Proverbs 17

Tsonga Xitsonga (Bibele) 1929

← Chapter 16 Jump to: Chapter 18 →

1Swikoko ntsena, laha ku nga ni ku rhula, Swi tlula hi ku nandziha yindlu leyi teleke hi tinyama, laha timholovo ti nga kona.

2Nandza wa vutlhari u ta fuma n'wana la khomisaka tingana, U ta dya ndzhaka ni vana va hosi ya yena.

3Xirhengele i xa ntsopfu ni swa nsuku, Kambe la ringetaka timbilu, i Yehovha.

4La endlaka swo biha u yingisela milomu yo biha, Ni muhembi u yingisela ririmi ro hleva.

5La hlekaka xisiwana u sola la n'wi vumbeke, Ni la tsakelaka makhombo ya van'wana a nga ka a nga poni eku biweni.

6Vatukulu i xidlodlo xa lava dyuhaleke, Ku twala ka vana ku huma eka vatata wa vona.

7Marito yo saseka ya ku tikurisa a ma lulameli xihunguki, Ngopfu marito ya vunwa ma tshuna nkulukumba.

8Tinyiko i ribye ra risima eka loyi a ti nyikaka. Hinkwako laha a nghenaka kona wa dzuneka.

9La nga fihla milandzu u lava rirhandzu; La yi pfuxaka u nghenisa ku hambana exikarhi ka lava rhandzanaka.

10Munhu wa ku anakanya u twa ku tshinyiwa Ku tlula xihunguki loko xi biwa ka dzana.

11Munhu wa lunya u ni ximonyo, Kambe u ta rhumeriwa ntsumi ya tihanyi.

12Ku hlangana ni bere leyi tekeriweke vana va yona, Ku tlula ku hlangana ni xihunguki eku hlanyeni ka xona.

13Ku biha ku nga ka ku nga suki endlwini ya munhu La tlheriselaka swo saseka hi ku biha.

14Ku sungula ku hambana, i ku boxa ka ndhambi; Hikwalaho, loko mholovo yi nga si sungula, suka.

15La yimelelaka la nga ni nandzu, ni la kanetaka la nga riki na nandzu, Ha vambirhi i manyala eka Yehovha.

16Mali yi pfuna yini evokweni ra xihunguki-ke? Xana i ku xava vutlhari-ke? Kambe xi pfumala mbilu.

17Munghana wa munhu wa n'wi rhandza hi masiku; I makwavo emakhombyeni.

18La nga riki na ku anakanya, hi la khomanaka ni un'wana hi mavoko, A tiboha hi nandzu wa warikwavo.

19La rhandzaka timholovo u rhandza xidyoho, La kurisaka nyangwa ya yena u lava ku lova.

20Wa mbilu yo soholoka a nga ka a nga kumi ku kateka, Ni wa ririmi ro soholoka u ta wela eku biheni.

21La velekaka xihunguki u ta fuwa tingana, Ni tata wa singe a nga ka a nga tsaki.

22Mbilu leyi tsakeke i murhi lowu tiyisaka, Kasi moya lowu dyaka mbitsi wu omisa marhambu.

23Lowo biha u amukela nyiko leyi fihliweke etingubyini Ku voyamisa tindlela to lulama.

24Wa ku anakanya u langutisisa vutlhari emahlweni ka yena, Kambe mahlo ya xihunguki ma rhalarhala emakumu ya misava.

25Xihunguki xa n'wana u khomisa tata wa yena tingana, U dyisa mbitsi la n'wi velekeke.

26Ku rihisa munhu la pfumalaka nandzu a swi saseki, Hambi ku ri ku ba lavakulu hikwalaho ka ku lulama ka vona.

27La tikhomaka emaritweni u tiva ku tlhariha, La tisivaka nomu u ni ku twisisa.

28Swi tsandza ni rihuhu loko ri miyela, ri nga vuriwa la tlhariheke, Ni la putsamaka nomu i munhu wa ku anakanya.

← Chapter 16 Jump to: Chapter 18 →