Hebrews 7

Tswana (BAEBELE e e Boitshepo) 1992

← Chapter 6 Jump to: Chapter 8 →

1Gonne motho yo Melekiseteke, kgosi ya Saleme, moperesiti wa Modimo Mogodimodimo, yo o kgatlhantshitseng Aberahame, ka a fulara a tswa kwa polaong ya dikgosi, a mo segofatsa;

2yo Aberahame o bileng a mo kgethela sa bosome sa dilo tsotlhe, yo e rileng pele, fa go phuthololwa, ke go re: “Kgosi ya tshiamo”, gape ke go re: “Kgosi ya Saleme”, ke go re: “Kgosi ya kagiso”,

3a se na rraagwe, a se na mmaagwe, a sa balwe ka losika lope, a se na fa metlha ya gagwe e simologang teng, le fa botshelo bo khutlang teng, a dirilwe mo tshwanong ya Morwa Modimo – ene o ntse moperesiti ka metlha yotlhe.

4A lo ke lo gopoleng bogolo jwa motho yo Aberahame, tlhogo ya morafe, o mo ntsheditseng sa bosome sa dikgapo tse dikgolo lekgetho.

5Le gale ba e leng bana ba ga Lefi, ba ba tsayang boemo jwa baperesiti, ba na le taolo ya go re ba kgethelwe sa bosome ke batho ka fa molaong, ke go re, mo go ba ga bone, le fa bao ba dule mo mankopeng a ga Aberahame.

6Mme ene yo losika lwa gagwe lo sa balweng ka bone, o kgethile tsa bosome mo go Aberahame, a segofatsa ene yo o nang le dipolelo tsa tsholofetso.

7Mme ga go na kgang, yo mmotlana o tlaa segofadiwa ke yo o molemo bogolo.

8Mono batho ba ba swang ba amogela tsa bosome; jale e ne e le mongwe yo go supilweng ka ga gagwe fa a tshedile.

9Go ka twe, le ene Lefi, yo o amogelang tsa bosome, o ntshitse tsa bosome ka Aberahame.

10Gonne o ne a sa ntse a le mo mankopeng a ga rraagwe, jale ka Melekiseteke a kgatlhana nae.

11Jaana fa go ka bo go ne go na le boitekanelo ka boperesiti jwa Selefi – gonne batho ba amogetse molao mo sebakeng sa jone – go ne go sa dirwang ka moperesiti o sele yo o tlaa tsogang, e le yo o ka fa mokgweng wa ga Melekiseteke, a sa kaiwe ka fa mokgweng wa ga Arone?

12Ka go bo fa boperesiti bo fetogile, molao le one o bo o na le go fetolwa.

13Gonne ene yo dilo tse di buiwang ka ga gagwe ke wa lotso lo sele, lo go iseng go ke go nne le motho ope wa lona yo o kileng a dira fa sebesong.

14Gonne go a bonala fa Morena wa rona a dule mo go Juta; e le lotso lo Moše o se kang a bua sepe ka ga lone ka ga baperesiti.

15Mo re go buang, go bile go bonala bogolo thata, fa e ka re ka fa tshwanong ya ga Melekiseteke go bo go tsoga moperesiti yo mongwe.

16Yo o beilweng e seng ka fa molaong wa taolo ya senama, mme e le ka fa nonofong ya botshelo jo bo se nang bokhutlo,

17gonne go supilwe ka ga gagwe ga twe: “O moperesiti ka bosakhutleng, ka fa mokgweng wa ga Melekiseteke.”

18Gonne go bo go na le go tlhomolola taolo nngwe ya gale ka ntlha ya bokoa le bo se nang thuso jwa yone.

19(Gonne molao ga o a ka wa dira sepe sa itekanela,) go bile go na le go lere mo boemong jwa yone tsholofelo e e gaisang, e re atamelang Modimo ka yone.

20E re ka go sa dirwe kwa ntle ga go ikana,

21(gonne le gale bone bale, ba dirilwe baperesiti kwa ntle ga ikano; mme ene o dirilwe ka ikano, a dirwa ke ene yo o buileng ka ga gagwe a re: “Morena o ikanne, mme ga a ketla a fetoga, a re: ‘O moperesiti ka bosakhutleng.’ ”)

22ka bokalo le gone Jesu o tsile a nna moemedi wa kgolagano e e molemo bogolo.

23Bone le gale, ba dirilwe baperesiti ba le bantsi mo palong, ka gobo ba idiwa ke loso go nnela ruri.

24Mme ene, e re ka a ntse ka bosakhutleng, boperesiti jwa gagwe ke jo bo sa ka keng jwa fetoga.

25Ke gone ka moo le gone o nonofileng go bolokela ruri ba ba atamelang Modimo ka ene, ka a ntse a tshedile ka metlha yotlhe go ba rapelela.

26Gonne re ne re tshwanetswe ke moperesiti yo mogolo, yo o ntseng jalo, a le boitshepo, a se na boleo, a se na leswe, a lomologanye le baleofi, mme a goleditswe godimo ga magodimo;

27e le yo go sa batlegeng gore a etse baperesiti ba bagolo bale, go tla a isa ditlhabelo ka malatsi otlhe, lwa ntlha ka ga dibe tse e leng tsa gagwe, morago ka ga dibe tsa batho; gonne mo o go diretse ruri gangwe fela, jale ka go ikisa ene setlhabelo.

28Gonne molao o baya batho baperesiti ba bagolo, e le ba ba nang le bokoa, mme lefoko la ikano le le duleng kwa morago ga molao, le baya Morwa Modimo, a itekanetse ka bosakhutleng.

← Chapter 6 Jump to: Chapter 8 →