Revelation 1

Sotho 1951 (BIBELE)

Jump to: Chapter 2 →

1Kutollo ya Jesu Kriste ye Modimo a mo filego yona, ya ba go bontšha bahlanka ba gagwe tše di tlogo direga ka pela. O di tsebišitše ka Morongwa wa gagwe yo a mo romilego a tla go Johane mohlanka wa gagwe,

2e a hlatsetšego lentšu la Modimo, a ba hlatse ya Jesu Kriste le ya tše a di bonego.

3Wa lehlogonolo ke e a balago le ba ba kwago mantšu a a porofeto le ba ba lotolago tše di ngwadilwego mo go yona; gobane lebaka le kgauswi.

4Johane o ngwalela diphuthego tše šupago tša Asia. Kgaugelo a e le tlele, le khutšo e tšwago go yena Mobagona Mohwetšwaalegona, e a tlogo tla, le go Meoya e šupago e lego pele ga sedulo sa gagwe sa bogoši,

5le go Jesu Kriste yena Hlatse ye e botegago, yena Thakaletswalo ya bahu, yena Mmuši wa dikgoši tša lefase, yena a re ratilego a re hlatswa dibe ka madi a gagwe,

6a re dira ba mmušo le baperisita ba Modimo Tatagwe, ke yena Mong wa letago le maatla go iša mehleng ya neng le neng. Amene.

7Soo, o tla ka maru, mme mahlo ohle a tlo mmona, le bao ba mo hlabilego; mme meloko yohle ya lefase e tlo mo hloboga. Go bjalo! Amene!

8Ke nna A le O, mathomo le pheletšo! O realo Morena Modimo Mobagona, Mohwetšwaalegona, e a tlago, Ramaatlakamoka.

9Nna Johane ngwana bolena, wa go ba le lena re tlaišwa, re bušwa, re kgotlelela re le ba Jesu Kriste, ke be ke le sehlakehlakeng se ba rego ke sa Patimo, molato e le lentšu la Modimo, e le go hlatsela Jesu Kriste.

10Ke ile le Moya ka letšatši la Morena, ka kwa ka nthago gaka lentšu le legolo le e kego ke la phalafala,

11le re: Ke nna A le O, Wamathomo le Wamafelo. Tše o di bonago di ngwale pukung, o di romele diphuthego tša Asia, phuthego ya Efeso, le ya Simirina, le ya Peregamo, le ya Thiathira, le ya Sarede, le ya Filadelefia, le ya Laoditsea.

12Ka retologa ke re ke bone mo go tšwago lentšu leo le boletšego le nna. Ke retologile ka bona dihlomapone tše šupago tša gauta.

13Mo gare ga tšona dihlomapone tšeo ka bona Mokamorwamotho, a apere kobo e telele, a itlemile ka moketwana wa gauta go fihla dikgopong.

14Hlogo ya gagwe le meriri ya gagwe e le bošweu boka boya bjo bošweu wa leswela, mahlo a gagwe a le bjalo ka kgabo ya mollo.

15Maoto a gagwe a swana le tshipi ye e tagilego ye e tšwago meubeng, mme lentšu la gagwe eke ke modumo wa meetse a mantši.

16Ka seatla sa gagwe se setona o be a swere dinaledi tše di šupago; molomong wa gagwe go be go etšwa lerumo le le bogale lelootšwagobedi, sefahlogo sa gagwe se swana le letšatši le le phadimago e le le maatla.

17Ge ke mmona, ka wela fase pele ga gagwe ke le bjalo ka mohu. Yena a mpea seatla se setona sa gagwe, a bolela le nna a re: Se boife! Ke nna Wamathomo le Wamafelo,

18Ke nna Wagophela. Nkile ka ba mohu; bjale ke nna e, ke wa go phela go iša mehleng ya neng le neng; mme ke swere dikgonyo tša bodulabahu le tša lehu.

19Bjale ngwala tše o di bonago, le tše di lego gona, le tše di tlogo direga,

20Tša thopa ya dinaledi tše šupago tša mo seatleng sa ka se setona, le tša dihlomapone tše šupago tša gauta. Dinaledi tšeo tše šupago ke batseta ba diphuthego tše šupago. Dihlomapone tše šupago tše o di bonego, ke diphuthego tše šupago.

Jump to: Chapter 2 →