Acts 27

Tulu (ಪೊಸ ಒಡಂಬಡಿಕೆ)

1ಎಂಕುಲು ಇತಾಲ್ಯಗ್ ಕಡಲ್ದ ಪ್ರಯಾಣ ಮಲ್ತೊಂದು ಪೋವೊಡು ಅಂದ್‌ದ್ ತೀರ್ಮಾನ ಆಯಿನೆಡ್ದ್ ಬೊಕ್ಕ ಪೌಲುನ್ಲಾ ಬೇತೆ ಕೆಲವು ಕೈದ್‌ಡಿತ್ತಿನಾಕುಲೆನ್ಲಾ ಚಕ್ರವರ್ತಿನ ಪಟಾಲ್‌ಗ್ ಸೇರ್ದಿನ ಜೂಲಿಯಸ್ ಪನ್ಪಿ ಒರಿ ಶತಾಧಿಪತಿಗ್ ಒಪ್ಪಿಸಾಯೆರ್.

2ಎಂಕುಲು ಒಂಜಿ ಕಪ್ಪಲ್‌ನ್ ಮಿತ್ತಾರ್ದ್ ಅಲ್ತ್‌ಡ್ದ್ ಪಿದಾಡಿಯ. ಆ ಕಪ್ಪಲ್ ಅದ್ರಮಿತ್ತಿಡ್ದ್ ಬತ್ತ್‌ದಿತ್ತ್ಂಡ್ ಬೊಕ್ಕ ಆಸ್ಯ ಪ್ರದೇಶದ ಕರಾವಳಿದ ಜಾಗೊಲೆಗ್ ಪೋವರೆ ತಯಾರ್ ಆದಿತ್ತ್ಂಡ್. ಮಕೆದೋನ್ಯೊಗು ಸೇರ್ದಿನ ಥೆಸ್ಸಲೋನಿಕದ ಅರಿಸ್ತಾರ್ಕೆ ಎಂಕುಲೆ ಒಟ್ಟುಗು ಇತ್ತೆ.

3ಮನದಾನಿ ಎಂಕುಲು ಸೀದೋನುಗು ಮುಟ್ಟಿಯ. ಜೂಲಿಯಸ್ ಪೌಲುಗು ದಯೆ ತೋಜಾವುನಾಯೆ ಆದಿತ್ತೆ. ಆಯನ್ ಸ್ನೇಹಿತೆರೆ ಕೈತಲ್‌ ತಿಕ್ಕರೆ ಸ್ವತಂತ್ರ ಕೊರಿಯೆ. ಈ ಸ್ನೇಹಿತೆರ್ ಆಯಗ್ ಬೋಡಿತ್ತಿನೆನ್ ಒದಗಾಯೆರ್.

4ಅಲ್ತ್‌ಡ್ದ್ ಪಿದಾಡ್ನಗ ಎದುರು ಗಾಳಿ ಬೀಜೊಂದಿತ್ತಿನೆಡ್ ಕುಪ್ರ ದ್ವೀಪೊದ ಮದೆಟ್ ತೇಲಾದ್ ಬತ್ತ.

5ಕಿಲಿಕ್ಯಗ್ಲಾ ಪಂಫುಲ್ಯಗ್ಲಾ ಎದುರುಡಿತ್ತಿನ ಕಡಲ್‌ನ್ ದಾಂಟ್‌ದ್ ಲುಕೀಯ ಸೀಮೆಡುಪ್ಪು ಮುರಗ್ ಬತ್ತ.

6ಅಲ್ಪ ಅಲೆಕ್ಸಾಂದ್ರಿಯೊಡ್ದು ಬೈದಿನ ಇತಾಲ್ಯಗ್ ಪೋವೊಂದಿತ್ತಿನ ಕಪ್ಪಲ್‌ನ್ ಶತಾಧಿಪತಿ ತೂದು ಎಂಕ್ಲೆನ್ ಐಟ್ಟ್ ಮಿತ್ತರ್ಪಾಯೆ.

7ಕೆಲವು ದಿನ ಬಾರಿ ನಿಧಾನೊಡು ಪ್ರಯಾಣ ಮಲ್ತ. ಎದುರು ಗಾಳಿ ಭಯಂಕರ ಬೀಜೊಂದು ಇತ್ತಿನೆಡ್ದಾವರ ಎಂಕುಲು ಕ್ನೀದೊಗು ಮುಟ್ಟಿಯೆರೆ ಕಷ್ಟ ಆಂಡ್. ಆ ಮಾರ್ಗೊಡು ನನ ದುಂಬು ಪ್ರಯಾಣ ಮಲ್ಪರೆ ಎಂಕ್ಲೆಗ್ ಸಾದ್ಯ ಆಯಿಜಿ. ಆಯಿನೆಡ್ದಾವರ ಎಂಕುಲು ಸಲ್ಮೋನೆ ಮುಟ್ಟ ಇತ್ತಿನ ಕ್ರೇತ್ ದ್ವೀಪದ ದಕ್ಷಿಣ ಭಾಗೊಗು ಕಡಲ್ದ ಪ್ರಯಾಣ ಮಲ್ತ.

8ಎಂಕುಲು ಬಾರೀ ಪ್ರಯಾಸೊಡು ಕರಾವಳಿಡೇ ನೌಕಾಯಾನ ಮಲ್ತ. ಅಲ್ತ್‌ಡ್ದ್ ಎಂಕುಲು ಪೊರ್ಲು ಬಂದರ್ ಪನ್ಪಿ ಜಾಗ್‌ಗ್ ಬತ್ತ. ಲಸಾಯ ಪಟ್ಟಣ ಐತ ಮುಟ್ಟೊಡೇ ಇತ್ತ್ಂಡ್.

9ಇಂಚ ಸುಮಾರ್ ಸಮಯ ಕರಿದಿತ್ತ್‌ಂಡ್. ಮಲ್ಲ ಉಪವಾಸದ ದಿನ ಕಡತ್ ಪೋದಿತ್ತ್‌ಂಡ್, ಕಡಲ್ ಪ್ರಯಾಣ ಮಲ್ಪುನ ಪೋಡಿಗೆದವು ಆಯಿನೆಡ್ದ್

10ಪೌಲು ಅಕ್ಲೆಡ, “ಜನೊಕುಲೇ, ಈ ಪ್ರಯಾಣೊಡು ನಂಕ್ ಬಾರಿ ತೊಂದರೆ ಉಂಡು ಅಂದ್‌ದ್ ಎಂಕ್ ತೋಜುಂಡು. ಕಪ್ಪಲ್‌ಗ್ ಬೊಕ್ಕ ಕಪ್ಪಲ್‌ಡಿತ್ತಿನ ಸಾಮಾನುಲು ಪೂರ ನಷ್ಟ ಅವು, ನಮ ಪ್ರಾಣಲಾ ನಾಶಾದ್ ಪೋವರೆ ಸಾದ್ಯ ಉಂಡು,” ಅಂದ್‌ದ್ ಎಚ್ಚರಿಕೆ ಕೊರಿಯೆ.

11ಪೌಲು ಪಂಡಿನ ಪಾತೆರೊಗು ಶತಾಧಿಪತಿ ಹೆಚ್ಚಾದ್ ಲಕ್ಷ ಕೊರಂದೆ ನಾವಿಕನ ಬೊಕ್ಕ ಕಪ್ಪಲ್‌ದ ಧನಿನ ಪಾತೆರೊನು ನಂಬಿಯೆ.

12ಈ ಬಂದರ್ ಚಳಿಕಾಲೊಡು ಉಂತಿಯೆರೆ ಯೋಗ್ಯದಾಂತಿನವು ಆದಿತ್ತಿನೆಡ್ದ್, ಹೆಚ್ಚಾಯಿನಾಕುಲು ದುಂಬು ಪ್ರಯಾಣ ಮಲ್ತ್‌ದ್ ಫೊಯಿನಿಕ್ಸೆಗ್ ಪೋದು ಅಲ್ಪನೇ ಚಳಿಕಾಲೊನು ಕಳೆವೊಡು ಪಂಡ್ದ್ ಅಭಿಪ್ರಾಯ ಮಲ್ತೆರ್. ಉಂದು ಕ್ರೇತ್ ದ್ವೀಪೊಡು ತೆನ್‌ಕಯಿ-ಪಡ್ಡಯಿ ಬೊಕ್ಕ ಬಡಕಯಿ-ಪಡ್ಡಯಿಗ್ ಮೋನೆ ಮಲ್ತ್‌ದಿನ ಬಂದರ್ ಆದಿತ್ತ್ಂಡ್.

13ತೆನ್‌ಕಯಿದ ಗಾಳಿ ಮೆಲ್ಲೊಡು ಬೀಜ್‌ನಗ ಎಂಕ್ಲೆಗ್ ಬೋಡಾಪಿನ ಗಾಳಿ ತಿಕ್ಕ್ಂಡ್ ಅಂದ್‌ದ್ ಎನ್ನ್‌ದ್ ಲಂಗರ್ ದೆರ್ತ್ತ್‌ದ್ ಕ್ರೇತ್ ದ್ವೀಪದ ಕರಾವಳಿಡೇ ಕಡಲ್ದ ಪ್ರಯಾಣ ಮಲ್ತ.

14ಒಂತೆ ಪೊರ್ತು ಆಯಿ ಬೊಕ್ಕ ಬಡಕಯಿ-ಮೂಡಯಿ ಪನ್ಪಿ ಸುಳಿಗಾಳಿ ಆ ದ್ವೀಪದ ಮಿತ್ತ್‌ಡ್ದ್ ದರ್ತ್‌ಂಡ್.

15ಆ ದರ್ಪಾಟೊಗು ಕಪ್ಪಲ್ ತಿಕೊಂದು ಗಾಳಿಗ್ ಎದುರು ಉಂತೆರೆ ಆವಂದೆ ಗಾಳಿ ನೂಕೊಂದು ಪೋಂಡು.

16ಕ್ಲೌಡ ಪನ್ಪಿನ ಒಂಜಿ ಎಲ್ಯ ದ್ವೀಪೊದ ಬರಿಯೆ ಪೋವೊಂದುಪ್ಪುನಗ ಕಪ್ಪಲ್‌ಡಿತ್ತಿನ ಓಡೊನು ಬಾರಿ ಕಷ್ಟೊಡು ಉಲಯಿ ದೀಯ.

17ಅವೆನ್ ಮಿತ್ತ್ ದೆರ್ತಿ ಬೊಕ್ಕ ಬಲ್ಲ್‌ಡ್ ಕಪ್ಪಲ್‌ದ ಅಡಿ ಬಿಗಿತೆರ್. ಐಡ್ದ್ ಬೊಕ್ಕ ಸುರ್ತಿಸ್ ಪನ್ಪಿನ ಕಲ್ಲ್‌ಪೊಯ್ಯೆ ತಿಕ್ಕ್‌ದ್ ಬೂರುಂಡು ಅಂದ್‌ದ್ ಪೋಡಿದ್ ಪಾಯಿನ್ ಸಡಿಲ್ ಮಲ್ತ್‌ದ್ ಗಾಳಿ ನೂಕೊಂದು ಪೋಂಡು.

18ಮನದಾನಿ ಗಾಳಿ ಜೋರಾದ್ ಬೀಜಿನೆಡ್ದ್ ಜನೊಕುಲು ಕಪ್ಪಾಲ್‌ಡಿತ್ತಿನ ಸಾಮಾನುಲೆನ್ ಪೂರ ದಕ್ಕೊಂದಿತ್ತೆರ್.

19ಮೂಜನೇ ದಿನೊಟು ಕಪ್ಪಲ್‌ದ ಅಡ್ಡ ಮರೊನು ಕೈಡ್ದೇ ಪಿದಯಿ ದೆರ್ತ್ತ್ ಪಾಡಿಯೆರ್.

20ದಿಂಜ ದಿನ ಮುಟ್ಟ ಸೂರ್ಯೆ ಆವಡ್ ನಕ್ಷತ್ರೊಲಾವಡ್ ಎಂಕ್ಲೆಗ್ ತೋಜಂದೆ ಮಲ್ಲ ಬಿರುಗಾಳಿಲಾ ಎಂಕುಲೆ ಮಿತ್ತ್ ದರ್ತಿನೆಡ್ದ್ ತಪ್ಪಾವೊನ್ವ ಪನ್ಪಿನ ನಿರೀಕ್ಷೆಲಾ ಆನಿಡ್ದ್ ಇಜ್ಜಾಂದೆ ಪೋಂಡು.

21ಅಕುಲು ದಿಂಜ ದಿನ ವಣಸ್‌ದಾಂತೆ ಇತ್ತಿ ಬೊಕ್ಕ ಪೌಲು ಅಕ್ಲೆ ನಡುಟು ಉಂತೊಂದು “ಜನೊಕುಲೇ ನಿಕುಲು ಕ್ರೇತೊಡ್ದು ಪಿದಾಡ್ದ್ ಈ ಕಷ್ಟನಷ್ಟೊಲೆಗ್ ಗುರಿ ಆವಂದಿಲೆಕ್ಕ ಎನ ಪಾತೆರೊನು ಕೇನೊಡಿತ್ತ್‌ಂಡ್.

22ಇತ್ತೆ ನಿಕುಲು ಧೈರ್ಯೊಡು ಉಪ್ಪೊಡು ಅಂದ್‌ದ್ ನಿಕ್ಲೆಗ್ ಪನ್ಪೆ; ಕಪ್ಪಲ್ ನಷ್ಟ ಆದ್ ಪೋವು ಆಂಡ ಒರಿಯನಲಾ ಪ್ರಾಣ ನಷ್ಟ ಆವಂದ್.

23ಯಾನ್ ವಾ ದೇವೆರೆನ್ ನಂಬುದು ಸೇವೆ ಮಲ್ಪುವೆನಾ ಅವ್ವೇ ದೇವೆರೆಡ್ದ್ ಒರಿ ದೂತೆ ಕೋಡೆ ರಾತ್ರೆಡ್ ಎನ ಕೈತಲ್‌ ಉಂತುದು,

24‘ಪೌಲು ಪೋಡ್ಯಡ, ಈ ಚಕ್ರವರ್ತಿನ ಎದುರು ಉಂತೊಡು; ಉಂದತ್ತಂದೆ ನಿನ ಒಟ್ಟುಗು ಈ ಕಪ್ಪಲ್‌ಡ್ ಪ್ರಯಾಣ ಮಲ್ಪುನಾಕುಲೆನ ಮಾತೆರೆನ ಪ್ರಾಣೊನು ದೇವೆರ್ ದಯ ತೋಜಾದ್ ಒರಿಪಾದೆ,’ ಅಂದ್‌ದ್ ಪಂಡೆ.

25ಅಂಚಾಯಿನೆಡ್ದ್ ಜನೊಕುಲೆ, ಧೈರ್ಯವಾದುಪ್ಪುಲೆ. ಎಂಕ್ ಪಂಡಿಲೆಕ್ಕನೇ ಆಪುಂಡು ಅಂದ್‌ದ್ ದೇವೆರೆನ್ ನಂಬುವೆ.

26ಆಂಡ ನಮ ಒವ್ವಾಂಡ ಒಂಜಿ ದ್ವೀಪದ ಬರಿ ಸೇರೊಡು,” ಅಂದ್‌ದ್ ಪಂಡೆ.

27ಪದ್ನಾಲನೆ ರಾತ್ರೆ ಬತ್ತಿ ಬೊಕ್ಕ ಎಂಕುಲು ಆದ್ರಿಯ ಕಡಲ್ಡ್ ಅಂಚಿ ಇಂಚಿ ತೆಲಾವೊಂದು ಪೋವೊಂದುಪ್ಪುನಗ ಸುಮಾರ್ ನಡು ರಾತ್ರೆಡ್ ನಾವಿಕೆರ್ ಬತ್ತ್‌ದ್ ಭೂಮಿಗ್ ಕೈತಲಾಯೆರ್ ಅಂದ್‌ದ್ ಎನ್ನ್‌ದ್

28ಲಪ್ಪು ಗುಂಡುನು ಜಪುಡಾದ್ ನಲ್ಪ ಮೀಟರ್ ಉದ್ಧ ಅಂದ್‌ದ್ ತೂಯೆರ್. ಒಂತೆ ಪೊರ್ತುಡ್ದು ಬೊಕ್ಕ ಅಕುಲು ಕುಡ ಲಪ್ಪು ಗುಂಡುನು ಜಪುಡ್ದು ತೂನಗ ಮುಪ್ಪ ಮೀಟರ್ ಉದ್ಧ ಅಂದ್‌ದ್ ಗೊತ್ತಾಂಡ್.

29ಪಾದೆದ ಜಾಗ್‌ನ್ ತಾಂಟುವ ಅಂದ್‌ದ್ ಪೋಡಿದ್ ಕಪ್ಪಲ್‌ದ ಪಿರವುಡ್ದು ನಾಲ್ ಲಂಗರ್ ಬುಡ್ದು ಏಪ ಬೊಲ್ಪಾವು ಅಂದ್‌ದ್ ಪ್ರಾರ್ಥನೆ ಮಲ್ತೊಂದಿತ್ತೆರ್.

30ಆಂಡ ನಾವಿಕೆರ್ ದುಂಬುಡು ಲಂಗರ್ ಪಾಡೊಡು ಪನ್ಪಿನ ನೆವೊಡ್ದು ಓಡೊನು ಕಡಲ್ಡ್ ಜಪುಡಾದ್ ಕಪ್ಪಲ್‌ನ್ ಬುಡ್ದು ತಪ್ಪಾವೊನಿಯೆರೆ ಪ್ರಯತ್ನ ಮಲ್ಪುನಗ

31ಪೌಲು ಶತಾಧಿಪತಿಗ್ಲಾ ಸಿಪಾಯಿಲೆಗ್ಲಾ, “ಮೊಕುಲು ಕಪ್ಪಲ್‌ಡ್ ಉಂತುಜೆರ್ಡ ನಿಕ್ಲೆ ಪ್ರಾಣ ಒರಿಯಂದ್,” ಅಂದ್‌ದ್ ಪಂಡೆ.

32ಅಪಗ ಸಿಪಾಯಿಲು ಓಡದ ಬಲ್ಲ್‌ನ್ ಕಡ್ತ್‌ದ್ ಅವು ಬೂರ್ದು ಪೋಪಿಲೆಕ್ಕ ಮಲ್ತೆರ್.

33ಪುಲ್ಯ ಆಪಿನಾತೆಗ್ ಪೌಲು ದಾಲಾಂಡಲಾ ತಿನಸ್ ದೆತ್ತೊನೊಡು ಅಂದ್‌ದ್ ಮಾತೆರ್‌ನ್ಲಾ ಒತ್ತಾಯ ಮಲ್ತೆ, “ನಿಕುಲು ಈ ಪೊರ್ತುಗು ಪದ್ನಾಲ್ ದಿನೊಡ್ದಿಂಚಿ ಕಾತೊಂದು ತಿನಸ್ ದಾಲಾ ದೆತ್ತೊನಂದೆ ಉಪವಾಸೊಡೇ ಉಪ್ಪುನೆಡ್ದಾದ್

34ತಿನಸ್ ದೆತ್ತೊನೊಡು ಅಂದ್‌ದ್ ನಿಕ್ಲೆಡ ಕೇನೊನ್ವೆ. ಉಂದು ನಿಕ್ಲೆನ ಜೀವ ರಕ್ಷಣೆಗ್ ಅಗತ್ಯ. ನಿಕ್ಲೆನ ಏರೆನಲಾ ತರೆಡ್ದ್ ಒಂಜಿ ಕುಜಲ್‌ಲಾ ತಾಲಂದ್,” ಪಂಡೆ.

35ಅಂಚ ಪಂಡ್ದ್ ಒಂತೆ ರೊಟ್ಟಿನ್ ದೆತ್ತೊಂದು ಮಾತೆರೆನ ಎದುರುಡು ದೇವೆರೆನ್ ಸುಗಿತ್‌ದ್ ಅವೆನ್ ಪೊಲ್ತುದು ತಿನಿಯೆರೆ ಸುರು ಮಲ್ತೆ.

36ಅಪಗ ಮಾತೆರ್ಲಾ ಧೈರ್ಯ ಮಲ್ತೊಂದು ಅಕುಲುಲಾ ತಿನಸ್‌ನ್ ದೆತ್ತೊಂದು ತಿಂದೆರ್.

37ಎಂಕುಲು ಮಾತ ಕೂಡ್ದು ಆ ಕಪ್ಪಲ್‌ಡ್ ಇರ್ನೂತ ಎಳ್ಪತ್ತಾಜಿ ಜನ ಇತ್ತ.

38ಬೋಡಾಯಿನಾತ್ ತಿಂದಿ ಬೊಕ್ಕ ಗೋದಿನ್ ಕಡಲ್‌ಗ್ ದಕ್ಕ್‌ದ್ ಕಪ್ಪಲ್‌ನ್ ಹಗುರ ಮಲ್ತೆರ್.

39ಪುಲ್ಯ ಆಯಿ ಬೊಕ್ಕ ಆ ದೇಶದ ಗುರ್ತ ತಿಕ್ಕಿಜಿ. ಆಂಡ ಪೊಯ್ಯೆದ ದಡತ್ತ ಮಿತ್ತ್ ಕಪ್ಪಲ್‌ನ್ ಕೊನುಪೋಯೆರೆ ಆಲೋಚನೆ ಮಲ್ತೆರ್.

40ಬೊಕ್ಕ ಅಕುಲು ಲಂಗರ್‌ಲೆನ್ ಕಡ್ತ್‌ದ್ ಕಡಲ್‌ಡೇ ಬುಡ್ದು ಚುಕ್ಕಾಣಿದ ಬಲ್ಲ್‌ಲೆನ್ ಗಿರ್ತ್‌ದ್ ಮಲ್ಲ ಕುಂಟುನು ಗಾಳಿಗ್ ದೆರ್ತ್ತ್ ಕಟ್ಟ್‌ದ್ ಕಪ್ಪಲ್‌ನ್ ಕರೆಕ್ ನಡಪಾಯೆರ್.

41ಆಂಡ ನಡುಟು ಪೊಯ್ಯೆದ ರಾಶಿಗ್ ಕಪ್ಪಲ್ ತಾಂಟ್‌ದ್ ಕಪ್ಪಲ್‌ಗ್ ದುಂಬು ಪೋವರೆ ಆಯಿಜಿ ಬೊಕ್ಕ ಮಲ್ಲ ಮಲ್ಲ ಶೆರೆಕ್ಕುಲು ಕಪ್ಪಲ್‌ದ ಪಿರವುಡು ಲಂಗರ್‌ಗ್ ಹಾಕ್‌ದ್ ಕಪ್ಪಲ್ ಚೂರ್ಚೂರ್ ಆಯೆರೆ ಸುರು ಆಂಡ್. ಪಿರವುದ ಮರ್ಗಿಲ್ ಅಲೆತ್ತ ರಭಸೊಗು ದರಿಯೊಂದು ಬತ್ತ್ಂಡ್.

42ಆಂಡ ಬಂದಿವಾನೆರೆಡ್ ಕೆಲೆವೆರ್ ನೀಂದ್‌ದ್ ತಪ್ಪಾವೊನುವೆರ್ ಅಂದ್‌ದ್ ಸಿಪಾಯಿಲು ಅಕ್ಲೆನ್ ಕೆರೊಡು ಅಂದ್‌ದ್ ಆಲೋಚನೆ ಮಲ್ತೆರ್.

43ಆಂಡ ಶತಾಧಿಪತಿ ಪೌಲುನು ಒರಿಪಾವೊಡು ಅಂದ್‌ದ್ ಆಸೆ ಮಲ್ತ್‌ದ್ ಅಕ್ಲೆನ ಆಲೋಚನೆಲೆನ್ ಬೊಡ್ಚಿ ಅಂದ್‌ದ್ ನೀಂದೆರೆ ಆಪಿನಾಕಲು ಕಪ್ಪಲ್‌ಡ್ದ್ ಲೈತ್‌ದ್ ಬೇಗನೇ ಕಡಲ್ದ ಕರೆಕ್ ಪೋವೊಡು ಅಂದ್‌ದ್ ಅಪ್ಪಣೆ ಕೊರಿಯೆ.

44ಬಂದಿವಾನೆರೆಡ್ ಕೆಲೆವೆರ್ ಪಲಯಿದ ಮಿತ್ತ್, ಕೆಲೆವೆರ್ ಕಪ್ಪಲ್‌ದ ತುಂಡುದ ಮಿತ್ತ್ ನೀಂದ್‌ದ್ ಪೋವೊಡು ಅಂದ್‌ದ್ ಅಪ್ಪಣೆ ಕೊರಿಯೆ. ಈ ರೀತಿಡ್ ಮಾತೆರ್ಲಾ ಜಾಗ್ರತೆಡ್ ಸೈಯಂದೆ ಕರೆಕ್ ಸೇರಿಯೆರ್.

← Chapter 26 Jump to: Chapter 28 →