Acts 21

Tulu (ಪೊಸ ಒಡಂಬಡಿಕೆ)

1ಎಂಕುಲು ಬಾರಿ ಭಂಗೊಡು ಅಕ್ಲೆನ್ ಬುಡ್ದು ಕಪ್ಪಲ್ ಮಿತ್ತಾರ್ದ್ ಕೋಸ್ ದ್ವೀಪೊಗು ಪೋಯ. ಮನದಾನಿ ರೋದ ದ್ವೀಪಡ್ದ್ ಪತರಗ್ ಬತ್ತ.

2ಅಲ್ಪ ಫೊಯಿನೀಕೆ ದೇಶೊಗು ಪೋಪಿನ ಕಪ್ಪಲ್‌ನ್ ತೂದು ಮಿತ್ತಾರ್ದ್ ಪ್ರಯಾಣೊನು ದುಂಬರಿತ.

3ಬೊಕ್ಕ ಕುಪ್ರ ದ್ವೀಪದ ದತ್ತ ಮರ್ಗಿಲ್ ಬುಡ್ದು ಸುರಿಯ ದೇಶೊಗು ಪೋದು ತೂರ್ ಪಟ್ಟಣಗ್‌ ಬತ್ತ್‌ದ್ ಜತ್ತ. ಕಪ್ಪಲ್‌ದ ಸಾಮಾನುಲೆನ್ ಕಾಲಿ ಮಲ್ಪಾಯೆರೆ ಇತ್ತ್ಂಡ್.

4ಅಲ್ಪ ಶಿಷ್ಯೆರೆನ್ ತೂದು ಅಕ್ಲೆ ಒಟ್ಟುಗು ಏಳ್ ದಿನ ಉಂತಿಯ. ಅಕುಲು ಆತ್ಮದ ಪ್ರೇರಣೆಡ್ದ್ ಪೌಲುಗು, “ಈ ಯೆರೂಸಲೇಮುಗು ಪೋವರೆ ಬಲ್ಲಿ,” ಅಂದ್‌ದ್ ತಡೆತೆರ್.

5ಅಲ್ಪಡ್ದ್ ಎಂಕುಲು ಪಿದಾಡ್ನಗ ಶಿಷ್ಯೆರ್ ಬೊಕ್ಕ ಅಕ್ಲೆನ ಬೊಡೆದಿಯಾಡ್ಲು, ಜೋಕುಲು ಮಾತೆರ್ಲಾ ಎಂಕ್ಲೆನ್ ಕಡಪುಡ್ದು ಕೊರಿಯೆರೆ ಪೇಂಟೆದ ಪಿದಯಿ ಒಟ್ಟುಗು ಬತ್ತೆರ್ ಅಪಗ ಎಂಕುಲು ಕಡಲ್ದ ಬರಿಟ್ಟ್ ಮುಂಡುಬೂರ್ದು ಪ್ರಾರ್ಥನೆ ಮಲ್ತ್‌ದ್

6ಒರಿ ಒರಿಯಗ್ ವಂದನೆ ಮಲ್ತ್‌ದ್ ಕಪ್ಪಲ್ ಮಿತ್ತಾರ್ಯ; ಅಕುಲು ತನ್ಕುಲೆನ ಇಲ್ಲಗ್ ಪೋಯೆರ್.

7ಎಂಕುಲು ತೂರ್ ಪಟ್ಟಣೊಡ್ದು ಪಿದಾಡ್ದ್ ಪ್ತೊಲೆಮಾಯೊಗು ಸೇರ್ದ್ ಕಡಲ್ ಪ್ರಯಾಣೊನು ಮುಗಿತ. ಅಲ್ಪ ಇತ್ತಿನ ಸಹೋದ್ರೆರೆನ್ ಎದುಕೊಂದು ಅಕ್ಲೆನ ಕೈತಲ್‌ ಒಂಜಿ ದಿನ ಇತ್ತ

8ಮನದಾನಿ ಪಿದಾಡ್ದ್ ಕೈಸರೆಯಗ್‌ ಬತ್ತ್‌ದ್ ಸುವಾರ್ತಿಕೆ ಆದುಪ್ಪು ಫಿಲಿಪ್ಪು ಇಲ್ಲಗ್ ಪೋದು ಆಯಡೊಪ್ಪ ಉಂತಿಯ. ಆಯೆ ಆ ಏಳ್ ಜನ ಸುವಾರ್ತೆ ಸಾರುನ ಸಹಾಯಕೆರೆಡ್ದ್ ಒರಿ ಆದಿತ್ತೆ.

9ಆಯಗ್ ನಾಲ್ ಕನ್ಯಪೊಣ್ಣು ಜೋಕುಲು ಇತ್ತೆರ್; ಅಕ್ಲೆಗ್ ಪ್ರವಾದನೆ ಮಲ್ಪುನ ವರ ಇತ್ತ್ಂಡ್.

10ನಮ ಅಲ್ಪ ದಿಂಜ ದಿನ ಇತ್ತಿ ಬೊಕ್ಕ, ಅಗಬೆ ಪನ್ಪಿನ ಒರಿ ಪ್ರವಾದಿ ಯೂದಾಯೊಡ್ದು ಎಂಕ್ಲೆನ ಕೈತಲ್‌ ಬತ್ತೆ.

11ಆಯೆ ಪೌಲುನ ಸೊಂಟ ಪಟ್ಟಿನ್ ದೆತ್ತ್‌ದ್, “ಆಯನ ಕೈಕಾರ್‌ನ್ ಕಟ್ಟ್‌ದ್ ಆ ಸೊಂಟ್ಟಪಟ್ಟಿ ಏರೆನವಾ ಆ ನರಮಾನಿನ್ ಯೆಹೂದ್ಯೆರ್ ಉಂದೇ ರೀತಿಡ್ ಯೆರೂಸಲೇಮುಡು ಕಟ್ಟ್ ಪಾಡ್ದ್ ಪಿದಯಿದ ಜನೊಕುಲೆನ ಕೈಕ್ ಒಚ್ಚಿದ್ ಕೊರ್ಪೆರ್. ಇಂಚ ಪರಿಶುದ್ಧಾತ್ಮೆ ಪನ್ಪೆ,” ಅಂದ್‌ದ್ ಪಂಡೆ.

12ಈ ಪಾತೆರೊನು ಕೇನ್ನಗ ಎಂಕುಲುಲಾ ಆ ಊರುದಾಕುಲುಲಾ ಪೌಲು ಯೆರೂಸಲೇಮುಗು ಪೋವೆರೆ ಬಲ್ಲಿ ಅಂದ್‌ದ್ ನಟ್ಟೊಂಡ.

13ಐಕ್ ಪೌಲು, “ನಿಕುಲು ಬುಲ್ತುದು ಎನ ಮನಸ್‌ನ್ ಕರಗಾವೊಡ್ಚಿ ಯಾನ್ ಕರ್ತವೆ ಆದುಪ್ಪು ಯೇಸುನ ಪುದರ್‌ಗಾದ್ ಯೆರೂಸಲೇಮುಡು ಸೆರೆಮನೆತ ಸರಪೊಳಿಡ್ ಮಾತ್ರ ಅತ್ತಂದೆ ಸೈಯೆರೆಗ್ಲಾ ತಯಾರಾದುಲ್ಲೆ,” ಅಂದ್‌ದ್ ಪಂಡೆ.

14ಆಯೆ ಒಪ್ಪಿಯಂದೆ ಇತ್ತಿನೆಡ್ದ್, “ಕರ್ತವ ಚಿತ್ತದ ಲೆಕ್ಕನೆ ಆವಡ್,” ಅಂದ್‌ದ್ ಎಂಕುಲು ಮನಿಪಂದೆ ಇತ್ತ.

15ಐಡ್ದ್ ಬೊಕ್ಕ ಎಂಕುಲು ತಯಾರಾದ್ ಯೆರೂಸಲೇಮುಗು ಪಿದಾಡಿಯ.

16ಕೈಸರೆಯಡ್ದ್ ಕೆಲವು ಶಿಷ್ಯೆರ್ ಎಂಕ್ಲೆಡೊಪ್ಪ ಬತ್ತ್‌ದ್ ಶಿಷ್ಯೆರೆಡ್ ಸುರುಡ್ದು ಇತ್ತಿನಾಯೆ ಕುಪ್ರ ದೇಶದ ಮ್ನಾಸೋನೆ ಪನ್ಪಿನಾಯನ ಇಲ್ಲಗ್ ಲೆತ್ತೊಂದು ಪೋದು, ಅವುಲು ಎಂಕುಲು ಉಂತಿಯ.

17ಎಂಕುಲು ಯೆರೂಸಲೇಮು ಮುಟ್ಟುನಗ ಸಹೋದ್ರೆರ್ ಎಂಕ್ಲೆನ್ ಸಂತೋಷೊಡು ಸೇರಾವೊಂಡೆರ್.

18ಮನದಾನಿ ಯಾಕೋಬುನು ತಿಕ್ಕರೆ ಪೌಲು ಎಂಕ್ಲೆನ್ ಲೆತ್ತೊಂದು ಪೋಯೆ. ಸಭೆತ ಮಾತ ಹಿರಿಯೆರ್‌ಲಾ ಬತ್ತೆರ್.

19ಪೌಲು ಅಕ್ಲೆಗ್ ವಂದನೆ ಸಂದಾದ್ ತನ ಸೇವೆದ ಮುಖಾಂತ್ರ ದೇವೆರ್ ಪಿದಯಿದ ಜನೊಕುಲೆಡ್ ಮಲ್ತ್‌ದಿನ ಕಾರ್ಯೊಲೆನ್ ಒಂಜೊಂಜಾದ್ ಪಂಡೆ.

20ಅಕುಲು ಉಂದೆನ್ ಕೇಂಡ್ದ್ ದೇವೆರೆನ್ ಪುಗರಿಯೆರ್. ಅಪಗ ಅಕುಲು ಆಯಗ್ ಪಂಡಿನಿ, “ಸಹೋದ್ರಾ, ಯೆಹೂದ್ಯೆರೆಡ್ ಯೇಸುನು ನಂಬುನಾಕುಲು ಏತೋ ಸಾರ ಜನ ಉಲ್ಲೆರ್ ಅಂದ್‌ದ್ ನಿಕ್ಕ್ ಗೊತ್ತುಂಡತ್ತಾ? ಅಕುಲು ಮಾತೆರ್ಲಾ ನ್ಯಾಯಕಟ್ಟ್‌ದ ಅಭಿಮಾನಿ ಆದುಲ್ಲೆರ್.

21ಈ ಪಿದಯಿದ ಜನೊಕುಲೆ ನಡುಟುಪ್ಪು ಮಾತ ಯೆಹೂದ್ಯೆರೆಗ್ ನಿಕ್ಲೆನ ಜೋಕುಲೆಗ್ ಸುನ್ನತಿ ಮಲ್ಪಾವೊಡ್ಚಿ, ಆಚಾರೊಲೆನ್ ಸರಿಯಾದ್ ಅನುಸಾರ ಮಲ್ತ್‌ದ್ ನಡಪೊಡ್ಚಿ, ಮೋಶೆನ ಧರ್ಮೊನು ತ್ಯಾಗಪತ್ರ ಮಲ್ಪೊಡು ಅಂದ್‌ದ್ ಬೋಧನೆ ಮಲ್ಪುವ ಅಂದ್‌ದ್ ನಿನ ಸಂಗತಿಡ್ ಕೇಂಡ್ದ.

22ಇಂಚಾದುಪ್ಪುನಗ ದಾನೆ ಮಲ್ಪೊಡು? ಈ ಮುಲ್ಪ ಉಪ್ಪುನ ಯೆಹೂದ್ಯೆರೆಗ್ ಗೊತ್ತುಪ್ಪು.

23ಆ ಕಾರಣೊಡ್ದು ಎಂಕುಲು ನಿಕ್ಕ್ ಪನ್ಪಿನ ಕೆಲಸೊನು ಮಲ್ಪುಲ. ಎಂಕ್ಲೆಡ ಪರಕೆ ದೀತಿನಾಕುಲು ನಾಲ್ ಜನ ಉಲ್ಲೆರ್.

24ಅಕ್ಲೆನ್ ಲೆತ್ತೊಂದು ಪೋದು ಅಕ್ಲೆನ ಶುದ್ಧಚಾರದ ಸಂಪ್ರದಾಯೊಡು ಈಲಾ ಸೇರ್‌ಲಾ. ಅಕ್ಲೆ ಪರೆಕೆದ ತರೆತ ಕುಜಲ್‌ನ್ ಕತ್ತೆರಿಯೆರೆ ಕಾಸ್ ಕರ್ಚಿ ಮಲ್ಪು. ಇಂಚ ಮಲ್ತ್ಂಡ ಮಾತೆರ್ಲಾ ನಿನ ವಿಚಾರೊಡು ತನ್ಕುಲು ಕೇಂಡ್ದಿನ ಸುದ್ಧಿ ಸತ್ಯವಾಯಿನ ಅತ್ತ್ ಅಂದ್‌ದ್ ತೆರಿವೆರ್, ನ್ಯಾಯಕಟ್ಟ್‌ನ್ ಈಲಾ ಕೈಕೊಂದು ನಡಪುಡ್ವ, ಅಂದ್‌ದ್ ತೆರಿಯೊನ್ವೆರ್.

25ಪಿದಯಿದ ಜನೊಕುಲೆಡ್ ಯೇಸುನು ನಂಬುನಾಕುಲು ಮೂರ್ತಿಲೆಗ್ ಅರ್ಪಣೆ ಮಲ್ತ್‌ದಿನ ನೈವೇದ್ಯೊನು ತಿನೊಡ್ಚಿ, ಲೈಂಗಿಕ ಪಾಪೊಲೆನ್ ಮಲ್ಪೊಡ್ಚಿ, ಕಂಟೆಲ್ ಪೀಂಟಾದ್ ಕೆರ್ತಿನ ಪ್ರಾಣಿಲೆನ ನೆತ್ತೆರ್‌‌ನ್ಲಾ ಮಾಸೊನ್ಲಾ ತಿರಸ್ಕಾರ ಮಲ್ಪೊಡು ಅಂದ್‌ದ್ ಎಂಕುಲು ಆಲೋಚನೆ ಮಲ್ತ್‌ದ್ ಬರೆದ್ ಕಡಪುಡಿಯ,” ಪಂಡ್ದ್ ಪಂಡೆರ್.

26ಅಪಗ ಪೌಲು ಮನದಾನಿ ಆ ನಾಲ್ ಜನೊಕುಲೆಡೊಪ್ಪ ಪೋದು. ಶುದ್ಧಾಚಾರೊಡು ಪಾಲ್ ದೆತ್ತೊಂಡೆ. ಬೊಕ್ಕ ಆಯೆ ದೇವಾಲಯೊಗು ಪೋದು ಶುದ್ಧಚಾರದ ಸಂಪ್ರದಾಯೊನು ಮುಗಿಪುನ ದಿನೊನು, ಬೊಕ್ಕ ಏಪ ಪ್ರತಿ ಒರಿಯಗಾದ್ ಬಲಿ ಅರ್ಪಣೆ ಮಲ್ಪೆರಾಪುಂಡು ಪಂಡ್ದ್ ಪ್ರಕಟಣೆ ಮಲ್ತೆ.

27ಆ ಏಳ್ ದಿನ ದಿಂಜಿನಗ ಆಸ್ಯ ಪ್ರದೇಶೊಡ್ದು ಬೈದಿನ ಯೆಹೂದ್ಯೆರ್ ಪೌಲುನು ದೇವಾಲಯೊಡು ತೂದು ಅಲ್ಪ ಇತ್ತಿ ಗುಂಪುದ ಜನೊಕುಲೆನ ಮನಸ್‌ನ್ ಹಾಳ್ ಮಲ್ತ್‌ದ್ ಆಯನ್ ಪತ್ತಿಯೆರ್.

28“ಇಸ್ರಾಯೇಲ್ಯೆರೆ ಜನೊಕುಲೇ, ಎಂಕ್ಲೆಗ್ ಸಹಾಯ ಮಲ್ಪುಲೆ, ನಮ ಜನೊಕುಲೆಗ್ಲಾ ನ್ಯಾಯಕಟ್ಟ್‌ಗ್ಲಾ ಈ ದೇವಾಲಯೊಗ್ಲಾ ವಿರೋಧಾದ್ ಮಾತೆರೆಗ್ಲಾ ಮಾತ ಕಡೆಟ್ಲಾ ಬೋಧನೆ ಪನ್ಪಿನ ಆ ನರಮಾನಿ ಉಂಬೆನೆ. ಉಂದು ಅತ್ತಂದೆ ಇಂಬೆ ಗ್ರೀಕೆರೆನ್ ದೇವಾಲಯದುಲಯಿ ಲೆತ್ತೊಂದು ಬತ್ತ್‌ದ್ ಈ ಪರಿಶುದ್ಧ ಜಾಗ್‌ನ್ ಮೈಲೆ ಮಲ್ತೆ,” ಅಂದ್‌ದ್ ಬೊಬ್ಬೆ ಪಾಡಿಯೆರ್.

29ದುಂಬು ಆಯೆ ಎಫೆಸದ ತ್ರೋಫಿಮನ ಒಟ್ಟುಗು ಉಪ್ಪುನೆನ್ ತೂದಿತ್ತೆರ್, ಪೌಲು ದೇವಾಲಯದುಲಯಿ ಲೆತ್ತೊಂದು ಬತ್ತೆ ಅಂದ್‌ದ್ ಎನ್ನಿಯೆರ್.

30ಯೆರೂಸೇಲೆಮುದ ಜನೊಕುಲು ಬಾರಿ ಕೋಪೊಡ್ದು ದಿಂಜಿದಿತ್ತೆರ್. ಮಾತ ಕಡೆಡ್ದ್‌ಲಾ ಪಾರ್ದ್ ಬತ್ತ್‌ದ್ ಪೌಲುನು ಪತ್ತ್‌ದ್ ದೇವಾಲಯದ ಪಿದಯಿ ಒಯ್ತೊಂದು ಬತ್ತೆರ್. ಕೂಡ್ಲೆ ಬಾಕಿಲ್‌ನ್ ಮುಚ್ಚಿಯೆರ್.

31ಅಕುಲು ಆಯನ್ ಕೆರಿಯೆರೆ ಪ್ರಯತ್ನ ಮಲ್ತೊಂದುಪ್ಪುನಗ ಯೆರೂಸಲೇಮುಡು ಪೂರ ಗಲಾಟೆ ಆಂಡ್ ಅಂದ್‌ದ್ ರೋಮುದ ಸೇನಾಧಿಪತಿಗ್ ಸುದ್ಧಿ ಬತ್ತ್ಂಡ್.

32ಸೇನಾಧಿಪತಿ ಅಪಗನೆ ಸಿಪಾಯಿಲೆನ್ಲಾ ಶತಾಧಿಪತಿದಿಲೆನ್ಲಾ ಲೆತ್ತೊಂದು ಅಕುಲು ಇತ್ತಿನಡೆ ಬತ್ತೆ. ಅಕುಲು ಸೇನಾಧಿಪತಿನ್ಲಾ ಸಿಪಾಯಿಲೆನ್ಲಾ ತೂದು ಪೌಲುಗು ಹಾಕುನೆನ್ ಬುಡಿಯೆರ್.

33ಸೇನಾಧಿಪತಿ ಪೋದು ಪೌಲುನು ಕೈದ್ ಮಲ್ತ್‌ದ್ ರಡ್ಡ್ ಸರಪೊಳಿಡ್ ಕಟ್ಟಿಯೆರೆ ಸೈನಿಕೆರೆಗ್ ಅಪ್ಪಣೆ ಕೊರಿಯೆ. ಬೊಕ್ಕ ಆ ಸೇನಾಧಿಪತಿ, “ಈ ನರಮಾನಿ ಏರ್? ಆಯೆ ದಾದ ಮಲ್ತ್‌ದೆ,” ಅಂದ್‌ದ್ ಕೇನಿಯೆ.

34ಜನೊಕುಲೆಡ್ ಕೆಲೆವೆರ್ ಅಂಚ ಕೆಲೆವೆರ್ ಇಂಚ ಅಂದ್‌ದ್ ಬೊಬ್ಬೆ ಪಾಡ್ನಗ ಆ ಗಲಾಟೆಡ್ದ್ ನಿಜ ಸಂಗತಿ ದಾನೆ ಅಂದ್‌ದ್ ತೆರಿಯೆರೆ ಆವಂದೆ ಆಯನ್ ಕೋಟೆದ ಉಲಯಿ ಲೆತ್ತೊಂದು ಪೋಲೆ ಅಂದ್‌ದ್ ಅಪ್ಪಣೆ ಕೊರಿಯೆ.

35ಪೌಲು ಮುಟ್ಟು ಮಿತ್ತ್ ಬನ್ನಗ ಜನೊಕುಲು ಆಯಗ್ ತೊಂದರೆ ಕೊರಿನೆಡ್ದ್ ಸಿಪಾಯಿಲು ಆಯನ್ ದೆರ್ತೊಂದು ಪೋವೊಡಾಂಡ್.

36ಗುಂಪಾದ್ ಕೂಡ್ದಿನ ಜನೊಕುಲು ಪಿರವುಡು ಬತ್ತ್‌ದ್, “ಆಯನ್ ಕೆರ್ಪಾಲೆ,” ಅಂದ್‌ದ್ ಬೊಬ್ಬೆ ಪಾಡೊಂದಿತ್ತೆರ್.

37ಪೌಲುನು ಕೋಟೆದ ಉಲಯಿ ಸೇರಾವೊನೆಕ್ಕ್ ದುಂಬು ಆಯೆ ಆ ಸೇನಾಧಿಪತಿನ್, “ನಿನಡ ಎಂಕ್ ಒಂಜಿ ಪಾತೆರ ಪನಿಯೆರೆ ಅಪ್ಪಣೆ ಕೊರ್ಪನಾ,” ಅಂದ್‌ದ್ ಕೇನ್ನಗ, “ನಿಕ್ಕ್ ಗ್ರೀಕ್ ಭಾಷೆ ಬರ್ಪುಂಡಾ?

38ಒಂತೆ ದಿನೊಡ್ದು ಪಿರವು ಗಲಾಟೆ ಲಕ್ಕಾದ್ ಆ ನಾಲ್ ಸಾರ ಜನ ದುಷ್ಟೆರೆನ್ ಕಾಡ್‌ಗ್ ಲೆತ್ತೊಂದು ಪೋಯಿನ ಆ ಐಗುಪ್ತೆ ಈಯೆ ಅತ್ತಾ?” ಅಂದ್‌ದ್ ಕೇಂಡೆ.

39ಐಕ್ ಪೌಲು, “ಯಾನ್ ಯೆಹೂದ್ಯೆ, ತಾರ್ಸುದಾಯೆ, ಕಿಲಿಕ್ಯ ಪ್ರದೇಶದ ಪುದರ್ ಪೋಯಿ ಪಟ್ಟಣದ ಮೂಲಾದಾಯೆ. ಆ ಜನೊಕುಲೆಗ್ ಕೆಲವು ಪಾತೆರೊಲೆನ್ ಪನಿಯೆರೆ ಎಂಕ್ ಅಪ್ಪಣೆ ಕೊರ್ಲ,” ಅಂದ್‌ದ್ ನಟ್ಟೊನ್ವೆ.

40ಸೇನಾಧಿಪತಿ ಅಪ್ಪಣೆ ಕೊರ್ನಗ ಪೌಲು ಮುಟ್ಟುದ ಮಿತ್ತ್ ಉಂತೊಂದು ಜನೊಕುಲೆಗ್ ಕೈ ಭಾಷೆ ಮಲ್ತೆ. ಅಕುಲು ಶಾಂತ ಆಯಿ ಬೊಕ್ಕ ಆಯೆ ಇಬ್ರಿಯ ಭಾಷೆಡ್ ಅಕ್ಲೆಡ ಪಾತೆರಿಯೆ.

← Chapter 20 Jump to: Chapter 22 →