Acts 10

Tulu (ಪೊಸ ಒಡಂಬಡಿಕೆ)

1ಕೈಸರೆಯಡ್ ಕೊರ್ನೇಲಿಯೆ ಪನ್ಪಿನಾಯೆ ಒರಿ ಇತಾಲ್ಯದ ದಂಡ್‌ದ ಶತಾಧಿಪತಿ ಆದಿತ್ತೆ

2ಆಯೆ ತನ ಇಲ್ಲದಾಕುಲೆನ ಒಟ್ಟುಗು ದೇವೆರೆಗ್ ಪೋಡಿಯುನಾಯೆಲಾ ಭಕ್ತೆಲಾ ಆದಿತ್ತ್‌ದ್ ಜನೊಕುಲೆಗ್ ಬಾರಿ ದಾನಧರ್ಮ ಮಲ್ತೊಂದು ದೇವೆರೆಗ್ ಏಪಲಾ ಪ್ರಾರ್ಥನೆ ಮಲ್ತೊಂದಿತ್ತೆ.

3ಮಧ್ಯಾಹ್ನದ ಸುಮಾರ್ ಮೂಜಿ ಗಂಟೆಗ್ ಆಯಗ್ ಒಂಜಿ ದರ್ಶನೊಡು ಒರಿ ದೇವೆರೆ ದೂತೆ ತನ ಕೈತಲ್‌ ಬತ್ತ್‌ದ್, “ಕೊರ್ನೇಲಿಯಾ,” ಅಂದ್‌ದ್ ಲೆಪ್ಪುನೆನ್ ಸಜ್ಜಿಡ್ ತೂಯೆ.

4ಆಯೆ ಆ ದೂತನ್ ದೃಷ್ಟಿ ದೀದ್ ತೂನಗ ಪೋಡಿದ್, “ಕರ್ತವಾ, ದಾನೆ ಬೋಡು?” ಅಂದ್‌ದ್ ಕೇನ್ನಗ, ದೂತೆ ಆಯಗ್, “ನಿನ ಪ್ರಾರ್ಥನೆಲಾ ನಿನ ದಾನಧರ್ಮೊಲುಲಾ ದೇವೆರೆ ಎದುರು ನೆನೆಪುಗು ಮಿತ್ತ್ ಏರ್ದ್ಂಡ್.”

5ಇತ್ತೆ ಈ ಯೊಪ್ಪೊಗು ಜನೊಕುಲೆನ್ ಕಡಪುಡ್ದು ಪೇತ್ರೆ ಪನ್ಪಿ ಸೀಮೋನನ್ ಲೆಪ್ಪುಡಾವೊಡು.

6ಆಯೆ ಚರ್ಮದ ಬೇಲೆ ಮಲ್ಪುನ ಸೀಮೋನನ ಇಲ್ಲಡ್ ಬುಡಾರ ಮಲ್ತೊಂದುಲ್ಲೆ; ಈ ಸಿಮೋನನ ಇಲ್ಲ್ ಕಡಲ್ದ ಬರಿಟ್ಟ್ ಉಂಡು ಅಂದ್‌ದ್ ಪಂಡೆ.

7ಕೊರ್ನೇಲಿಯೆ ತನ ಒಟ್ಟುಗು ಪಾತೆರ್‌ನ ದೂತೆ ಪೋಯಿ ಬೊಕ್ಕ ತನ ಚಾಕ್ರಿದಾಕುಲೆಡ್ ಇರ್ವೆರೆನ್, ಬೊಕ್ಕ ತನ ಕೈತಲ್‌ ಏಪಲಾ ಉಪ್ಪು ಸೈನಿಕೆರೆಡ್ ಒರಿ ದೇವಭಕ್ತನ್ಲಾ ಲೆತ್ತ್‌ದ್

8ಅಕ್ಲೆಗ್ ಈ ಸಂಗತಿಲೆನ್ ಪೂರ ಬುಡ್ಪಾದ್ ಪಂಡ್ದ್ ಯೊಪ್ಪೊಗು ಕಡಪುಡಿಯೆ.

9ಮನದಾನಿ ಅಕುಲು ಪ್ರಯಾಣ ಮಲ್ತ್‌ದ್ ಆ ಊರುದ ಕೈತಲಾನಗ, ಪೇತ್ರೆ ಸಾಧಾರಣ ಮಧ್ಯಾಹ್ನದ ಪೊರ್ತುಡು ಪ್ರಾರ್ಥನೆ ಮಲ್ಪೆರೆಗಾದ್ ಉಪ್ಪರಿಗೆಗ್ ಮಿತ್ತರಿಯೆ.

10ಆಯಗ್ ಮಸ್ತ್ ಬಡವು ಆದಿತ್ತ್ಂಡ್ ವಣಸ್ ಮಲ್ಪೊಡು ಅಂದ್‌ದ್ ಎನ್ನ್‌ನಗ ವಣಸ್‌ಗ್ ತಯಾರ್ ಆವೊಂದಿತ್ತ್ಂಡ್.

11ಅಪಗ ಒಂಜಿ ದರ್ಶನ ಆಂಡ್. ಆಯೆ ಬಾನ ಜತ್ತ್‌ದ್ ನಾಲ್ ಮೂಲೆಲಿತ್ತಿ ಮಲ್ಲ ಮಂದ್ರಿದ ಲೆಕ್ಕನೆ ಇತ್ತಿ ಜೋಳಿಗೆ ಭೂಮಿದ ತಿರ್ತ್ ಬರ್ಪಿನೆನ್ ತೂಯೆ.

12ಐಟ್ಟ್ ತರತರತ ಪಶುಕುಲುಲಾ ಕಾಡ್‌ಮೃಗೊಲುಲಾ ನೆಲತ್ತ ಮಿತ್ತ್ ಪರಪುನ ಕ್ರಿಮಿಕೀಟೊಲುಲಾ ಬಾನೊಡು ರಾಪಿನ ಪಕ್ಕಿಲುಲಾ ಇತ್ತ್ಂಡ್.

13ಅಪಗ ಆಯಗ್ ಒಂಜಿ ಸ್ವರ ಕೇಂಡ್, “ಪೇತ್ರ, ಲಕ್ಕ್‌ದ್ ಕುತ್ತುದು ತಿನ್ಲ.”

14ಐಕ್ ಪೇತ್ರೆ, “ಬೊಡ್ಚಿ ಕರ್ತವ, ಯಾನ್ ಏಪಲಾ ಪೇಸಿಗೆದೆನ್ ಅಶುದ್ಧದೆನ್ ತಿಂತಿನಾಯೆ ಅತ್ತ್,” ಅಂದ್‌ದ್ ಪಂಡೆ.

15ದೇವೆರ್ ಶುದ್ಧ ಮಲ್ತಿನೆನ್ ಈ ಅಶುದ್ಧ ಅಂದ್‌ದ್ ಪನೊಡ್ಚಿ. ಕುಡ ರಡ್ಡನೆ ಸರ್ತಿ ಆಯಗ್ ಸ್ವರ ಕೇಂಡ್.

16ಇಂಚ ಮೂಜಿ ಸರ್ತಿ ಆಯಿ ಕೂಡ್ಲೆ ಆ ಜೋಳಿಗೆ ಬಾನದ ಉಲಯಿ ಸೇರ್‌ಂಡ್.

17ಪೇತ್ರೆ ತಾನ್ ತೂಯಿನ ದರ್ಶನದ ಅರ್ಥ ದಾನೆ ಆದುಪ್ಪು ಅಂದ್‌ದ್ ನೆನೆತೊಂದುಪ್ಪುನಗನೇ, ಕೊರ್ನೇಲಿಯೆ ಕಡಪುಡ್ದಿನ ಆ ನರಮಾನಿಲು ಸೀಮೋನನ ಇಲ್ಲ್ ಒವು ಅಂದ್‌ದ್ ಕೇನೊಂದು ಆ ಇಲ್ಲದ ಬಾಕಿಲ್‌ಡ್ ಉಂತಿಯೆರ್.

18“ಪೇತ್ರೆ ಪನ್ಪಿ ಸೀಮೋನು ಮುಲ್ಪ ಉಲ್ಲೆನಾ,” ಅಂದ್‌ದ್ ಲೆತ್ತ್‌ದ್ ಕೇಂಡೆರ್.

19ಪೇತ್ರೆ ಆ ದರ್ಶನದ ಸಂಗತಿಡ್ ಯೋಚನೆ ಮಲ್ತೊಂದುಪ್ಪುನಗ ದೇವೆರೆ ಆತ್ಮೆ ಆಯಗ್, “ತೂಲ, ಮೂವೆರ್ ನಿನನ್ ಕೇನೊಂದುಲ್ಲೆರ್,

20ಈ ತಿರ್ತ್ ಜತ್ತ್‌ದ್ ದಾಲಾ ಸಂಶಯ ಮಲ್ಪಂದೆ ಅಕ್ಲೆಡೊಪ್ಪ ಪೋಲ, ಯಾನೇ ಅಕ್ಲೆನ್ ಕಡಪುಡ್ದೆ,” ಅಂದ್‌ದ್ ಪಂಡೆ.

21ಪೇತ್ರೆ ತಿರ್ತ್ ಜತ್ತ್‌ದ್ ಆ ಜನೊಕುಲೆ ಕೈತಲ್‌ ಬತ್ತ್‌ದ್, “ಇಂದಾ, ನಿಕುಲು ಕೇನೊಂದುಪ್ಪುನಾಯೆ ಯಾನೇ; ನಿಕುಲು ಇಡೆಗ್ ದಾಯಗ್ ಬೈದರ್?” ಅಂದ್‌ದ್ ಕೇಂಡೆ.

22ಐಕ್ ಅಕುಲು, “ಕೊರ್ನೇಲಿಯೆ ಪನ್ಪಿ ಒರಿ ಶತಾಧಿಪತಿ ಉಲ್ಲೆ. ಆಯೆ ನೀತಿವಂತೆಲಾ ದೇವೆರೆಗ್ ಪೋಡಿಯುನಾಯೆಲಾ ಯೆಹೂದ್ಯೆರೆಡ್ದ್ ಎಡ್ಡೆ ಪುದರ್ ದೆತ್ತೊಂಡಿನಾಯೆಲಾ ಆದುಲ್ಲೆ; ನಿನನ್ ತನ ಇಲ್ಲಗ್ ಲೆಪುಡಾದ್ ಈ ಪನ್ಪಿನ ಸಂಗತಿಲೆನ್ ಕೇನೊಡು ಅಂದ್‌ದ್ ಪರಿಶುದ್ಧ ದೂತಡ್ದ್ ಆಯಗ್ ಅಪ್ಪಣೆ ಆತ್ಂಡ್,” ಅಂದ್‌ದ್ ಪಂಡೆರ್.

23ಪೇತ್ರೆ ಉಂದೆನ್ ಕೇಂಡ್ದ್ ಅಕ್ಲೆನ್ ಉಲಯಿ ಲೆತ್ತ್‌ದ್ ಉಪಚಾರ ಮಲ್ತೆ. ಮನದಾನಿ ಆಯೆ ಲಕ್ಕ್‌ದ್ ಅಕ್ಲೆನ ಒಟ್ಟುಗು ಪಿದಾಡಿಯೆ; ಯೊಪ್ಪೊಡಿತ್ತಿನ ಸಹೋದ್ರೆರೆಡ್ ಕೆಲೆವೆರ್ ಆಯನ ಒಟ್ಟುಗು ಪೋಯೆರ್.

24ಮನದಾನಿ ಆಯೆ ಕೈಸರೆಯಗ್‌ ಸೇರಿಯೆ. ಕೊರ್ನೇಲಿಯೆ ತನ ಸಂತಾನದಾಕುಲೆನ್ಲಾ ಮುಟ್ಟದ ಸ್ನೇಹಿತೆರೆನ್ಲಾ ಲೆತ್ತ್‌ದ್ ಪೇತ್ರನ್ ಕಾತೊಂದಿತ್ತೆ.

25ಪೇತ್ರೆ ಬನ್ನಗ ಕೊರ್ನೇಲಿಯೆ ಆಯನ್ ಎದುಕೊಂದು ಆಯನ ಕಾರ್‌ಗ್ ಅಡ್ಡಬೂರ್ದು ವಂದನೆ ಮಲ್ತೆ.

26ಆಂಡ ಪೇತ್ರೆ ಆಯನ್ ಲಕ್ಕಾದ್, “ಲಕ್ಕ್‌ಲ, ಯಾನ್ಲಾ ನಿನ ಲೆಕ್ಕ ಒರಿ ನರಮಾನಿ.” ಅಂದ್‌ದ್ ಪಂಡೆ.

27ಪೇತ್ರೆ ಕೊರ್ನೇಲಿಯನ ಒಟ್ಟುಗು ಪಾತೆರೊಂದು ಇಲ್ಲದ ಉಲಯಿ ಬತ್ತೆ. ಪೇತ್ರೆ ಅಲ್ಪ ಕೂಡ್ದಿನ ಜನೊಕುಲೆನ ಒಂಜಿ ಮಲ್ಲ ಗುಂಪುನು ತೂಯೆ.

28ಪೇತ್ರೆ ಅಕ್ಲೆಡ, “ಯೆಹೂದ್ಯೆರ್ ಪಿದಯಿದ ಜನೊಕುಲೆ ಒಟ್ಟುಗು ಕೂಡೊನುನವು ಅತ್ತ್‌ಡ ಅಕ್ಲೆ ಒಟ್ಟುಗು ವ್ಯವಹಾರ ಮಲ್ಪುನವು ಯೆಹೂದ್ಯೆರೆನ ಸಂಪ್ರದಾಯೊಗು ಅನ್ಯಾಯ ಆದುಂಡು ಅಂದ್‌ದ್ ನಿಕ್ಲೆಗ್ ತೆರಿದುಂಡುತ್ತಾ. ಆಂಡ ಏರೆನ್ಲಾ ಹೀನೆ ಇಜ್ಜಿಡ ಅಶುದ್ಧದಾಯೆ ಅಂದ್‌ದ್ ಪನಿಯೆರೆ ಬಲ್ಲಿ ಅಂದ್‌ದ್ ದೇವೆರೇ ಎಂಕ್ ತೋಜಾದೆ.

29ಅಂಚಾಯಿನೆಡ್ದ್ ನಿಕುಲು ಎನನ್ ಲೆತ್ತಿನಪಗ ಯಾನ್ ದಾಲಾ ಕೇನಂದೆ ಬತ್ತೆ. ಇತ್ತೆ ನಿಕುಲು ಎನನ್ ಲೆತ್ತಿನ ಉದ್ದೇಶ ದಾನೆ ಅಂದ್‌ದ್ ಎಂಕ್ ತೆರಿಪಾಲೆ.”

30ಐಕ್ ಕೊರ್ನೇಲಿಯೆ, “ಯಾನ್ ನಾಲ್ ದಿನತ ದುಂಬು ಮಧ್ಯಾಹ್ನದ ಮೂಜಿ ಗಂಟೆಗ್ ಇಲ್ಲಡ್ ಪ್ರಾರ್ಥನೆ ಮಲ್ತೊಂದುಪ್ಪುನಗ ಮಿಂಚುನ ಕುಂಟು ಪಾಡ್ದಿನ ಒರಿ ನರಮಾನಿ ಎನ ಎದುರುಡು ಉಂತುದು

31ಕೊರ್ನೇಲಿಯಾ, ‘ನಿನ ಪ್ರಾರ್ಥನೆಲಾ ನಿನ ದಾನಧರ್ಮೊಲುಲಾ ದೇವೆರೆ ಎದುರು ನೆನೆಪುಗು ಬತ್ತ್ಂಡ್.

32ಈ ಯೊಪ್ಪೊಗು ನಿನ ಜನೊಕುಲೆನ್ ಕಡಪುಡ್ದು, ಪೇತ್ರೆ ಪನ್ಪಿ ಸೀಮೋನನ್ ಲೆಪ್ಪುಡಾವೊಡು; ಆಯೆ ಚರ್ಮದ ಬೇಲೆ ಮಲ್ಪುನ ಸಿಮೋನನ ಇಲ್ಲಡ್ ಉಲ್ಲೆ; ಆ ಇಲ್ಲ್ ಕಡಲ್ದ ಬರಿಟ್ಟ್ ಉಂಡು,’ ಅಂದ್‌ದ್ ಪಂಡೆ.

33ಯಾನ್ ತಡ ಮಲ್ಪಂದೆ ನಿನ ಕೈತಲ್‌ ಜನೊಕುಲೆನ್ ಕಡಪುಡಿಯೆ. ಈ ಬತ್ತಿನ ಉಪಕಾರ ಆಂಡ್. ಇಂಚಾದುಪ್ಪುನಗ ಕರ್ತವೆ ನಿಕ್ಕ್ ಅಪ್ಪಣೆ ಕೊರ್ತಿನ ಮಾತ ಪಾತೆರೊಲೆನ್ ಕೇನುನೆಕ್ಕ್ ಎಂಕುಲು ಮಾತೆರ್ಲಾ ಇತ್ತೆ ದೇವೆರೆ ಸನ್ನಿಧಿಡ್ ಸೇರ್ದ್ ಬೈದ,” ಅಂದ್‌ದ್ ಪಂಡೆ.

34ಅಪಗ ಪೇತ್ರೆ ಬೋಧನೆ ಮಲ್ಪೆರೆ ಸುರು ಮಲ್ತ್‌ದ್ ಇಂಚ ಪಂಡೆ, “ನಿಜಾದ್ ದೇವೆರ್ ಪಕ್ಷಪಾತ ಮಲ್ಪುನಾಯೆ ಅತ್ತ್

35ವಾ ಜನಾಂಗೊಡುಲಾ ದೇವೆರೆಗ್ ಪೋಡಿದ್ ನೀತಿಡ್‌ ನಡಪುನಾಕುಲು ಆಯಗ್ ಮೆಚ್ಚಿಗೆದಾಕುಲು ಆದುಲ್ಲೆರ್, ಅಂದ್‌ದ್ ಇತ್ತೆ ಕಂಡಿತಾದ್ ಎಂಕ್ ತೆರಿದ್ ಬತ್ತ್ಂಡ್.

36ಮಾತ ಜನೊಕುಲೆಗ್ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ ದೇವೆರ್ ಸಮಾಧಾನದ ಸುವಾರ್ತೆನ್ ಪ್ರಕಟ ಮಲ್ತೊಂದು ಇಸ್ರಾಯೇಲ್ ಜನೊಕುಲೆಗ್ ಸಾರಿದೆರ್. ಈ ಸಂಗತಿಲು ನಿಕ್ಲೆಗ್ ತೆರಿದುಪ್ಪು.

37ನೀರ್‌ದ ದೀಕ್ಷಾಸ್ನಾನ ಮಲ್ತೊನೊಡು ಅಂದ್‌ದ್ ಯೋಹಾನೆ ಸಾರಿ ಬೊಕ್ಕ ಈ ದೇವೆರೆ ಪಾತೆರ ಗಲಿಲಾಯೊಡ್ದು ಸುರುವಾದ್ ಯೂದಾಯೊಡು ಹೆಚ್ಚಾಂಡ್;

38ದೇವೆರ್ ನಜರೇತ್‌ದ ಯೇಸುನು ಪರಿಶುದ್ಧಾತ್ಮೊಡ್ದುಲಾ ಬಲೊಡ್ದುಲಾ ಅಭಿಷೇಕ ಮಲ್ತೆ; ದೇವೆರ್ ಆಯ ಒಟ್ಟುಗು ಇತ್ತಿನೆಡ್ದ್ ಆಯೆ ಮಾತೆರೆಗ್ಲಾ ಎಡ್ಡೆ ಮಲ್ತೊಂದು; ಸೈತಾನನ ಬಂಧನೊಡು ಇತ್ತಿನಾಕುಲೆನ್ ಗುಣ ಮಲ್ತೊಂದು ಮಾತ ಜಾಗ್‌ಗ್ ಪೋವೊಂದಿತ್ತೆ. ಉಂದು ಮಾತ ನಿಕ್ಲೆಗ್ ಗೊತ್ತಾದುಪ್ಪು.

39ಆಯೆ ಯೆಹೂದ್ಯೆರೆನ ದೇಶೊಡ್ಲಾ ಯೆರೂಸಲೇಮುಡ್ಲಾ ಮಲ್ತಿನ ಮಾತ ಕಾರ್ಯೊಲೆಗ್ ಎಂಕುಲು ಸಾಕ್ಷಿ ಆದುಲ್ಲ. ಆಯನ್ ಮರತ ಕಂಬೊಗು ನೇಲಾದ್ ಕೆರಿಯೆರ್.

40ದೇವೆರ್ ಆಯನ್ ಮೂಜನೆ ದಿನೊಟು ಲಕ್ಕಾದ್ ಜನೊಕುಲೆಗ್ ತೋಜಿದ್ ಬರ್ಪಿಲೆಕ್ಕ ಮಲ್ತೆ;

41ಆಯೆ ಮಾತ ಜನೊಕು ತೋಜಿದ್ ಬರಂದೆ ದೇವೆರ್ ಸುರುಟ್ಟೇ ಅಜತ್ ದೆತ್ತೊಂಡಿ ಸಾಕ್ಷಿಲಾಯಿನ ಎಂಕ್ಲೆಗ್ ತೋಜಿದ್ ಬತ್ತೆ. ಆಯೆ ಸೈತಿನಾಕುಲೆ ಉಲಯಿಡ್ದ್ ಜೀವೊಡು ಲಕ್ಕ್‌ದ್ ಬತ್ತಿ ಬೊಕ್ಕ ಎಂಕುಲು ಆಯನ ಒಟ್ಟುಗು ಉಂಡುದು ಪರಿಯ.

42ಯೇಸು ಜೀವೊಡುಪ್ಪುನಾಕುಲೆಗ್ಲಾ ಸೈತಿನಾಕುಲೆಗ್ಲಾ ನ್ಯಾಯಾಧಿಪತಿ ಆದ್ ದೇವೆರೆಡ್ದ್ ನೇಮಕ ಆತಿನಾಯೆ ಪನ್ಪಿನೆನ್ ಜನೊಕುಲೆಗ್ ಸಾರಿದ್ ಸಾಕ್ಷಿ ಪನೊಡು ಅಂದ್‌ದ್ ದೇವೆರ್ ಎಂಕ್ಲೆಗ್ ಅಪ್ಪಣೆ ಕೊರ್ತೆ.

43ಆಯಡ ನಂಬಿಕೆ ದೀಪಿನ ಪ್ರತಿ ಒರಿಯಗ್ಲಾ ಆಯನ ಪುದರ್‌ಡ್ ಪಾಪೊಗು ಪರಿಹಾರ ತಿಕ್ಕುಂಡು ಅಂದ್‌ದ್ ಆಯನ ಸಂಗತಿಡ್ ಪ್ರವಾದಿಲು ಮಾತೆರ್ಲಾ ಸಾಕ್ಷಿ ಪನ್ತೆರ್ ಅಂದ್‌ದ್ ಪಂಡೆ.”

44ಪೇತ್ರೆ ಈ ಪಾತೆರೊಲೆನ್ ನನಲಾ ಪನೊಂದುಪ್ಪುನಗ ಆಯನ ಪಾತೆರೊನು ಕೇಂಡಿನಾಕುಲೆನ ಮಿತ್ತ್ ಪರಿಶುದ್ಧಾತ್ಮ ಜತ್ತ್ಂಡ್.

45ಅಕುಲು ಬೇತೆ ಬೇತೆ ಭಾಷೆಡ್ ಪಾತೆರೊಂದು ದೇವೆರೆನ್ ಪುಗರೊಂದುಪ್ಪುನೆನ್ ತೂದು ಪೇತ್ರನ ಒಟ್ಟುಗು ಬೈದಿನ ಸುನ್ನತಿದಾಕುಲು ಆದಿತ್ತಿ ನಂಬುನಾಕುಲು ಮಾತೆರ್ಲಾ ಪಿದಯಿದ ಜನೊಕುಲೆಗ್ಲಾ ಪರಿಶುದ್ಧಾತ್ಮ ಒದಗ್‌ದ್ ಬತ್ತ್ಂಡತಾ ಅಂದ್‌ದ್ ಅಚ್ಚಿರ ಆಯೆರ್.

47ನಡತಿನ ಸಂಗತಿಲೆನ್ ಪೇತ್ರೆ ತೂದು, “ನಮಲೆಕ್ಕನೆ ಪರಿಶುದ್ಧಾತ್ಮನ್ ಪಡೆದ್, ಮೊಕುಲು ನೀರ್‌ದ ದೀಕ್ಷಾಸ್ನಾನ ಪಡೆಯೆರೆ ಬಲ್ಲಿ ಅಂದ್‌ದ್ ಏರೆಗಾಂಡಲಾ ಅಡ್ಡಿ ಮಲ್ಪೊಲಿಯಾ?”

48ಅಕ್ಲೆಡ, “ನಿಕುಲು ಯೇಸು ಕ್ರಿಸ್ತ ಪುದರ್‌ಡ್ ನೀರ್‌ದ ದೀಕ್ಷಾಸ್ನಾನ ಮಲ್ಪಾವೊನೊಡು,” ಅಂದ್‌ದ್ ಅಪ್ಪಣೆ ಕೊರಿಯೆ. ಐಡ್ದ್ ಬೊಕ್ಕ ನನಲಾ ಒಂತೆ ದಿನ ಎಂಕುಲೆ ಒಟ್ಟುಗು ಉಪ್ಪೊಡು ಅಂದ್‌ದ್ ಅಕುಲು ಪೇತ್ರಡ ನಟ್ಟೊಂಡೆರ್.

← Chapter 9 Jump to: Chapter 11 →