Revelation 18

Sotho 1951 (BIBELE)

← Chapter 17 Jump to: Chapter 19 →

1Ya ba gona ke bonago morongwa e mongwe a fologa legodimong, a na le maatla a magolo; lefase la edišwa ke letago la gagwe.

2A hlaboša lentšu a hlaba mokgoši o mogolo, a re: O wile! O wile! Motse o mogolo wa Babele. O fetogile bodulo bja diriti, le segola sa meoya yohle ya ditšhila, le segola sa manong a ditšhila a ilwago.

3Gobane ditšhaba ka moka di nwele sebela se bogale sa bootswa bja wona; mme dikgoši tša lefase di otswitše le wona; babapatši ba lefase ba humile ka boati bja maipshino a wona.

4Ka kwa lentšu le lengwe le etšwa legodimong le re: Khudugang, lena ba setšhaba sa ka, gore le se tlo gwerana le dibe tša motse woo, la tlo welwa ke kotlo tša wona.

5Gobane dibe tša wona di fihla godimong, mme Modimo o gopola makgopo a wona.

6O direng se o le dirilego sona; mediro ya wona le e lefetše gabedi; mokgopu woo a bego a o tšhela dihlare, le o tšhelele gabedi.

7Ka mo o bego o ikgantšha o ipshina, le o lekanyetše thlokofatšo le tlaišo; gobane mo pelong ya wona o re: Ke ituletše ke le kgoši ga ke mohlologadi; nka se ke ka bona tlhokofalo.

8Molato ke wona woo ge kotlo di o tlela ka tšatši le tee, e le dinkhu le tlhokofalo le tlala, ge o tšhungwa ka mollo; gobane Modimo e a o sekišago ke yo maatla.

9Ge e le dikgoši tšela tša go otswa le wona, tša go ipshina le wona, di tlo o llela tša itshetla ge di bona mokubego o tšhumilwe.

10Di tlo o ema kgole di boifa go hlokofatšwa ga wona. Di tlo re: Joo! Joo! Motse o mogolo wa Babele! Motse wo o tiilego! O wetšwe ke kotlo ka nako e tee!

11Le babapatši ba lefase ba a o llela, ba o hlokofalela ka ge dithoto tša bona di sa hlwe di rekwa ke motho.

12Še merwalo ya gauta le ya silifera, le ditalama le dipheta, le mašela a leokodi le a moretele, le a mmala o mohubedu, le diphata tšohle tša monko o bose, le dibjana tšohle tša naka la tlou, le dibja tšohle tša kwata tše bohlokwa, le tša mphiri, le tša tshipi, le tša mabje a go setwa,

13le dinoko, le diorelo, le ditlolo le moti wa dihlare, le sebela, le makhura, le maupi, le mabele, le dikgomo, le dihuswa, le dipitsi, le dikoloi, le mebele ya mathopša, le meoya ya batho.

14Le dienywa tša lehlabula tše pelo ya gago e di kganyogago, di go tlogile; le tša maipshino, le tša boitšhepi, di go timeletše. O ka se hlwe o di hwetša.

15Babapatši ba dilo tšeo, ba ba bego ba huma ka motse woo, ba tlo o emela kgole ba boifa tlhokofatšo ya wona, ba lla ba itshetla,

16Ba re: Joo! Joo! Motse o mogolo wola, wo o bego o apara leokodi la bohlokwa, le purapura le moretele, wo o bego o tšhepha ka gauta, o bego o apara ditalama le dipheta! Mahumo a makaakao a fedišitšwe ka nako e tee!

17Basepediši bohle ba maselawatle, le lešaba la baeti ba ona, le ba go a hlankela, le ba go šika le mawatle, ba o emela kgole,

18ba hlaboša mantšu ge ba bona muši wa ge o e swa, ba re: Ke ofe motse o kakago motse o mogolo woo!

19Ba itšhela pilo dihlogong, ba golola ba lla ba hlokofetše ba re: Joo! Joo! Motse wola o mogolo, wo bohle ba ba nago le maselawatle ba bego ba huma ka wona, o phušotšwe ka nako e tee!

20Wena legodimo le lena bakgethwa, hlalalang, le lena baapostola le lena baporofeta, hlalalang, gobane Modimo o le ahloletše tshekong ya lena, a lahla motse woo.

21Morongwa e mongwe wa maatla a topa leswika le e kego ke la tšhilo a le lahlela lewatleng, a re: So mokgwa wo motse o mogolo wa Babele o tlogo lahlwa ka wona wa kodumela fase, wa se hlwe o hwetšwa,

22go se hlwe go kwala lentšu la baopedi le baletši ba diletšo le ba dinaka le ba diphalafala; go se hlwe go hwetšwa makgone wa modiro ofe le ofe; le tšhilo e šilago e ka se hlwe e kowa mo go wena.

23Le seetša sa lebone se ka se hlwe se bonega mo go wena; go ka se hlwe go kowa lentšu la monyalwa le la monyadi; gobane babapatši ba gago e be e le bona ba bagolo ba lefase, mme wena wa timetša batho ka malea a gago.

24Motseng woo ke mo go hweditšwego madi a baporofeta le a bakgethwa e le a mantši, le a bohle ba ba bolailwego mo lefaseng.

← Chapter 17 Jump to: Chapter 19 →