Nehemiah 6

Sotho 1951 (BIBELE)

← Chapter 5 Jump to: Chapter 7 →

1Bjale Sanebalathi, le Tobia, le Gesema Moarabia, le ba bangwe ba manaba a rena, ge ba ekwa gore morako wola ke o agile, o se sa na le sekgero, le ge mehleng yeo ke sešo ka thwela mamati,

2Sanebalathi le Gesama ba roma motho a tla a re: Tlaa, re gahlane motsaneng wa molaleng wa Ono. Mme ba be ba ntakane.

3Nna ka roma batseta ka fetola ka re: Nna ke swerwe ke modiro o mogolo; nka se ke ka fologa ka tla, gobane modiro o ka ema ge nka o tlogela ka theogela go lena.

4Ba buša ba roma lentšu ba ba ba dira gane; nna ka fela ke ba fetola ka mokgwa woo.

5Ke mo Sanebalathi a romilego mohlanka wa gagwe la bohlano, a tla ka lona lentšu leo, a swere lengwalo le le sa kago la menwa.

6Go lona go be go ngwadilwe gwa thwe: Mo ditšhabeng go tumile taba ya go re: Wena le Bajuda le rera go hlanoga; ke ka baka leo le tsošitšego morako; mme wena o tlo ba kgoši ya bona! Ba realo, le Gesama o realo.

7Le gona ba re, o beile baporofeta ba go hlaba mokgoši Jerusalema, wa go re: O kgoši ya naga ya Juda! Bjale taba tšeo di tlo fihla mošate, Tlaa ge, re eletšane.

8Nna ka roma lentšu ka fetola ka re: Ditaba tše o di bolelago ga dio; ke wena o ithometšego tšona ka pelong ya gago.

9Gobane bona ka moka ba be ba rata go re tšhošetša, ba re re tlo lesa modiro woo, wa se ke wa dirwa. Joo Modimo wa ka! Bjale gona tiiša diatla tša ka.

10Ge ke tla ngwakong wa Semaya morwa wa Delaya morwa wa Mehetabiele, ka mo hwetša a itswaleletše, a re: A re kgobokaneng Ngwakong wa Modimo, re tsene mo Ntlongkgethwa, re tswalele mejako ya Ntlokethwa, gobane ba tlo tla ba go bolaya; ba tlo tla bošego ba go bolaya.

11Nna ka re: A o re monna moka nna a ka tšhaba? Le gona motho moka nna a ka tsena Ntlongkgethwa a phela? Nna nka se ke ka ba ka tsena.

12Ka realo ka ge ke lemogile gobane monna eo o be a sa ka a rongwa ke Modimo; ge a mporofetela tšeo ke ge a šetše a rekilwe ke Tobia le Sanebalathi.

13Ba be ba mo thwetše gore a ntšhošetše, gore ke dire ka mokgwa woo ke senye, gore ba bone se ba kago senya leina la ka ka sona, ba nnyatšiše.

14Modimo wa ka! Se lebale Tobia le Sanebalathi. O ba dire se se lebanego mediro yeo ya bona, le Noadya moporofeta wa mosadi, le baporofeta ba bangwe ba ba lekilego go ntšhošetša.

15Morako o phethilwe ka la masome a mabedi a metšo e mehlano la kgwedi ya Elula; re o agile ka matšatši a masome a mahlano a metšo e mebedi.

16Manaba a rena ka moka ge a di kwa a boifa, le ditšhaba ka moka tša thoko tšohle tša boifa tša nolega moko, tša lemoga gobane modiro woo re o phethile Modimo wa rena a na le rena.

17Gomme mehleng yeo bagolo ba bantši ba Bajuda ba be ba ngwalelana mangwalo le Tobia.

18Gobane mo nageng ya Juda go be go na le ba bantši ba ba bego ba ikgafetše Tobia ka dikeno, ka ge Tobia e le mokgonyana wa Sekanya morwa wa Arahe; gomme Johanani morwa wa gagwe o be a tšere morwedi wa Mesulama morwa wa Bereikia.

19Gomme go nna ba be ba fela ba mmolela ka tše di botse; mme yena ba be ba fela ba mo sebela tše nna ke bego ke di bolela. Gomme Tobia ya ba yena a nthomelago mangwalo a go ntšhoša.

← Chapter 5 Jump to: Chapter 7 →