Acts 14

Tulu (ಪೊಸ ಒಡಂಬಡಿಕೆ)

← Chapter 13 Jump to: Chapter 15 →

1ಇಕೋನ್ಯೊಡು ಪೌಲು ಬಾರ್ನಬೆ ಇರ್ವೆರ್‌ಲಾ ಯೆಹೂದ್ಯೆರೆನ ಸಭಾಮಂದಿರೊಲೆಗ್ ಪೋದು, ಧೈರ್ಯೊಡು ದೇವೆರೆನ ಪಾತೆರೊನು ಪಂಡಿನೆಡ್ದ್ ಮಸ್ತ್ ಜನ ಯೆಹೂದ್ಯೆರೆಡ್ಲಾ ಗ್ರೀಕೆರೆಡ್ಲಾ ನಂಬುನಾಕುಲಾಯೆರ್.

2ಆಂಡ ಯೆಹೂದ್ಯೆರೆಡ್ ನಂಬಂದೆ ಪೋಯಿನ ಕೆಲೆವೆರ್ ಪಿದಯಿದ ಜನೊಕುಲೆನ ಉಡಲ್‌ನ್ ಸಹೋದ್ರೆರೆಗ್ ವಿರೋಧಾದ್ ನೋಚಾದ್ ಹಾಳ್ ಮಲ್ತೆರ್.

3ಇಂಚಾದುಪ್ಪುನಗ ಪೌಲು ಬಾರ್ನಬೆ ದಿಂಜ ಸಮಯ ಅಲ್ಪ ಇತ್ತ್‌ದ್ ಕರ್ತವೆ ಅಕ್ಲೆನ ಕೈಡ್ದ್ ಗುರ್ತೊಲೆನ್ಲಾ ಕಾರ್ನಿಕೊಲೆನ್ಲಾ ನಡಪುಡ್ದು ತನ ದಯತ ಪಾತೆರೊಗು ಸಾಕ್ಷಿ ಕೊರಿನೆಡ್ದ್ ದೇವೆರೆ ಮಿತ್ತ್ ಭರವಸ ದೀದ್ ಧೈರ್ಯೊಡು ಪಾತೆರೊಂದಿತ್ತೆರ್.

4ಅಪಗ ಆ ಊರುದ ಜನೊಕುಲೆಡ್ ಒಂಜಿ ಭೇದ ಪುಟ್ಟುಂಡು; ಕೆಲೆವೆರ್ ಯೆಹೂದ್ಯೆರೆನ ಗುಂಪುದಾಕುಲಾಯೆರ್ ಬಾಕಿದಾಕುಲು ಅಪೊಸ್ತಲೆರೆ ಗುಂಪುದಾಕುಲಾಯೆರ್.

5ಪಿದಯಿದ ಜನೊಕುಲುಲಾ ಯೆಹೂದ್ಯೆರ್‌ಲಾ ಸೇರ್ದ್ ತನ್ಕುಲೆ ಅಧಿಪತಿಲೆನ ಒಪ್ಪಿಗೆಡ್ ಅಪೊಸ್ತಲೆರೆನ್ ಅವಮಾನ ಮಲ್ತ್‌ದ್ ಕಲ್ಲ್ ದಕ್ಕ್‌ದ್ ಕೆರೊಡು ಅಂದ್‌ದ್ ಇತ್ತೆರ್.

6ಅಪೊಸ್ತಲೆರ್ ಅವೆನ್ ತೆರಿದ್ ಲುಕವೋನ್ಯೊಡಿತ್ತಿನ ಲುಸ್ತ್ರ ದೆರ್ಬೆ ಪನ್ಪಿ ಆ ಊರುದ ಸುತ್ತಮುತ್ತದ ಪ್ರದೇಶೊಗು ಪಾರ್‌ಪೋಯೆರ್.

7ಅಕುಲು ಅಡೆಗ್ ಪೋದು ಸುವಾರ್ತೆ ಸಾರೊಂದೆ ಇತ್ತೆರ್.

8ಲುಸ್ತ್ರೊಡು ಒರಿ ಮನುಷ್ಯೆ ಇತ್ತೆ, ಆಯೆ ತನ ಅಪ್ಪೆ ಗರ್ಭೊಡ್ದೇ ಮೋಂಟೆ ಆದ್ ಕಾರ್‌ಡ್ ಬಲದಾಂತೆ ನಡಪಂದೆ ಇತ್ತೆ.

9ಪೌಲು ಪನ್ಪಿನ ಪಾತೆರೊಲೆನ್ ಆಯೆ ಕೆಬಿ ಕೊರ್ದು ಕೇನೊಂದಿತ್ತೆ. ಪೌಲು ಆಯನ್ ದೃಷ್ಟಿ ದೀದ್ ತೂದು, ದೇವೆರ್ ತನನ್ ಗುಣ ಮಲ್ಪೆ ಪನ್ಪಿನ ನಂಬಿಕೆ ಉಂಡು ಅಂದ್‌ದ್ ತೆರಿದ್

10ನಿನ ಕಾರೂರುದು ಸರ್ತ ಉಂತುಲ ಅಂದ್‌ದ್ ಗಟ್ಟಿಡ್ ಪಂಡೆ. ಅಪಗನೆ ಆ ನರಮಾನಿ ಲಾಗಿದ್ ನಡತೆ.

11ಪೌಲು ಮಲ್ತಿನೆನ್ ಜನೊಕುಲು ತೂದು ದೇವತೆಲು ನರಮಾನಿಲೆನ ರೂಪೊಡು ನಮ ಕೈತಲ್‌ ಜತ್ತ್‌ದ್ ಬೈದೆರ್ ಅಂದ್‌ದ್ ಲುಕವೋನ್ಯ ಭಾಷೆಡ್ ಕಲ್ಕಿಯೆರ್.

12ಬಾರ್ನಬನ್ ದೈಸ್‌ದೇವೆರ್ ಪಂಡ್ದ್‌ಲಾ ಪೌಲು ಪಾತೆರುನೆಟ್ಟ್ ಮುಖ್ಯ ಆದಿತ್ತಿನೆಡ್ದ್ ಆಯನ್ ಹೆರ್ಮೆಸ್ ದೇವೆರ್ ಅಂದ್‌ದ್ ಲೆತ್ತೆರ್.

13ದೈಸ್‌ದೇವೆರ್ನ ದೇವಸ್ಥಾನ ಪಟ್ಟಣದ ಬಾಕಿಲ್‌ದ ಪಿದಯಿಡ್ ಇತ್ತ್ಂಡ್. ದೇವಾಸ್ಥಾನದ ಪುಜಾರಿ ಕೆಲವು ಬೋರಿಲೆನ್ ಪೂತ ಮಾಲೆನೆಲ್ಲಾ ಕನತ್‌ದ್ ಜನೊಕುಲೆಡೊಪ್ಪ ಅಕ್ಲೆಗ್ ಬಲಿ ಕೊರೊಡು ಅಂದ್‌ದ್ ಇತ್ತೆ.

14ಉಂದೆನ್ ಕೇಂಡ್ದ್ ಅಪೊಸ್ತಲೆರಾಯಿನ ಬಾರ್ನಬೆ ಪೌಲೆರ್ ತನ್ಕುಲೆನ ಕುಂಟುನು ಪರ್ತೊಂದು ಜನೊಕುಲೆನ ಗುಂಪುಗು ಪೊಗ್ಗುದು ಇಂಚ ಬೊಬ್ಬೆ ಪಾಡಿಯೆರ್

15ಜನೊಕುಲೇ, ನಿಕುಲು ದಾದ ಮಲ್ತೊಂದುಲ್ಲರ್? ಎಂಕುಲುಲಾ ನರಮಾನಿಲೇ, ನಿಕ್ಲೆಲೆಕ್ಕನೇ ಸ್ವಭಾವದಾಕುಲು, ನಿಕುಲು ಈ ಬೊಡ್ಚಾವಂದಿನ ಕೆಲಸೊಲೆನ್ ಬುಡ್ದು ಬಾನೊನು, ಭೂಮಿನ್ ಕಡಲ್‌ನ್ ಐಟ್ಟುಪ್ಪು ಮಾತೆನ್ಲಾ ಉಂಡು ಮಲ್ತಿನ ಜೀವಸ್ವರೂಪೆ ಆದುಪ್ಪು ದೇವೆರೆ ಕಡೆಕ್ಕ್ ತಿರ್ಗೊಡು ಅಂದ್‌ದ್ ಸುವಾರ್ತೆ ನಿಕ್ಲೆಗ್ ಸಾರಿದ್ ಪನ್ಪಿನಾಕುಲಾದುಲ್ಲ.

16ಕರಿದ್ ಪೋಯಿನ ಕಾಲೊಡು ದೇವೆರ್ ಮಾತ ಜನಾಂಗೊಲೆನ್ ತನ್ಕುಲೆ ಮನಸ್‌ಗ್ ಬತ್ತಿಲೆಕ್ಕ ನಡಪೆರೆ ಬುಡಿಯೆ.

17ಆಂಡ ಆಯೆ ತನ ಸಂಗತಿಡ್ ಸಾಕ್ಷಿ ಕೊರಂದೆ ಇಜ್ಜಾಂಡ್. ನಿಕ್ಲೆಗ್ ಬಾನೊಡ್ದು ಬರ್ಸೊನು ಫಲತ್ತ ಕಾಲೊಡು ಫಲೊನ್ಲಾ ಬೋಡಾಯಿನಾತ್ ಆಹಾರೊನ್ಲಾ ಕೊರ್ದು ನಿಕ್ಲೆನ ಮನಸ್‌ನ್ ಸಂತೋಷೊಡು ದಿಂಜಾದ್ ಎಡ್ಡೆನ್ ಮಲ್ತೊಂದು ಬತ್ತಿನಾಯೆ ಆಯೆನೇ ಅಂದ್‌ದ್ ಪಂಡೆರ್.

18ಅಕ್ಲೆಗ್ ಈ ಪಾತೆರೊಲೆನ್ ತೆರಿಪಾಂಡಲಾ ಎಂಕ್ಲೆಗ್ ಬಲಿ ಕೊರಂದಿಲೆಕ್ಕ ಜನೊಕುಲೆನ್ ತಡೆಪೆರೆ ಭಂಗ ಆಂಡ್.

19ಉಂದೆಡ್ದ್ ಬೊಕ್ಕ ಅಂತಿಯೋಕ್ಯಡ್ದ್‌ಲಾ ಇಕೋನ್ಯೊಡ್ದುಲಾ ಯೆಹೂದ್ಯೆರ್ ಬತ್ತ್‌ದ್ ಜನೊಕುಲೆನ್ ಲಕ್ಕಾದ್ ಪೌಲುನು ಕೆರಿಯೆರೆ ಕಲ್ಲ್ ದಕ್ಕ್‌ದ್ ಆಯೆ ಸೈತೆ ಅಂದ್‌ದ್ ಎನ್ನ್‌ದ್ ಊರುದ ಪಿದಯಿ ಒಯ್ತ್ ಪಾಡಿಯೆರ್.

20ಆಂಡ ಯೇಸುನ ಶಿಷ್ಯೆರ್ ಆಯನ ಸುತ್ತಲಾ ಉಂತೊಂದುಪ್ಪುನಗ ಆಯೆ ಲಕ್ಕ್‌ದ್ ಊರುದ ಉಲಯಿ ಪೋಯೆ. ಮನದಾನಿ ಬಾರ್ನಬನ ಒಟ್ಟುಗು ದೆರ್ಬೆಗ್ ಪಿದಾಡಿಯೆ.

21ದೆರ್ಬೆ ಊರುಡು ಆಯೆ ಸುವಾರ್ತೆ ಸಾರಿದ್ ಕೆಲವು ಶಿಷ್ಯೆರಾಯಿ ಬೊಕ್ಕ ಲುಸ್ತ್ರೊಗ್ಲಾ ಇಕೋನ್ಯಗ್ಲಾ ಅಂತಿಯೋಕ್ಯಗ್ಲಾ ಪಿರ ಬತ್ತ್‌ದ್

22ಶಿಷ್ಯೆರ್‌ನ ಉಡಲ್‌ನ್ ದೃಢ ಮಲ್ತ್‌ದ್ ನಂಬಿಕೆಡ್ ನಿಲೆ ಆದುಪ್ಪುಲೆ ಪಂಡ್ದ್ ಉಮೇದ್ ಕೊರಿಯೆರ್, ಬೊಕ್ಕ ನಮ ಬಾರಿ ಸಂಕಟ ತಾಳ್‌ದ್ ದೇವೆರೆ ರಾಜ್ಯೊಗು ಸೇರೊಡು ಅಂದ್‌ದ್ ಬೋಧನೆ ಕೊರಿಯೆರ್.

23ಉಂದತ್ತಂದೆ ಪ್ರತಿ ಸಭೆಟ್ಲಾ ಸಭೆತಾಕುಲೆನ ಒಪ್ಪಿಗೆಡ್ದ್ ಹಿರಿಯೆರೆನ್ ನೇಮಕ ಮಲ್ತ್‌ದ್ ಉಪವಾಸೊಡು ಪ್ರಾರ್ಥನೆ ಮಲ್ತ್‌ದ್ ಅಕುಲು ನಂಬುದಿನ ಕರ್ತವ ಕೈಕ್ ಅಕ್ಲೆನ್ ಒಚ್ಚಿದ್ ಕೊರಿಯೆರ್.

24ಐಡ್ದ್ ಬೊಕ್ಕ ಪಿಸಿದ್ಯ ಪ್ರದೇಶ ದಾಂಟ್‌ದ್ ಪಂಫುಲ್ಯ ದೇಶೊಗು ಬತ್ತೆರ್.

25ಐಕ್ ಸೇರ್ದುಪ್ಪುನ ಪೆರ್ಗಡ್ ಕರ್ತವ ಪಾತೆರೊನು ಪಂಡಿ ಬೊಕ್ಕ ಅತ್ತಾಲ್ಯಗ್ ಪೋಯೆರ್.

26ಅಲ್ತ್‌ಡ್ದ್ ಅಕುಲು ಸುರಿಯ ಆದ್ ಅಂತಿಯೋಕ್ಯಗ್ ಕಡಲ್ದ ಸಾದಿಯಾದ್ ಮುಟ್ಟಿಯೆರ್. ಅಕುಲು ತೀರಿಸಾದ್ ಬತ್ತಿನ ಕೆಲಸೊಗಾದ್ ದೇವೆರೆನ ದಯೊಟು ಒಚ್ಚಿದ್ ಕೊರ್ತಿನಾಕುಲಾದ್ ಆ ಊರುಡ್ದೆ ಪಿದಾಡಿಯೆರ್.

27ಅಲ್ಪ ಸಭೆನ್ ಕೂಡಾದ್ ದೇವೆರ್ ತನ್ಕುಲೆ ಒಟ್ಟುಗಿತ್ತ್‌ದ್ ಮಲ್ತಿನ ಮಾತೆನ್ಲಾ ಆಯೆ ಪಿದಯಿದ ಜನೊಕುಲೆಗ್ ನಂಬಿಕೆದ ಬಾಕಿಲ್‌ನ್ ಜತ್ತ್‌ದಿನೆನ್ಲಾ ವಿವರಿಸಾದ್ ಪಂಡೆರ್.

28ಐಡ್ದ್ ಬೊಕ್ಕ ಅಕುಲು ಅಲ್ಪ ಶಿಷ್ಯೆರೆ ಒಟ್ಟುಗು ದಿಂಜ ಸಮಯ ತಡೆಯೆರ್.

← Chapter 13 Jump to: Chapter 15 →