba kgakola morako wa Jerusalema Balefi ba bitšwa mo go fela mo ba bego ba dutše gona, ba tla Jerusalema ba kgakola morako ka go thaba, le ka go leboga, le ka go opela, le ka meropa, le ka makope, le ka diletšo.

28Ke moka bagolo ba baopedi ba kgobokana ba etšwa melaleng e lego tikologong ya Jerusalema, le metseng ya bahlanka ba Ntlokgethwa;

29ba rotoga ba etšwa le Giligala, le mašemong a Gibea le Asimafethe, gobane baopedi ba be ba ikagetše metsana kgauswi le Jerusalema.

30Baperisita le Balefi ba ithakgafatša, ba thakgafatša le setšhaba, le dikgoro, le morako.

31Ke moka ba nametša bakgoma morako, ba bea dihlopha tše pedi tše dikgolo tša baopedi ba ba lebogago, ba sepela ba lokologane; sehlopha sa ka thoko ya borwa se le morakong, sa leba kgoro ya morole,

32sa latelwa ke Hosaya le ba bangwe ba bakgoma ba Juda,

33le Asaria, le Esera, le Mesulama,

34le Juda, le Benyamini, le Semaya, le Jeremia,

35le ba bangwe ba baperisita, ba swere diphalafala, e lego Sakaria morwa wa Jonathane, morwa wa Semaya, morwa wa Mathanya, morwa wa Mikaya, morwa wa Sakuri, morwa wa Asafa,

36le bana ba boSemaya, le Asariele, le Milalai, le Gilalai, le Nathanaele, le Juda, le Hanani e a bego a swere diletšo tša Dafida monna wa Modimo; gomme Esera moruti wa mangwalo o be a ba etile pele.

37Ba ya ba leba kgoro ya sediba, ba tla ba bapelana le ba bangwe, ka moka ba rotoga ka manamelo a go ya motseng wa Dafida, ka tsela e rotogelago morakong wa ka tletlolo ga ngwako wa Dafida, ba tla kgorong ya meetse ya ka thoko ya bohlabela.

38Sehlopha sela se sengwe sa baopedi ba ditebogo sa ya se leba thoko ya leboa; nna ka se šala nthago le ba bangwe ba setšhaba, sa sepela se le morakong ka tletlolo ga sebo sa dibešo sa tla ka morakong o mogolo.

39Ba feta ka tletlolo ga kgoro ya Efuraimi, ba leba kgoro e tala, ba tsebo leba kgoro ya dihlapi le sebo sa Hananaele, le sebo sa Mea, ba tla ka kgorong ya dinku ba ema kgorong ya kgolego.

40Gomme dihlopha tše pedi tšeo tša baopedi ba ditebogo tša tla tša ema Ngwakong wa Modimo, le nna ka ema moo, ke na le ba bangwe ba bagolo.

41Baperisita, boElaikima, le Maaseya, le Minyamini, le Mikaya, le Elioenai, le Sekaria, le Hananya, ba be ba swere diphalafala,

42ba na le Maaseya, le Semaya, le Eleasara, le Usi, le Johanani, le Malakia, le Elama, le Esere. Baopedi ba na ba hlaboša mantšu ba na le Jisiraya mohlabeledi wa bona.

43Mohla woo gwa na gwa hlabja dihlabelo tše kgolo, ba thaba ka gobane Modimo a ba thabišitše ka thabo e kgolo; le basadi le bana ba na ba thaba. Thabo ya Jerusalema ya ba ya kwewa ke ba kgole.

44Mohla woo gwa bewa banna go laka nywakwana ya dipolokelo tša motšhelo le tša dithakangwaga le tša dikarolo tša lesome, gore go kgobelwe tša mašemo a metse le dibego tše di laetšwego ke molao, ya ba tša baperisita le tša Balefi ba ba beilwego.

45Gomme ba hlokomela tše di swanetšego go hlokomelwa tša Modimo le tša molao wa thakgafatšo, le mediro ya baopedi le baletakgoro, ka mo Dafida le Salomo morwa wa gagwe ba bego ba laetše ka gona.

46Gobane mehleng ya bogologolo ya Dafida le Asafa go be go beilwe bagolo ba baopedi ba difela tša ditumišo le tša go leboga Modimo.

47Gomme mehleng ya Serubabele le Nehemia Baisiraele ka moka ba ntšhetša baopedi le baletakgoro dikabelo tša ka mehla, ba di kgethela Balefi, gomme Balefi ba arolela barwa ba Arone.

← Chapter 11 Jump to: Chapter 13 →