Revelation 11

Sotho 1951 (BIBELE)

← Chapter 10 Jump to: Chapter 12 →

1Ka newa lehlaka le e kego ke lehlotlo; gwa thwe: Ema o ele Ntlokgethwa ya Modimo, le aletare, le ba ba rapelago mo go yona.

2Ge e le lapa la ka ntle ga Ntlokgethwa o le lese, o se le ele, gobane le gafetšwe bantle; gobane ba tlo gataka motse o mokgethwa ka dikgwedi tše masome a mane a metšo e mebedi.

3Gomme dihlatse tša ka tše pedi ke tlo di bea tša porofeta ka matšatši a sekete se nago le makgolo a mabedi le masome a selelago, di apere kobo tša mekotla.

4Ke bona mehlware e mebedi ya makhura, ke bona dihlomapone tše pedi tše di emego pele ga Mong wa lefase.

5Ge motho a leka go ba hlokofatša go tšwa mollo melomong ya bona, wa tšhuma manaba a bona. Ge motho a leka go ba hlokofatša, o swanetše go bolawa ka mokgwa woo.

6Bona ba na le maatla a go tswalela legodimo, gore pula e se ne mehleng ya ge ba sa porofeta; ba na le maatla a go fetola meetse a ba madi, le maatla a go otla lefase ka kotlo efe le efe ge ba rata.

7E tlo re ge ba feditše go hlatsa, ke mo sebata se se rotogago sekoting se tlogo ba tsošetša ntwa, sa ba fenya, sa ba bolaya.

8Gomme ditoto tša bona di tlo rapalala mekgotheng ya motse o mogolo wo ba rego ke Sodoma le Egipita, ba era ka nnga ya moya, e le mo le Mong wa bona a bapotšwego gona sefapanong.

9Gomme ditoto tša bona di tlo bonwa ke ba merafo le meloko le maleme le bantle; gwa tlo fela matšatši a mararo le seripa sa la bone ba di bona, ba sa dumele ge di ka bolokwa mabitleng.

10Ba ba agilego lefaseng ba tlo thaba ka baka la bona, ba tlo hlalala ba išetšana dineo, ka gobane baporofeta ba babedi bao ba be ba tlaiša ba ba agilego lefaseng.

11Ge go fetile matšatši a mararo ao le seripa sa la bone, ke mo moya wa bophelo o tšwago go Modimo o boetšego go bona. Ba ema ka dinao, mme ba ba ba bonago ba welwa ke poifo e kgolo.

12Ba kwa lentšu le legolo le le tšwago legodimong le bolela le bona le re: Rotogelang fano! -- Ba rotogela legodimong ka leru, manaba a bona a ba tsepeletše.

13Ka yona nako yeo gwa tsoga tšhišinyego e kgolo ya lefase, mme karolo ya lesome ya motse ya phušoga, gwa bolawa maina a batho ba dikete tše šupago ka tšhišinyego yeo; ba bangwe ba swarwa ke go tšhoga ba lotšha Modimo wa legodimo.

14Ke gona ge go fetile “Joo” ya bobedi; ya boraro “Joo” seo, e tla ka bjako.

15Morongwa wa go šupa a letša phalafala; magodimong gwa kwala matšu a magolo, a re: Mebušo ya lefase e tlile ya ba Mmušo wa Mong wa rena le wa Motlotšwa wa gagwe. Gomme o tlo buša go iša mehleng ya neng le neng!

16Bagolo bala ba masome a mabedi a metšo e mene ba ba bego ba dutše pele ga Modimo didulong tša bona, ba lotšha ba khunamela Modimo.

17Ba re: Re a go leboga wena Morena Modimo Ramaatlaohle, Mobagona, Mohwetšwaalegona, ge o tšere maatla a magolo a gago wa buša.

18Bantle ba galefile, gwa tla bogale bja gago, gwa tla lebaka la bahu la go ahlolwa, la go fa bahlanka ba gago moputsso, re ra baporofeta bago ba bakgethwa, le ba boifago ina la gago, ba banyane le ba bagolo; ke lebaka la go senya basenyalefase.

19Ya ba gona go bulwago Ntlokgethwa ya Modimo kua legodimong, gwa bonala Polokelo ya Kgwerano ya gagwe moo Ntlongkgethwa ya gagwe.

20Gwa tšwelela magadima le mekgoši le medumo le ditšhišinyego le sefako se segolo.

← Chapter 10 Jump to: Chapter 12 →