Revelation 4

Sotho 1951 (BIBELE)

← Chapter 3 Jump to: Chapter 5 →

1Ka buša ka tlelwa ke pono, ka bona mojako o bulwa legodimong; gwa bolela lentšu lela la pele le ke le kwelego le gala boka phalafala, le re: Rotogela fano ke go bontšhe tše di tlogo direga mehleng e tlago.

2Ka ya le Moya ka napa ka bona sedulo sa bogoši se beilwe legodimong, se na le e a dutšego go sona.

3E a bego a dutše moo, motho ge a mmona, o be a phadima boka talama e tšhweu e nago le mollo; sedulo sa gagwe se be se dikologilwe ke molalatladi wo ge motho a o bona, a re ke talama e tala.

4Sedulo sa bogoši se be se dikaneditšwe ke didulo tše masome a mabedi a metšo e mene; mo go tšona go dutše bagolo ba masome a mabedi a metšo e mene ba ba bego ba apere diaparo tše ditshweu, dihlogong ba rwele mefapahlogo ya gauta.

5Mo sedulong sa bogoši go be go etšwa magadima le mekgoši le medumo; mo pele ga sona go be go tuka mello ya dipone tše šupago, e lego Meoya e šupaga ya Modimo.

6Mo pele ga sedulo sa bogoši go be go le bjalo ka bodiba bjo bo bonatšago boka legakabje. Mo gare ga sedulo le mo mathokong a sona go be go le diphedi tše nne tše di tletšego mahlo ka pele le ka morago.

7Sephedi sa pele se be se swana le tau; sa bobedi se be se swana le namane; sa boraro se be se na le sefahlogo sa motho; sa bone se be se swana le lenong le le fofago.

8Se sengwe le se sengwe sa diphedi tše nne tšeo se be se na le diphego tše di selelago di tletšego mahlo mo go fela le ka gare. Di be di sa khutše mosegare le bošego, di fela di re: Mokgethwa, Mokgethwa, Mokgethwa ke Morena Modimo, Ramaatla ohle, Mobagona wa mehleng ya kgale le ya bjale le e tlago.

9Ya re ge diphedi di reta di re: Letago le theto le tebogo di swanetše eo a dutšego sedulong sa bogoši wa go phela go iša mehleng ya neng le neng,

10ke ge bagolo bao ba masome a mabedi a metšo e mene ba lotšha eo a dutšego sedulong sa bogoši, ba khunamela eo wa go phela go iša mehleng ya neng le neng; ba bea mefapahlogo ya bona fase pele ga sedulo sa bogoši, ba re:

11E a swanetšwego ke letago le theto le maatla ke wena Morena Modimo wa rena, gobane ke wena o hlodilego dilo tše; ge di tšwelela di hlolegile, ke ka gobane o ratile fao.

← Chapter 3 Jump to: Chapter 5 →