Ecclesiastes 12

Sukuma 2019

← Chapter 11 Jump to:

1Ng'wizūkagwe ū Mūmbi wako ū mu shikū ja būsūmba wako, aho jitaalī kūshika shikū mbi, ītaalī kūkūpandīka myaka ya kūyūhaya na gīkī, “Ī haha natūbūlūmbaga ū būpanga.”

2Aho giiti shitaalī kūkūshīkīja ū kū līīmi nī lisana, nū ng'weji, n'isonda; na malunde gataalī kūshoka hanuma ya mbula kūgata;

3ū lūshikū ūlo balang'hani ba kaya bakūyūdetema, bagosha ba makaya kwinama; na bashi kwinogolelwa nguno balī bagehu no, lwa kwītīlwa wiija abo bakasūūlīlaga mu ng'hengeleji;

4lūshikū lwa kūlugalwa milyango kūja kwipanda, lwa kūdooha ng'hilimo gwa mawe ga kūsheela, banhū kwibakījiwa mu tūlo kūlwa malaka ga noni jilīmba, lwa banhū kwīmba bachoomeelile;

5lūshikū lwa banhū kogoha mihayo ya kū migūngūli, na kūdetema kūlwa kogoha makanji ga mu nzīla; lūshikū lwa ntī gwa mulozi kūlaba būlabo waago, lwa ng'hūmbī kwigwesa hasī dūhū, būzalabanu bose boshīlaga; nguno ū munhū alī mu lūgendo lwa kūja kū nzengo gwakwe gwa shikū jose, a mapanda gookalaga balīji ba ng'hūngū, bakwilibanhyaga kūnū na kūnū.

6Ng'wizūkagwe aho ngufu gwa feza gūtaalī kūtīnwa, nūūlū ī libbakuli lya zahabu lītaalī kūbelwa, aho lūnò lūtaalī kūbelelwa kū lwinzī; nūūlū idandali kūbīnzīkīla kwilambo,

7nū lūbuubu lūtaalī kūshoka hasī aho lwikalaga na kale, nū moyo gūtaalī kūnshokela Mulungu ūyo wagūbeeja.

8Ū Nomeeji alīhaya, “Ndūhū ngofyoolo! Ndūhū ngofyoolo gete; būlī mhayo gūtī na ngofyoolo!”

9Nīyo ū Nomeeji walī atagelelile kūbiza na masala dūhū, alīyo na a banhū wabalangaga na kūbinha būmani; walī ng'wideedeng'hanya na mani wa kūgīsīlīja mihayo, nose walī wandīka sumo ningī, ūjihela mu būgaliili būtaale.

10Ū Nomeeji wīkulaga mu būgoogo ī mihayo apandīke īyo yigeleelilwe; hūna lūūlū īyo wīyandīka ītūngīlīgije hangī ya ng'hana.

11Ī mihayo ya banhū ba masala ītikīlile na someke, ī sumo jabo bakajipandīkaga kūfuma kūlī Ndīīmi ūmò; jibange gītī mizumali īkomilwe hanhū yūdaama.

12Alilūūlū ng'wanone, ilang'hanage nayo ī mihayo ya kūkīla ho a henaho. Nguno ū wandīki wa shitabo būtī na būkalīkīle, hama nī lisoma līkagūnojaga ū mīlī.

13Ī haha pyī yamalaga kwigwiwa, ū būkalīkījo wa mihayo būlī gīkī, Ng'ogohage Mulungu, nī shilagīlo shakwe ūshidime, ū gwenūyū hū nīmo ntaale, ūyo gūng'wigeleelilwe ū munhū.

14Nguno ū Mulungu akūshitūūla h'ilamulīlo pyī ī shītīle; nī mihayo ī yose īyo īlī mu mbisīla, n'ībizage misoga nūūlū mibi.

← Chapter 11 Jump to: