Hebrews 12

Tswana (BAEBELE e e Boitshepo) 1992

← Chapter 11 Jump to: Chapter 13 →

1Ke gone, e re ka re dikanyeditswe ke boidiidi jo bo kalokalo jwa basupi, a le rona re latlheng bokete bongwe le bongwe, le boleo jo bo bofefo go re rareetsa, mme a re sianeng ka bopelotelele tshiano e re e beilweng pele,

2re ntse re lebile kwa go Jesu, mosimolodi le mowetsi wa tumelo ya rona, yo e rileng ka boitumelo jo o bo beetsweng pele a itshokela mokgoro, a nyatsa ditlhong, mme a dula ka fa ntlheng ya letsogo le legolo la setulo sa Modimo sa bogosi.

3A lo ke lo akanyeng ene yo o itshoketseng kganelo e e kalokalo ya baleofi ba ba ikganetsang, gore lo tle lo se ka lwa lapa, lwa ngodiega mo meweng ya lona.

4Go ganela ga lona ga go ise go ko go fitlhe mo go tshologeng madi, lo ganela le boleo.

5Lo bile lo lebetse tao e e buang le lona jaaka bana, e re: “Morwaaka, se nyatse kwatlhao ya Morena, o bo o se ngodiege fa o kgalemelwa ke ene;

6gonne yo Morena o mo ratang o a tle a mo otlhaye, a kgwathise ngwana mongwe le mongwe yo o mo amogelang.”

7Kwatlhao ke yone e lo e itshokelang. Aitse Modimo o lo direla jaaka bana; gonne ngwana ke ofe yo rraagwe o sa mo otlhayeng?

8Mme fa lo sa bone kwatlhao e botlhe ba e bonang, lo bo lo le bana ba dikgora, e seng bana sebele.

9Gape, re ne re na le borraetsho ba nama ba ba re otlhaileng, mme ra ba sisimoga. Bogolo thata a ga re ketla re nna kutlo mo go ene Rara wa mewa, ra tshela?

10Gonne le gale bone ba re otlhaile ka malatsinyana, ka fa ba ratileng ka teng; mme ene o re gapela kwa molemong, e bong gore re abelwe boitshepo jwa gagwe.

11Mo bakeng lono, e kete kwatlhao yotlhe e ntse jaaka e kete ga e na boitumediso, fa e se tlhokofatso fela; le fa go ntse jalo, e a re kwa morago ba ba e rutintshitsweng, e ba ungwele loungo lwa kagiso, e bong loungo lwa tshiamo.

12Ke gone, tsholetsang mabogo a a lepeletseng, le mangole a a reketlang,

13lo direle dinao tsa lona ditsela tse di siameng, gore se se tlhotsang se se ka sa lokologa, bogolo se tle se sidilege.

14Latelang kagiso le batho botlhe, le boitshepiso jo go seng motho ope yo o tlaa bonang Morena kwa ntle ga jone.

15Lo ntse lo iketse sedi, e se re kgotsa go bo go le motho mongwe yo o tlhaelang tshegofatso ya Modimo; e se re kgotsa modi mongwe o o galakang wa mela, wa lo tshwenya, mme batho ba le bantsi ba leswefadiwa ka gone;

16gore e se re kgotsa go bo go le mogokafadi, le fa e le motho yo o tlhapatsang, jaaka Esau, yo o lesitseng botsalwapele jwa gagwe jwa rekwa ka sejonyana se se kgorwang gangwe fela.

17Gonne lo a itse le gone, jaaka e rile kwa morago ka a eletsa go ja letlhogonolo boswa, a ganwa, le fa a le batlile ka tlhoafalo le ka dikeledi – gonne a se ka a bona ka fa o ka go dirololang ka teng.

18Gonne ga lo a tla mo thabeng e e nang le go angwa, e e tukang molelo, le fa e le mo bontshong, le fa e le mo lefifing, le fa e le mo ledimong la phefo,

19le fa e le mo tumong ya lonaka, le mo kodung ya mafoko; e le kodu e ba ba e utlwileng ba rapetseng, gore go se ka ga tlhola go buiwa lefoko lepe nabo.

20Gonne ba ne ba retelelwa ke go itshokela se se laotsweng, sa go re: “Fa se e leng setshedi fela se ka ama thaba, a se kgobotlediwe ka maje.”

21Panola ya gone ya bo e boitshega thata, Moše a ba a tla a re: “Ke boifa thata, ke bile ke a roroma.”

22Mme lona lo tsile mo thabeng ya Sione, le mo motseng wa Modimo o o tshedileng mo Jerusalema wa selegodimo, le mo masomosomong a a se nang palo a baengele,

23mo pitsong e kgolo ya botlhe fela, le mo phuthegong ya batsalwapele ba ba kwadilweng kwa legodimong, le mo Modimong Moatlhodi wa botlhe, le mo meweng ya basiami ba ba dirilweng boitekanelo.

24Le mo go Jesu motsereganyi wa kgolagano e ntšha, le mo mading a kgatsho a a itseng go bua go gaisa a ga Abele.

25Lo bo lo bone gore lo se ka lwa gana yo o buang. Gonne fa bao ba se ka ba falola jale, ka ba gana yo o tlhagisang a le mo lefatsheng, bogolo thata rona ga re ketla re falola, ba re fularelang ene yo o tlhagisang a le kwa legodimong;

26yo lentswe la gagwe le reketlisitseng lefatshe jale; gompieno o boletse a re: “Ke sa ntse ke tlaa roromisa gangwe fela, e seng lefatshe fela, mme le lone legodimo.”

27Mme lefoko le, la go re: “Gangwe fela,” le kaya go tlosiwa ga dilo tse di reketlang, jaaka ga dilo tse di bopilweng, gore dilo tse di se kang tsa reketla di sale.

28Ke gone, e re ka re amogela bogosi jo bo sa ka keng jwa reketlisiwa, a re nneng le tshegofatso e re ka dirang tiro e e kgatlhang Modimo ka yone, ka tshisimogo le poifo;

29gonne Modimo wa rona ke molelo o o lailang.

← Chapter 11 Jump to: Chapter 13 →