Proverbs 3

Tsonga Xitsonga (Bibele) 1929

← Chapter 2 Jump to: Chapter 4 →

1N'wananga, u nga rivali nawu wa mina, Mbilu ya wena a yi hlayise ku lerisa ka mina;

2Hikuva swi ta engetela masiku ya wena, Ni malembe ya ku hanya ka wena, ni ku rhula ka wena.

3Vunene ni ntiyiso swi nga tshuki swi avana na wena; Titsimbe swona enhan'wini ya wena, u swi tsala embilwini ya wena:

4U ta kuma tintswalo ni xichavo, Emahlweni ka Xikwembu ni ka vanhu.

5Tshemba Yehovha hi mbilu ya wena hinkwayo, U nga titshembi ku tlhariha ka wena.

6U n'wi nghenisa emakungwini ya wena hinkwawo, U ta lulamisa tindlela ta wena.

7U nga tivoni vutlhari, Chava Yehovha, u papalata swo biha;

8Wu ta va murhi enkaveni wa wena, Ni mongo emarhambyini ya wena.

9Dzunisa Yehovha hi rifuwo ra wena, Ni swirhangana swa hinkwaswo leswi ku taleleke:

10Kutani switlati swa wena swi ta tala, Swikhuvuto swa wena swi ta khapakhapa hi vhinyo yo tsokombela.

11N'wananga, u nga soli ku laya ka Yehovha, U nga heli mbilu loko u biwa hi yena;

12Hikuva loyi Yehovha a n'wi rhandzaka, wa n'wi tshinya, Kukotisa tata wa munhu a layaka n'wana loyi a n'wi tsakelaka.

13Ku katekile munhu loyi a kumaka ku twisisa, Ni loyi a kumaka vutlhari!

14Hikuva bindzu ra byona ri tlula silivhere, Ni ku andza ka byona ku tlula nsuku;

15Byi tlula tiperela hi risima, Hinkwaswo leswi navetaka a swi byi ringani.

16Ku leha ka masiku ku le vokweni ra xinene ra byona; Ku fuma ni ku twala swi le vokweni ra ximatsi.

17Tindlela ta byona i tindlela leti tsakisaka, Mitila hinkwayo ya byona yi ni ku rhula.

18I murhi wa vutomi eka lava byi fuweke, Lava byi hlayisaka va katekile.

19Yehovha u khingele misava hi vutlhari, U yimise matilo hi ku anakanya.

20Hi vutivi bya yena swidziva swa handzuka, Ni mapapa ma pfutisa mberha.

21N'wananga, leswi swi nga tshuki swi sukela mahlo ya wena; Hlayisa vutlhari ni ku twisisa.

22Swi ta va vutomi emoyeni wa wena, Ni swibombiso enhan'wini ya wena.

23Hi kona u nga ta famba u tiyile endleleni ya wena, Kutani nenge wa wena wu nga ka wu nga khunguvanyeki.

24Loko u ya eku etleleni, u nga ka u nga chavi, Ni loko u tilatile, vurhongo bya wena byi ta nandziha.

25U nga ka u nga chavi nchavo wa xipuku, Ni loko xi ri xidzedze lexi nga ta lovisa lavo biha.

26Hikuva Yehovha u ta va xitshembo xa wena, U ta ponisa nenge wa wena entlhan'wini.

27U nga ali ku endla leswinene eka loyi u nga ni mfanelo eka yena, Loko swi ri emandleni ya wena.

28U nga vuri eka warikwenu u ku: “Famba u ta vuya. Mundzuku ndzi ta ku nyika!” Kasi lexi a xi pfumalaka xi kona eka wena.

29U nga tshuki u anakanyela warikwenu leswo biha, Loko a tshamile hi ku rhula na wena.

30U nga tengisani na munhu ntsena Loko a nga ri na nandzu na wena.

31U nga tsakeli munhu wa lunya, Mikhuva ya yena, u nga teki ni wun'we.

32Hikuva munhu wo homboloka i manyala eka Yehovha, Kambe xihundla xa yena, xi na lava lulameke.

33Xirhuko xa Yehovha xi le ndlwini ya vadyohi, Kambe u katekisa yindlu ya lava lulameke.

34Vasandzi, u va sandza ngopfu, Kambe u tsetselela lava titsongahataka;

35Lavo tlhariha va ta dya ndzhaka ya xichavo, Loko swi ri swihunguki, ku twala ka swona i tingana.

← Chapter 2 Jump to: Chapter 4 →