Revelation 14

Sotho 1951 (BIBELE)

← Chapter 13 Jump to: Chapter 15 →

1Ke sa lebeletše ka bona Kwana e eme thabeng ya Sione, e na le ba dikete tše lekgolo le nago le masome a mane a metšo e mene, bao diphatleng tša bona ba swailwego ka leina la yena Kwana le la Tatagwe.

2Ka kwa modumo o tšwago legodimong o swana le modumo wa meetse a magolo le modumo o mogolo wa pula. Le gona modumo woo ke o kwelego o be o swana le wa baletši ba ba letšago diletšo tša bona.

3Ba opela sefela se sefsa pele ga sedulo sa bogoši, le pele ga diphedi tšela, le pele ga bagolo bala. Gomme go be go se motho e a kgonago go ithuta sefela seo ge e se bao ba dikete tše lekgolo le nago le masome a mane a metšo e mene, ba ba rekolotšwego lefaseng.

4Ke bona ba ba sa kago ba itšhilafatša ka basadi; ke dikgarebe. Ke bona ba ba latelago Kwana mo e yago. Ke bona ba ba rekolotšwego bathong, ya ba dithakangwaga tša Modimo le tša Kwana.

5Le gona, melomong ya bona ga gwa ka gwa hwetšwa maaka; ga ba na bosodi ba le fao pele ga sedulo sa Modimo sa bogoši.

6Ka bona morongwa e mongwe a fofa gare ga legodimo a swere Ebangedi ya neng le neng ya go tsebišwa ba ba agilego lefaseng, ditšhaba tšohle le meloko yohle, le maleme ohle le merafo yohle;

7a bolela ka lentšu le legolo, a re: Boifang Modimo le rete yena, gobane nako ya kahlolo ya gagwe e tlile, le khunamele yena e a dirilego legodimo le lefase le lewatle le didiba tša meetse.

8Gwa latela morongwa e mongwe wa bobedi, a re: O wele! O wele! Motse o mogolo wa Babele, wa go noša tšhaba tšohle sebela sa kgalefo ya bootswa bja wona!

9Gwa latela morongwa e mongwe wa bararo, a hlaboša lentšu a re: Motho e a kago lotšha sebata le seswantšho sa sona, a dumela go swaiwa phatleng ya gagwe le seatleng sa gagwe,

10yena o tlo nošwa sebela sa kgalefo ya Modimo, se se sa timolwago ge se tšhelwa senwelong sa bogale bja gagwe; mme o tlo hlokofatšwa mollong wa tshebela pele ga barongwa ba bakgethwa le pele ga Kwana.

11Mme muši wa tlhokofatšo ya bona o rotoga go iša mehleng ya neng le neng; ba sa khutše mosegare le bošego, bona bao ba go lotšha sebata le seswantšho sa sona, le ba go swaiwa ka leina la sona.

12Ke mo go nyakago kgotlelelo ya bakgethwa ba go gomarela melao ya Modimo le go dumela Jesu.

13Ka kwa lentšu le etšwa legodimong le re: Ngwala o re: Ba lehlogonolo ke bahu ba hwilego ba le Moreneng go tloga bjalo. Moya o re: E, a ba yo khutša ditapišo tša bona, gobane mediro ya bona e a ba latela.

14Ke sa lebeletše ka bona leru le lešweu. Godimo ga lona go dutše yo e kego ke Morwamotho, a rwele mofapahlogo wa gauta hlogong, a swere legwetla le le bogale ka seatla.

15E mongwe morongwa a tšwa Ntlongkgethwa, a hlaboša lentšu a re: Tsenya legwetla la gago o bune, gobane lebaka la go buna le tlile; mabele a lefase a omile!

16E a dutšego godimo ga leru a tsenya legwetla la gagwe lefaseng, lefase la bunwa.

17Ntlongkgethwa ya legodimong gwa tšwa e mongwe morongwa, le yena a swere legwetla le le bogale.

18E mongwe morongwa a tšwa moo Ntlongkgethwa a na le maatla a go buša mollo; a hlaboša lentšu a goeletša, a bolela le eo a swerego legwetla a re: Tsenya legwetla le le bogale la gago, o sege thara tša morara wa lefase, gobane ditholwana tša wona di budule.

19Morongwa eo a akgela legwetla la gagwe lefaseng, a buna morara wa lefase, nkgwa a di lahlela bofotlelong bjo bogolo bja bogale bja Modimo.

20Gwa fotlwa moo bofotlelong ka ntle ga motse, bofotlelong gwa tšwa madi, a tlala a goma ka megala ya dipitsi, a ela a fetša tsela ya mašemo a sekete se nago le makgolo a selelago.

← Chapter 13 Jump to: Chapter 15 →