Revelation 7

Sotho 1951 (BIBELE)

← Chapter 6 Jump to: Chapter 8 →

1Ya ba gona ke bonago Barongwa ba bane ba eme dikhutlong tše nne tša lefase, ba thibetše diphefo tše nne tša lefase, gore lefaseng le lewatleng le dihlareng tšohle go se foke phefo.

2Ka bona go rotoga Morongwa e mongwe a etšwa Bohlabela, a swere leswao la Modimo wa go phela; a hlaboša lentšu wa mokgoši a bolela le Barongwa bao ba bane ba ba beilwego gore ba senye lefase le lewatle,

3A re: Se senyeng lefase le lewatle le dihlare, re thome go swaya bahlanka ba Modimo diphatleng tša bona!

4Ka kwa palo ya ba ba swailwego e le dikete tše lekgolo le nago le masome a mane a metšo e mene, dikete tša ba ba swailwego e le ba meloko ya Baisiraele.

5Baswaiwa ba moloko wa Juda e be e le ba dikete tše lesome la metšo e mebedi; ba moloko wa Rubene e be e le ba dikete tše lesome la metšo e mebedi; ba moloko wa Gada e be e le ba dikete tše lesome la metšo e mebedi;

6ba moloko wa Asere e be e le ba dikete tše lesome la metšo e mebedi; ba moloko wa Nafutali e be e le ba dikete tše lesome la metšo e mebedi; ba moloko wa Manase e be e le ba dikete tše lesome la metšo e mebedi;

7ba moloko wa Simeone e be e le ba dikete tše lesome la metšo e mebedi; ba moloko wa Lefi e be e le ba dikete tše lesome la metšo e mebedi; ba moloko wa Isašara e be e le ba dikete tše lesome la metšo e mebedi;

8Ba moloko wa Sebulone e be e le ba dikete tše lesome la metšo e mebedi; ba moloko wa Josefa e be e le ba dikete tše lesome la metšo e mebedi; ba moloko wa Benyamini e be e le ba dikete tše lesome la metšo e mebedi.

9Ka buša ka ba le pono, ka bona lešaba le legolo la batho ba go sego motho e a kgonago go ba bala, ba ditšhaba ka moka, le meloko ka moka, le merafo ka moka, le maleme ka moka; ka bona ba eme pele ga sedulo sa bogoši sa Kwana, ba apere kobo tše ditšhweu, ba swere mahlare a molala ka diatla tša bona;

10ba hlaboša mantšu gagolo ba re: Go phološa ke ga Modimo wa rena e a dutšego sedulong sa bogoši, ke ga Kwana.

11Mme Barongwa ka moka ba bego ba eme ba dikaneditše sedulo sa bogoši, le bagolo le diphedi tšela tše nne, ba khunama ba inamiša difahlogo pele ga Modimo.

12Ba re: Amene! Theto le letago le bohlale, le tebogo le tumišo, le maatla le go kgona, ke tša Modimo wa rena go iša mehleng ya neng le neng. Amene!

13E mongwe wa bagolo a mpotšiša a re: Bao ba aperego dikobo tše ditšhweu ke bomang? Ba tšwa kae?

14Nna ka fetola ka re: Morena, go tseba wena! -- Yena a re: Ke bona ba ba tšwago tlaišegong e kgolo; ba hlatswitše mašela a bona ba a tagafatša mading a Kwana.

15Ke gona ba lego pele ga sedulo sa bogoši sa Modimo, mme ba mo hlankela mosegare le bošego ba le Ntlong e kgethwa ya gagwe. Mme yena a dutšego sedulong sa bogoši o tlo ba khutiša Ngwakong wa gagwe.

16Ba ka se ke ba hlwa ba eba le tlala le ge e le lenyora. Ba ka se ke ba hlwa ba welwa ke letšatši le phišo e nngwe,

17Ka gobane Kwana e lego gare ga sedulo sa bogoši, e tlo ba diša; e tlo ba iša didibeng tša meetse a bophelo; mme Modimo o tlo phumola megokgo ka moka mahlong a bona.

← Chapter 6 Jump to: Chapter 8 →