bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sukuma
/
Sukuma 2019
/
Ecclesiastes 7
Ecclesiastes 7
Sukuma 2019
← Chapter 6
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 8 →
1
Ū lūkumo ū lūsoga lūlī lwawiza kūtinda maguta ga kūnung'ha chiza, nū lūshikū lwa kūcha nalo lūlūheebile ū lwa kubyalwa.
2
Īlī hambū hambū kūja ha kaya īkūlīlaga ng'hūngū, kūtinda kūja ha kaya īlī mu shigukulu sha būyegi. Nguno ū lūfu h'ī ngelelo ya banhū bose, hūna lūūlū būlī mpanga shing'wigeleelilwe alwidedeeng'hanye ū mu ng'holò yakwe.
3
Ū būpīna būsoga kūtinda seko, nguno ū būpīna wa būshū būkīgunanhaga ī ng'holò.
4
Ī ng'holò ya ntengeke īkabizaga hamò nī kaya ījo jilī mu mayanga, alīyo ī ng'holò ya mbūūlī īlolelile mu kaya ja basabi.
5
Īlī hambū hambū kwigwa būhūgūji wa munhū wa masala, kūtinda kūdegeleka mīmbo ga babbūūlī.
6
Ūmo moto gwa samang'ombe gūkataamagūkīlaga mu liiko, h'ūmo jilī nī seko ja babbūūlī. Ū gwenūyū nago gūtī na ngofyoolo.
7
Ū wiboneeji būkabbūūlīhyaga nūūlū munhū wa masala, nū būhongi būkasosohajaga ng'holò.
8
Hambū hambū kwībona ī ng'halīlo ya mhayo hū ūyege, kūtinda kūgūyegela ha wandījo wago. Ū būshisha ng'holò būlī wawiza kūtinda wikumīlīja.
9
Yaya kūbiza na moyo ng'wangū kūpelana, nguno ū būpelanu būkikalaga mu shikuba sha bachilū.
10
Lekaga ū kūhaya gīkī, “Nibūlī ī shikū ja kale jalī jawiza kūtinda ī ja haha?” Nguno ū būngaya masala hū būlī na mabūjo galī gīko.
11
A masala gatikīlile na sabo ya wingīji, galī na solobo ū kū bapanga.
12
A masala galī na būlang'hani gīt'ūmo hela jikalang'hanīlaga, alīyo ū gwawiza ūyo shiigelile kūgūmana gūlī gīkī, A masala gakabūlang'hanaga ū būpanga bokwe ūyo alī nago.
13
Yideedeng'hanyage īyo wīyīta ū Mulungu: Nani ūyo adūgije kwīgoloola īyo wīyīta yigomile?
14
Ū mu lūshikū lwa kūgwasha yegaga, alīyo ū mu lūshikū lwa kūzumalwa iganikage chiza. Ū Mulungu h'ūyo ayīhelile ī ya lūshikū ūlū nī ya lūshikū ū lūngī, nose ū munhū atūdūla kūmana īyo īlilonge a hanuma yakwe.
15
Ū mu būlamu bone ūbo būtī na ngofyoolo ūbū nakwījaga ī ya kūbona: Naabīta kūbona gīkī na a batūngīlīja bakabūlagagwa nūūlū īkī batūngīlīja, alīyo ū ng'hūnga h'ūyo akalamaga shikū ningī hamò na būbi bokwe.
16
Ūtizibona gīkī ūlī ntūngīlīja ntaale no, nūūlū ūtiziyīta kūbiza na masala no kūkīlanīja. Nibūlī wikenaagūle bebe ng'wenekīlī?
17
Ūtizūjangīīla no ū mu būbi, hangī ūtizūbiza mbūūlī; nibūlī nose wiyenheleje kūcha ikanza lyako lītaalī kūshika.
18
Īkūkūbeelela ūlū ūgūdima ūyū nū gūngī yaya ū kūgūlekela, nguno ū munhū ūyo ang'ogohile Mulungu adūgije kwīshikīlīja ī yose būbīlī wayo.
19
A masala gadūgije kūng'wīta munhū ūmò kūbiza na būdūla būtaale kūtinda basugi nūūlū ikūmi ba mu nzengo gose gose.
20
Ū mu sī atīho munhū ntūngīlīja wa kwīta ītūngīlīgije gwa, ūyo atīītaga shibi nūūlū kamò.
21
Yaya ū kwikala ūkūdegelekaga būlī gwene ūyo gūkūhayiagwa na banhū, nose ūtizūng'wigwa na ntūmami wako akūkūsondagūlaga.
22
Nguno nang'ho ūmanile ū mu ng'holò yako ī gīkī nū bebe ng'wenekīlī ng'hangala ningī ūkabasondagūlaga a bangī.
23
Pyī ī yenīyī naabīta ū kwīgema bo kūtūmamīla masala; hūna niwīla gīkī, “Ī gete nabize munhū wa masala,” gwike nakagūlebeja ū gwenūyū.
24
Ū mhayo gwenūyū gūlī kūle no; kūle kū shimu, nīyo gwibisile yī, nani ūyo adūgije kūgūkulūla?
25
A maganiko gane nūgagalūkīja kū būmani, nūgīsīlīja nakūkoobaga nagamane a masala nū mumo īlī gete ī mihayo, nawitegeleje nū būbi wa mihayo ya malofu, nū būchilū bo lūtūgà.
26
Naabonile mhayo mi kūtinda icha, ū nkīma akikalaga ategile gītī lūtu, ī ng'holò yakwe ībangile gītī ntego, hama a makono gakwe gakabohyaga gītī mbohyo ja chūma. Ūyo ang'ogohile Mulungu hū ng'wene akampūlūgūkaga ū nkīma ng'wenūyo, alīyo a ba shibi bene bagwashiwe dūhū.
27
Ū Nomeeji alīhaya gīkī, “Bing'we ū nene naakulūlile gūūyū: Aho nīsangūlīla ī mihayo gīkī nagūbone ū gwa ngadūle,
28
kūnū nataalī nakūgīsīlījaga na kūmanagūlola lola, ū mu banhū shihūmbī shimò nūbona ngosha ūmò wa nhūngwa ngololoku, alīyo ū mu bose benabo natabonile nkīma nūūlū ūmò.”
29
Hūna lūūlū gūūyū ū ntaale ūyo naagūkulūlile; gīkī, ū Mulungu wababeeja a banhū batūngīlīja, gwike a boyi dūhū bakagolong'hanyaga bakūkoobaga yabo benekīlī.
← Chapter 6
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 8 →
All chapters:
1
2
3
4
5
6
7
8
9
10
11
12