Acts 19

Tulu (ಪೊಸ ಒಡಂಬಡಿಕೆ)

1ಅಪೊಲ್ಲೋಸೆ ಕೊರಿಂಥ್ಯೊಡು ಉಪ್ಪುನಪಗ ಪೌಲು ಮಲೆನಾಡ್‌ಡ್ಡ್ ಪ್ರಯಾಣ ಮಲ್ತ್‌ದ್ ಎಫೆಸಗ್ ಬತ್ತ್‌ದ್ ಕೆಲವು ಜನ ಶಿಷ್ಯೆರೆನ್ ತೂದು,

2ಪೌಲು ಅಕ್ಲೆಡ ಕೇಂಡೆ, “ನಿಕುಲು ನಂಬಿನಪಗ ಪರಿಶುದ್ಧಾತ್ಮ ತಿಕ್ಕ್‌ದ್ಂಡ?” ಅಕುಲು ಉತ್ತರ ಕೊರ್ದು, “ಇಜ್ಜಿ, ಪರಿಶುದ್ಧಾತ್ಮ ಉಂಡು ಪನ್ಪಿನೆನ್ ಎಂಕುಲು ಈತ್‌ನೆಂಗೆ ಕೇಂಡ್ದಿಜ.”

3ಆಯೆ, “ನಿಕುಲು ಏರೆನ್ ನಂಬುದು ನೀರ್‌ದ ದೀಕ್ಷಾಸ್ನಾನೊನು ಮಲ್ತೊಂಡರ್,” ಅಂದ್‌ದ್ ಕೇಂಡಿನೆಕ್ಕ್ ಅಕುಲು ಯೋಹಾನನ ಬೋಧನೆನ್ ನಂಬುದು ದೀಕ್ಷಾಸ್ನಾನ ಮಲ್ತೊಂಡ.

4ಐಕ್ ಪೌಲೆ, “ಯೋಹಾನೆ ಪಶ್ಚಾತಾಪ ಪಡೆದ್ ದೇವೆರೆ ಕಡೆಕ್ಕ್ ತಿರ್ಗುನಾಕುಲೆಗ್ ನೀರ್‌ದ ದೀಕ್ಷಾಸ್ನಾನ ಕೊರ್ದು ತನ ಪಿರವುಡು ಬರ್ಪಿನಾಯಡ ಅಂದ್ಂಡ ಯೇಸುಡ ನಂಬಿಕೆ ದೀವೊಡು,” ಅಂದ್‌ದ್ ಜನೊಕುಲೆಗ್ ಪಂಡೆ.

5ಅಕುಲು ಆ ಪಾತೆರೊಲೆನ್ ಕೇಂಡ್ದ್ ಕರ್ತವೆ ಆದುಪ್ಪು ಯೇಸುನ ಪುದರ್‌ಡ್ ನೀರ್‌ದ ದೀಕ್ಷಾಸ್ನಾನ ಮಲ್ತೊಂಡೆರ್.

6ಪೌಲು ಅಕ್ಲೆನ ಮಿತ್ತ್ ಕೈ ದೀನಗ ಪರಿಶುದ್ಧಾತ್ಮ ಅಕ್ಲೆ ಮಿತ್ತ್ ಬತ್ತೆ. ಅಕುಲು ಬೇತೆ ಬೇತೆ ಭಾಷೆಡ್ ಪಾತೆರೊಂಡೆರ್, ಪ್ರವಾದನೆಲಾ ಮಲ್ತೆರ್.

7ಆ ಗುಂಪುಡು ಪದ್ರಾಡ್ ಜನ ಅಂಜೊವುಲು ಇತ್ತೆರ್.

8ಆ ಊರುಡು ಪೌಲು ಸಭಾಮಂದಿರದ ಉಲಯಿ ಪೋದು ಮೂಜಿ ತಿಂಗೊಲು ಅಲ್ಪನೇ ದೇವೆರೆ ರಾಜ್ಯದ ಸಂಗತಿಡ್ ತರ್ಕ ಮಲ್ತೊಂದು ಜನೊಕುಲೆಗ್ ಉಮೇದ್ ಕೊರ್ದು ಧೈರ್ಯೊಡು ಪಾತೆರಿಯೆ.

9ಕೆಲೆವೆರ್ ತನ್ಕುಲೆ ಮನಸ್‌ಲೆನ್ ಕಠಿಣ ಮಲ್ತೊಂದು ನಂಬಂದೆ ಜನತ ಗುಂಪುದ ಎದುರು ಈ ದೇವೆರೆ ಮಾರ್ಗ ಪಡಿಕೆಂತಿನವು ಅಂದ್‌ದ್ ಪನ್ನಗ ಪೌಲು ಅಕ್ಲೆನ್ ಬುಡ್ದು ಪೋದು ಶಿಷ್ಯೆರೆನ್ ಬೇತೆ ಮಲ್ತ್‌ದ್ ತುರನ್ನನ ಸಾಲೆಡ್ ದಿನಾಲ ತರ್ಕ ಮಲ್ತೊಂದಿತ್ತೆ.

10ಉಂದು ರಡ್ಡ್ ವರ್ಸ ನಡತಿನೆಡ್ದ್ ಆಸ್ಯ ದೇಶೊಡು ಇತ್ತಿನ ಯೆಹೂದ್ಯೆರ್‌ಲಾ ಗ್ರೀಕೆರ್‌ಲಾ ಮಾತೆರ್ಲಾ ಕರ್ತವ ಪಾತೆರೊನು ಕೇಂಡೆರ್.

11ದೇವೆರ್ ಪೌಲು ಕೈಡ್ದ್ ಅಪರೂಪದ ಕಾರ್ನಿಕೊಲೆನ್ ನಡಪುಡೊಂದು ಇತ್ತಿನೆಡ್ದ್

12ಜನೊಕುಲು ಕೈ ಟುವಲ್‌ನ್ ಬೊಕ್ಕ ತೋರ್ತು ಕನತ್‌ದ್ ಆಯನ ಮೆಯಿಕ್ ಮುಟ್ಟಾದ್‌ ಸೀಕ್‌ದಾಕುಲೆನ ಮಿತ್ತ್ ಪಾಡ್ನಗ ಗುಣ ಆವೊಂದಿತ್ತೆರ್ ದುರಾತ್ಮೊಲು ಬುಡ್ದು ಪೋವೊಂದಿತ್ತ.

13ಕೆಲೆವೆರ್ ಮಂತ್ರ ಮಲ್ತ್‌ದ್ ತಿರ್ಗೊಂದಿತ್ತಿ ಯೆಹೂದ್ಯೆರ್‌ಲಾ ಊರೂರುಗು ಪೋವೊಂದು ದೆವ್ವೊಲೆಡ್ದ್ ಪೀಡಿತೆರಾದಿತ್ತಿನ ಜನೊಕುಲೆನ್ ಪೌಲು ಸಾರುನ ಯೇಸುನ ಆಜ ಪಂಡ್ದ್ ಕರ್ತವೆ ಆದುಪ್ಪು ಯೇಸುನ ಪುದರ್‌ಡ್ದ್ ದುರಾತ್ಮೊಲೆನ್ ಪಿದಾಯಿ ಪಾಡೊಂದಿತ್ತೆರ್.

14ಪ್ರಧಾನಯಾಜಕೆ ಸ್ಕೇವ ಪನ್ಪಿ ಒರಿ ಯೆಹೂದ್ಯನ ಏಳ್ ಜೋಕುಲು ಅಂಚ ಮಲ್ತೊಂದಿತ್ತೆರ್.

15ಆಂಡ ದುರಾತ್ಮೊಲು ಉತ್ತರ ಕೊರ್ದು, “ಯೇಸುನ ಗುರ್ತ ಎಂಕುಂಡು; ಪೌಲುನ್ಲಾ ತೆರಿದ ಆಂಡ ನಿಕುಲು ಏರ್?” ಪಂಡ್ಂಡ್.

16ಬೊಕ್ಕ ದುರಾತ್ಮ ಪತ್ತ್‌ದಿನ ಆ ನರಮಾನಿ ಅಕ್ಲೆ ಮಿತ್ತ್ ಬೂರ್ದು ಸೋಪಾದ್ ಬಲಾತ್ಕಾರ ಮಲ್ತಿನೆಡ್ದ್ ಅಕುಲು ಬತ್ತಲೆ ಆದ್ ಗಾಯ ಆದ್ ಇಲ್ಲದ ಉಲಯಿಡ್ದ್ ಪಿದಯಿ ಬಲ್ತೆರ್.

17ಈ ಸಂಗತಿಲು ಎಫೆಸಡಿತ್ತಿನ ಮಾತ ಯೆಹೂದ್ಯೆರೆಗ್ಲಾ ಗ್ರೀಕೆರೆಗ್ಲಾ ತೆರಿನಗ ಮಾತೆರೆಗ್ಲಾ ಪೋಡಿಗೆ ಆಂಡ್. ಬೊಕ್ಕ ಕರ್ತವೆ ಆದುಪ್ಪು ಯೇಸುನ ಪುದರ್‌ಗ್ ಸನ್ಮಾನ ತಿಕ್ಕ್ಂಡ್

18ಅಪಗ ಆಯನ್ ನಂಬುನಾಕುಲೆಡ್ ದಿಂಜ ಮಂದಿ ಬತ್ತ್‌ದ್ ತನ್ಕುಲು ಮಲ್ತಿನ ಪಾಪ ಕೃತ್ಯೊಲೆನ್ ಮಾತೆರೆ ಎದುರು ಅರಿಕೆ ಮಲ್ತೆರ್.

19ಉಂದತ್ತಂದೆ ಮಾಟ ಮಂತ್ರೊಲೆನ್ ನಡಪಾವೊಂದಿತ್ತಿನಾಕುಲೆಡ್ ಕೆಲೆವೆರ್ ತನ್ಕುಲೆ ಪುಸ್ತಕೊಲೆನ್ ಕೂಡಾದ್ ಮಾತೆರೆನ ದುಂಬು ಪೊತ್ತಾದ್ ಬುಡಿಯೆರ್. ಐತ ಬಿಲೆ ಲೆಖ್ಖ ಮಲ್ತ್‌ದ್ ತೂಂಡ ಐವ ಸಾರ ಬೊಳ್ಳಿದ ಪಾವೊಲಿ ಆವು ಅಂದ್‌ದ್ ತೆರಿಯೊಂಡೆರ್.

20ಇಂಚ ಕರ್ತವ ಪಾತೆರೊಲು ಹೆಚ್ಚೆಚ್ಚಾದ್ ಬಲತ್ತ್‌ಂಡ್.

21ಈ ಸಂಗತಿಲು ನಡೆತಿ ಬೊಕ್ಕ ಪೌಲು ತಾನ್ ಮಕೆದೋನ್ಯೊಡ್ಲಾ ಅಖಾಯೊಡ್ಲಾ ಪ್ರಯಾಣ ಮಲ್ತ್‌ದ್ ಯೆರೂಸಲೇಮುಗು ಪೋವೊಡಂದ್‌ದ್ ಮನಸ್‌ಡ್ ಆಲೋಚನೆ ಮಲ್ತ್‌ದ್, “ಅಡೆಗ್ ಪೋಯಿ ಬೊಕ್ಕ ರೋಮುನ್ಲಾ ತೂವೊಡು,” ಅಂದ್‌ದ್ ಪಂಡೆ.

22ಆಂಡ ಆಯನ ಒಟ್ಟುಗು ಸೇವೆ ಮಲ್ಪುನಾಕುಲೆಡ್ ಇರ್ವೆರಾಯಿನ ತಿಮೋಥಿನ್ಲಾ ಎರಸ್ತನ್ಲಾ ಮಕೆದೋನ್ಯೊಗು ಕಡಪುಡ್ದು ತಾನ್ ಆಸ್ಯ ದೇಶೊಡು ಒಂತೆ ಸಮಯ ಉಂತಿಯೆ.

23ಆ ಕಾಲೊಡು ಕ್ರಿಸ್ತನ ಮಾರ್ಗದ ಸಂಗತಿಡ್ ಬಾರಿ ಗಲಾಟೆ ಲಕ್ಕ್‌ಂಡ್.

24ಅವುಲು ದೆಮೇತ್ರಿ ಪನ್ಪಿ ಒರಿ ಬೊಳ್ಳಿದ ಆಚಾರಿ ಬೊಳ್ಳಿಡ್ ಅರ್ತೆಮಿ ದೇವಿನ ಗುಡಿತ ಲೆಕ್ಕ ಎಲ್ಯೆಲ್ಯ ಗುಡಿತ ಮೂರ್ತಿನ್ ಮಲ್ಪಾವುನಾಯೆ ಆದಿತ್ತ್‌ದ್ ಬೇಲೆದಾಕುಲೆಗ್ ಬಾರಿ ಬೇಲೆ ಕೊರೊಂದಿತ್ತೆ.

25ಆಯೆ ಅಕ್ಲೆನ ಸಮ್ಮಂಧವಾಯಿನ ಬೇಲೆದಾಕುಲೆನ್ ಒಟ್ಟುಗು ಲೆಪುಡಾದ್ ಅಕ್ಲೆಗ್, “ಜನೊಕುಲೇ ಈ ಬೇಲೆಡ್ದ್ ನಂಕ್ ಕೈನಿಲ್ಕೆ ದುಡ್ಡು ಬರ್ಪುಂಡು ಅಂದ್‌ದ್ ನಿಕುಲು ತೆರಿದರ್.

26ಆಂಡ ಈ ಪೌಲು ಇನ್ಪಿನಾಯೆ ಎಂಚಿನ ಮಲ್ತೊಂದುಲ್ಲೆ ಅಂದ್‌ದ್ ನಿಕುಲು ತೂಲೆ! ಆಯೆ ಎಂಚಿನ ಪನ್ಪೆ ಇನ್ಪಿನೆನ್ ನಿಕುಲು ಕೇನ್ಲೆ! ಕೈಡ್ದ್ ಮಲ್ತಿನ ಮೂರ್ತಿಲು ದೇವೆರ್ ಅತ್ತ್ ಅಂದ್‌ದ್ ಎಫೆಸೊಡು ಮಾತ್ರತ್ತಂದೆ ಹೆಚ್ಚ್ ಕಮ್ಮಿ ಆಸ್ಯ ಸೀಮೆಡ್ಲಾ ಮಾತ ಜನೊಕುಲೆಗ್ ನಂಬಾದ್ ತಿರ್ಗಾದ್ ಬುಡ್ತೆ.

27ಉಂದೆಡ್ದ್ ನಮ ಬೇಲೆಗ್ ಕಳಂಕ ಬರ್ಪಿನಿ ಅತ್ತಂದೆ ಅರ್ತೆಮಿ ಮಾಮಲ್ಲದೇವಿನ ದೇವಸ್ಥಾನ ಗೇನೊಗು ಬರಂದಿಲೆಕ್ಕಲಾ ಮಾತ ಆಸ್ಯ ಸೀಮೆಡ್ಲಾ ಲೋಕೊಡ್ಲಾ ಪೂಜೆ ಮಲ್ಪುನ ಈ ದೇವಿನ ವೈಭವೊಗು ಬರ್ಪಿನ ಗಂಡಾಂತ್ರಲಾ ಉಂಡು,” ಅಂದ್‌ದ್ ಪಂಡೆ.

28ಅಕುಲು ಈ ಪಾತೆರೊಲೆನ್ ಕೇಂಡ್ದ್ ಕೋಪೊಡು ದಿಂಜಿದ್, “ಎಫೆಸದಾಕುಲೆನ ಅರ್ತೆಮಿ ದೇವಿ ಮಾಮಲ್ಲದೇವಿ,” ಅಂದ್‌ದ್ ಅರ್ಭಟ ದೀಯೆರ್.

29ಅಪಗ ಊರುಡು ಪೂರ ಗಲಾಟೆ ಆಂಡ್. ಪ್ರಯಾಣೊಡಿತ್ತಿನ ಪೌಲುಗು ಜತೆ ಆದಿತ್ತಿನ ಮಕೆದೋನ್ಯದ ಗಾಯನ್ಲಾ ಅರಿಸ್ತಾರ್ಕನ್ಲಾ ಜನೊಕುಲು ಒಯ್ತೊಂದು ಒಗ್ಗಟ್ಟಾದ್ ನಾಟಕ ಸಾಲೆದ ಉಲಯಿ ಪೊಗ್ಗಿಯೆರ್.

30ಪೌಲು ಜನೊಕುಲೆ ಉಲಯಿ ಪೋವೊಡಂದುಪ್ಪುನಗ ಶಿಷ್ಯೆರ್ ಆಯನ್ ಬುಡ್ಜೆರ್.

31ಉಂದು ಅತ್ತಂದೆ ಆಸ್ಯ ದೇಶದ ಅಧಿಕಾರಿಲೆಡ್ ಕೆಲೆವೆರ್ ಆಯಗ್ ಸ್ನೇಹಿತೆರ್ ಇತ್ತಿನೆಡ್ದ್ ಆಯನ ಕೈತಲ್‌ ಜನೊಕುಲೆನ್ ಕಡಪುಡ್ದು ಈ ರಂಗಸ್ಥಳದ ಉಲಯಿ ಪೋದು ನಿನನ್ ಗಂಡಾತ್ರೊಗು ಗುರಿ ಮಲ್ತೊನಡ ಅಂದ್‌ದ್ ನಟ್ಟೊಂಡೆರ್.

32ಜನತ ಗುಂಪು ಗಜಿಬಿಜಿ ಆದಿತ್ತಿನೆಡ್ದ್ ಬೊಕ್ಕ ಹೆಚ್ಚಾಯಿನ ಜನೊಕುಲೆಗ್ ತನ್ಕುಲು ಸೇರ್ದ್ ಬೈದಿನ ಕಾರಣ ಗೊತ್ತಿತ್ತ್‌ಜಿ. ಕೆಲೆವೆರ್ ಒಂಜಿ ರೀತಿ ಆದ್ ಬೊಕ್ಕ ಕೆಲೆವೆರ್ ಬೊಕ್ಕೊಂಜಿ ರೀತಿ ಆದ್ ಕಲ್ಕೊಂದಿತ್ತೆರ್.

33ಯೆಹೂದ್ಯೆರ್ ಅಲೆಕ್ಸಾಂದ್ರನ್ ದುಂಬು ನೂಕನಗ ಗುಂಪುಡು ಕೆಲೆವೆರ್ ಆಯಗ್ ಸೂಚನೆ ಕೊರಿಯೆರ್. ಅಪಗ ಅಲೆಕ್ಸಾಂದ್ರೆ ಕೈ ತೋಜಾಪಾದ್ ಕೂಡ್ದು ಬೈದಿನ ಜನೊಕುಲೆಗ್ ಎದುರು ಪಾತೆರೊಡು ಅಂದ್‌ದ್ ಇತ್ತೆ.

34ಆಂಡ ಆಯೆ ಯೆಹೂದ್ಯೆ ಅಂದ್‌ದ್ ತೆರಿನಗ ಮಾತೆರ್ಲಾ ಒಂಜೇ ಸ್ವರೊಟ್ಟು, “ಎಫೆಸದಾಕುಲೆನ ಅರ್ತೆಮಿ ದೇವಿ ಮಾಮಲ್ಲದೇವಿ,” ಅಂದ್‌ದ್ ರಡ್ಡ್ ಗಂಟೆ ಪೊರ್ತು ಬೊಬ್ಬೆ ಪಾಡಿಯೆರ್.

35ಕಡೆಕ್ಕ್ ಪಟ್ಟಣದ ಯಜಮಾನೆ ಜನೊಕುಲೆನ ಗುಂಪುನು ಶಾಂತ ಮಲ್ಪಾದ್, “ಎಫೆಸದಾಕುಲೇ, ಅರ್ತೆಮಿ ಮಾಮಲ್ಲದೇವಿನ ದೇವಸ್ಥಾನೊನು ಕಾಪಾಡೊಂದು ಬೈದಿನ ಮಾತ ಜನೊಕುಲೆಗ್ ಗೊತ್ತುಂಡು. ಅರ್ತೆಮಿ ದೇವತೆಗ್ಲಾ ಬಾನೊಡ್ದು ಬೂರ್ದಿತ್ತಿ ದೇವಿನ ಮೂರ್ತಿಗ್ಲಾ ಪೂಜೆ ಮಲ್ಪೊಡು ಪಂಡ್ದ್ ತೆರಿಯಂದಿನ ನರಮಾನಿ ಏರುಲ್ಲೆ?

36ಈ ಸಂಗತಿಲು ಅತ್ತ್ ಪನ್ಪಿನೆಕ್ಕ್ ಏರೆಡ್ದ್‌ಲಾ ಆಪುಜಿ ಅಮಸರೊಡು ದಾಲಾ ಮಲ್ಪಂದೆ ಶಾಂತೊಡು ಉಪ್ಪುಲೆ.

37ನಿಕುಲು ಲೆತ್ತೊಂದು ಬೈದಿನ ಈ ನರಮಾನಿಲು ದೇವಸ್ಥಾನೊಡು ಇತ್ತಿನೆನ್ ಕಂಡೊನುನಾಕುಲು ಅತ್ತ್, ನಮ ದೇವಿನ್ ದೂಷಿಯುನಾಕುಲುಲಾ ಅತ್ತ್.

38ಇಂಚಾದುಪ್ಪುನಗ ದೆಮೇತ್ರಿಯಗ್ಲಾ ಆಯನ ಬೇಲೆದಾಕುಲೆಗ್ಲಾ ಏರೆಡಾಂಡಲಾ ತಕರಾರ್ ಇತ್ತ್ಂಡ ನ್ಯಾಯಾಲಯೊಲು ಉಂಡು; ಅಧಿಪತಿಲು ಉಲ್ಲೆರ್. ಒರಿಯ ಮಿತ್ತ್ ಒರಿ ವ್ಯಾಜ್ಯ ಮಲ್ತೊನಡೆ.

39ಬೇತೆ ದಾಲಾಂಡಲಾ ದೂರು ಇತ್ತ್ಂಡ ಅವು ಸಭೆಟ್ ತೀರ್ಪು ಆವೊಡು.

40ಈ ದಿನೊಟು ಕಾರಣದಾಂತೆ ಸೇರ್ದಿನ ಸಭೆಟ್ ಉಂದು ಒಂಜಿ ದಂಗೆ ಅಂದ್‌ದ್ ಎಂಕುಲೆ ಮಿತ್ತ್ ಅಪವಾದನೆ ಪಾಡಿಯೆರೆ ಕಾರಣ ಆವು. ಈ ಗಲಾಟೆದ ಸಂಗತಿಡ್ ವಿಚಾರಣೆ ಮಲ್ತ್ಂಡ ನಮಡ್ದ್ ಉತ್ತರ ಕೊರಿಯೆರೆ ಆಪಿನೇ ಇಜ್ಜಿ,” ಅಂದ್‌ದ್ ಪಂಡೆ.

41ಈ ಪಾತೆರೊಲೆನ್ ಪಂಡ್ದ್ ಕೂಟೊನು ಮುಗಿತೆ.

← Chapter 18 Jump to: Chapter 20 →