Ecclesiastes 9

Sukuma 2019

← Chapter 8 Jump to: Chapter 10 →

1Hūna lūūlū, pyī ī yenīyī nakītūūla mu ng'holò yane; aho nīyideedeng'hanya nūbona gīkī a batūngīlīja na a bamasala balī mu nkono go ng'wa Mulungu, pyī nī yīyo bakīyītaga; alīyo atīho ūyo amanile īsho shinindīīlile, būbize būtogwa nūūlū būsaayīlwa.

2Nguno a bose ī mihayo ībalindīīlile mu būlenganīja; babize batūngīlīja, nūūlū babūbi, bawiza nūūlū beela, nūūlū basoso; abo bakafunyaga shitambò, na a babo batashifunyaga. Ūmo īlī ū kūlī munhū wawiza, Īlī gīko nū kūlī wa shibi; ūmo īlī kū banhū abo bakilahīlaga, Īlī gīko nū kūbo abo bogohile kwilahīla.

3Ū mu yose īyo īkūtūmamagwa ha sīlīlī ya līīmi, ū gwabūbi gete gūlī gīkī, ī mihayo īlī mu būlenganīja kū banhū bose. Nīyo nī ng'holò ja banhū jokalile ya malofu no, hama aho bataalī mu shikū ja būpanga wabo lūlīmo lūtūgà ū mu ng'holò jabo; alīyo a ha numa ya henaho bakajaga kū bafu baakisanja kwenūko.

4Gwike būlī ng'wene ūyo ataalī hamò na bapanga, alī na kwisagīlwa, nguno hambū hambū nūūlū ī mvwa ī mhanga, kūtinda shimba īchile.

5Nguno a bapanga bamanile gīkī bakūcha, alīyo a bafu batamanile shose shose; batī na mheela yīngī yose yose, nīyo baamala kwīwa.

6Ū būtogwa wabo nū kūkolwa kwabo, nū wilu wabo, pye shajimīīla kale; batī na gwa kwīta hangī ū mu yose Īyo īkīītagwa ha sīlīlī yī līīmi.

7Jaaga nayo īyo ūkīyītaga nakale, lyaga ī shilīwa shako ūshilūmbe, nī divai ng'waga na ng'holò nyegu; nguno ū Mulungu ayīyegelile īyo ūkwītaga.

8Būlī lūshikū zwalaga shizwalo shifulile sheela pe, nū ntwe gwako ūgūchaaje tūguta twawiza.

9Būyegelage ū būpanga wako pyī ī shikū ja būlamu ūbo būtī na solobo wenūbū, ūbo Mulungu akūgabīlile ha sīlīlī ya līīmi; yegaga hamò nū nke wako ūyo ūntogilwe; nguno ū gwenūyo h'ū ngabo gwako ū mu būpanga wako, nū mu milīmo midito īyo ūkītūmamaga ha sīlīlī ya līīmi.

10Ū nkono gwako ūlū gūpandīka shose shose sha kwīta, ītaga na būdūla wako bose, nguno ū kūlimu ūko ūjile ītīko milīmo; ndūhū nūūlū maganiko ga mbika yose yose, nūūlū būmani, nūūlū masala.

11Hama naabonile na gūngī hangī a ha sīlīlī ya līīmi, gashi ī liishiga bo nhambo lītī lya bapeeji dūhū, nū mu būlūgū batapyenaga ba nguzu, nūūlū ī shilīwa batapandīkaga ba masala dūhū, nū būsabi būtabisongaga ba masala, nūūlū ū kūyegelwa na banhū kūtalondeelaga balangilwe; alīyo pye a banhū batikīlile, bose pye balī nalyo ī likanza, nū ng'wanya gwa kūpandīka gūkabizīīlaga a bose.

12Nguno nīyo a higūlya ya yenīyo, atīho ūyo alīmanile ī likanza lyakwe: Īlī gīt'ūmo ndīlo jikagwasījiagwa mu mitego mibi jitamanile, nūūlū noni ūmo jikapugījiagwa mu lūtu; na a banhū nabo gakabizīīlaga a makanza a mabi, yabitaligīnja mihayo mu būtūmana.

13Naabonile mhayo gūngī gwa koolecha masala a ha sīlīlī ya līīmi, gūniyeja no ū nene.

14Gwalīho nzengo ndoololo, gwa banhū bagehu dūhū; kwimanīla ntemi wa nguzu wiza kūgūdumīla, ūkoma ng'hambī ja kūgūpīndīlīja.

15Alīyo ū mu mzengo gwenūyo walīmo munhū wa masala, gwike walī ng'habī; ū munhū ng'wenūyo akagūpīja ū nzengo gwenūyo kūlwa masala gakwe. Alīyo atilongile ose ose wa kūng'wizūkwa ū ng'habī ng'wenūyo.

16Ū nene nūhaya, “A masala gajitindile ī nguzu.” Gwike a masala ga munhū ng'habī gadalahilwe, nī mihayo yakwe ītadīlīlagwa.

17Ī mihayo ya munhū wa masala īkadegelekagwa mu būlembeezu, kūtinda hūhūyū ya nsugi wa babbūūlī.

18A masala masoga no kūtinda shilanga sha būlūgū, gwike ng'hūbi ūmò akakenaagūlaga mingī ī yawiza.

← Chapter 8 Jump to: Chapter 10 →