Hebrews 8

Tswana (BAEBELE e e Boitshepo) 1992

← Chapter 7 Jump to: Chapter 9 →

1Jaana mo dilong tse re di buang, tshobokanyo ya tsone ke e, go re: Re na le moperesiti yo mogolo yo o ntseng jalo, yo o dutseng ka fa ntlheng ya letsogo le legolo ga setulo sa bogosi sa Borena kwa magodimong,

2e le modiredi wa felo ga boitshepo, le wa motlaagana wa ammaaruri o Morena o o tlhomileng, e seng motho.

3Gonne moperesiti yo mogolo mongwe le mongwe o beelwa go isa dineo le ditlhabelo; ke gone, go ne go tshwanetse fa moperesiti yo mogolo yo, le ene a ba a na le sengwe se o se isang.

4Jaana fa a ka bo a le mo lefatsheng, o ka bo a se moperesiti gope, ka gobo go na le ba ba isang dineo ka fa molaong.

5E le ba ba direlang se e leng malebela le moriti wa dilo tsa selegodimo, fela jaaka Moše a laiwa ke Modimo jale, ka a tlaa tloga a dira motlaagana; gonne wa re: “Bona, o dire dilo tsotlhe ka fa sekaong se o se bontshitsweng kwa thabeng.”

6Mme jaanong, ene o bonye tirelo e e gaisang, jaaka a bile a le motsereganyi wa kgolagano e e molemo bogolo, e e theilweng mo dipolelong tsa tsholofetso tse di molemo bogolo.

7Gonne fa kgolagano eo ya pele e ka bo e le e e se nang molato, go ka bo go ne go se ka ga senkelwa ya bobedi bonno.

8Gonne e rile o bona batho ba one molato, wa bua wa re: “Bonang, metlha e etla,” go bua Jehofa, “e ke tlaa dirang kgolagano e ntšha le ba ntlo ya ga Iseraele, le ba ntlo ya ga Juta ka yone.

9E seng ka fa kgolaganong e ke e dirileng le borraabo, jale mo tsatsing le ke ba tshwereng ka seatla go ba ntsha mo lefatsheng la Egepeto ka lone; gonne ga ba a ka ba tlhomama mo kgolaganong ya me, le nna ga ke a ka ka ba tlhokomela,” go bua Jehofa.

10“Gonne e ke yone kgolagano e ke tlaa e dirang le ba ntlo ya Iseraele morago ga metlha eo,” go bua Jehofa; “ke tlaa tsenya melao ya me mo mogopolong wa bone, ke e kwala le mo pelong tsa bone; ke tlaa nna Modimo wa bone, le bone ba tlaa nna batho ba me.

11Ga ba ketla ba rutana, mongwe le mongwe mogae ka ene, le mongwe le mongwe wa ga gabo, ba re: ‘Itse Jehofa;’ gonne botlhe ba tlaa nkitse, go tswa mo go yo mmotlana go ya kwa go yo mogolo mo go bone.

12Gonne ke tlaa nna boutlwelobotlhoko ka ga ditshiamololo tsa bone le dibe tsa bone, ga nketla ke tlhola ke di gopola.”

13E re ka o bua o re: “Kgolagano e ntšha,” ke go re, ya pele, o e dirile kgologolo. Se se leng segologolo mme se onala, se bo se le gaufi le go nyelela.

← Chapter 7 Jump to: Chapter 9 →