Revelation 9

Sotho 1951 (BIBELE)

← Chapter 8 Jump to: Chapter 10 →

1Morongwa wa bohlano a letša phalafala; mme ka bona naledi ya magodimong e wetše lefaseng, ya newa sekgonyo sa legaga le le išago sekoting.

2Ya bula legaga leo la go iša sekoting, mme gwa rotoga mokubego wa mollo o mogolo; letšatši le sebaka sa godimo tša fifatšwa ke muši wa sekoting.

3Mušing woo gwa tšwa ditšie, tša wela lefase di neilwe maatla a e kego ke a diphepheng tša lefaseng.

4Ditšie tša botšwa gore di se ke tša senya bjang bja naga, le ge e le tše tala, le ge e le dihlare; di hlokofatše batho bao ba se nago leswao la Modimo mo diphatleng tša bona.

5Tša laelwa gore di se ke tša ba bolaya, di ba hlokofatše kgwedi tše tlhano. Gomme bohloko bja tšona bja swana le bja phepheng ge e lomile motho.

6Mehleng yeo batho, lehu ba tlo le nyaka ba se le hwetše; ba tlo lla go hwa, mme lehu le tlo ba tšhaba.

7Gomme sebopego sa ditšie tšeo se swana le sa dipitsi tše di hlamilwego ka tša ntwa; dihlogong tša tšona e ka di rwele mefapahlogo ya gauta; difahlogo tša tšona di swana le difahlogo tša batho.

8Di na le moriri o swanago le boditsi; mme meno a tšona a bjalo ka a ditau.

9Di phema dihuba ka dimphaphathi e kego ke tša tshipi; mme modumo wa diphego tša tšona e ke modumo wa makoloi a dipitsi tše di ntši ge a kganyelela go hlabana.

10Di na le mesela e kego ke ya diphepheng e na le mabola; mme maatla a go hlokofatša batho kgwedi tše tlhano a mo meseleng ya tšona.

11Di ba le kgoši ya go buša, ke Morongwa wa sekoting. Leina la gagwe ka Sehebere ke Abadoni, ka Segagešo ke Mosenyaki.

12Tša “Jo” ya pele di fedile; tsebang gore go se tla tša “Joo” tše dingwe tše pedi.

13Morongwa wa go selela a letša phalafala, ka kwa lentšu le le tšwago dinakeng tše nne tša aletare ya gauta e lego pele ga Modimo.

14Lentšu leo la bolela le Morongwa wa go selela e a swerego phalafala, la re: Hunolla Barongwa ba bane bao ke ba tlemilego nokeng e kgolo ya Eforate.

15Barongwa ba bane bao ba hunollwa; ba be ba itokišeditše nako ya letšatši le kgwedi ya ngwaga, lebaka la gore ba bolaye karolo ya boraro ya batho.

16Palo ya dira tša banamedi ba dipitsi e be e le diketekete tše makgolo a mabedi; palo yeo ya bona ke e kwile.

17Mo ponong dipitsi tšeo ke di bone ka mokgwa wo, di na le banamedi ba tšona ba nago le diphemo tša dihuba tša mmala wa mollo, le o motala, le o mosehla. Dihlogo tša dipitsi di swana le tša ditau; mo maganong a tšona go tšwa mollo le muši le tshebela.

18Ka kotlo tše tharo tše gwa bolawa karolo ya boraro ya batho ka mollo le ka muši le ka tshebela e tšwago maganong a tšona.

19Gobane maatla a dipitsi tšeo a maganong a tšona le meseleng ya tšona; gobane mesela ya tšona e bjalo ka dinoga, e na le dihlogo tša go hlokofatša ka tšona.

20Gomme batho ba ba šaletšego, ba ba sa kago ba bolawa dikotlong tšeo, ga ba ka ba sokologa ba lahla mediro ya diatla tša bona, ga ba ka ba lesa go khunamela meoya e mebe le medimo ya diswantšho tša gauta le tša silifera le tša tshipi le tša mabje le tša kwata, medimo yeo e sa kgonego go bona, le go kwa, le go sepela.

21Ga ba ka ba sokologa ba lahla dipolao le boloi le bootswa le bohodu.

← Chapter 8 Jump to: Chapter 10 →