Proverbs 23

Tsonga Xitsonga (Bibele) 1929

← Chapter 22 Jump to: Chapter 24 →

1Loko u tshamela ku dya ni mufumi, Xiya swinene lexi vekiweke emahlweni ka wena;

2U khoma mukwana enkolweni wa wena Loko u ri wa makolo;

3U nga naveli swakudya swa yena leswi xawulaka; I vuswa byo dyelela.

4U nga tikarhati ku hlengeleta rifuwo, Tshika ku anakanya rona.

5U swi langutela yini leswi hundzaka? Rifuwo ri ta mila timpapa, Ri haha ehenhla kukotisa gama.

6U nga dyi vuswa bya xivondzoki, U nga naveli swakudya swa xona leswi xawulaka;

7Hikuva hilaha xi anakanyaka embilwini ya xona, Xi tano, xi ta ku eka wena: “Dyana, u nwa!” Kambe mbilu ya xona a yi kona eka wena;

8U ta tlhela u hlanta xipandzwa lexi u xi dyeke, Ni marito layo saseka ya wena u ta lahlekeriwa hi wona.

9U nga tshuki u vulavula etindleveni ta xihunguki, Hikuva xi ta sola ku tlhariha ka timhaka ta wena.

10U nga tshineti ndzilakana wa khale, U nga tshuki u nghena ensin'wini ya xisiwana;

11Hikuva murihiseri wa xona u ni matimba, U ta xi yimela a xi lwela.

12Nyiketela dyondzo mbilu ya wena, Ni timhaka to tlhariha tindleve ta wena.

13U nga tsoni n'wana ku tshinyiwa; Hambi u n'wi xupula hi nkhavi, a nga ka a nga fi;

14U ta n'wi ba hi nkhavi u ri wena, Kutani u ta kutsula moya wa yena exivandleni xa vafi.

15N'wananga, loko mbilu ya wena yi tlhariha, Mbilu ya mina yi ta tsaka;

16Ndzi ta tsaka endzeni ka mbilu ya mina, Loko u vulavula swo lulama hi nomu wa wena.

17Mbilu ya wena yi nga tsohoki lavo biha, U hlayisa xichavo xa Yehovha hi masiku,

18Hikuva leswi taka, swa ta, Ku tshemba ka wena a ku nga endliwi swahava.

19Yingisa wena, n'wananga, u tlhariha; U fambisa mbilu ya wena endleleni leyo lulama;

20U nga toloveli munwi wa byalwa, Ni vadyi va tinyama;

21Hikuva xidakwa ni wa makolo va tivangela vusiwana; Ku rhandza vurhongo i ku tifunengeta hi switlakati.

22Yingisa tata wa wena la ku velekeke, U nga monyi mana wa wena loko a dyuharile.

23Xava ntiyiso u nga wu xavisi, Hambi byi ri vutlhari, ni dyondzo ni ku anakanya.

24Tata wa la lulameke u ta tsaka ngopfu, La velekeke n'wana wa vutlhari u ta tsaka ha yena.

25A a tsake tata wa wena, na yena, mana wa wena. A a tsake la ku velekeke!

26N'wananga, ndzi he mbilu ya wena, Mahlo ya wena a ma tsakisiwe hi ndlela ya mina.

27Hikuva nsati wa mbiri i rindzi ra ku enta, Ni nghwavava i khele ra ku manyana.

28U etlelela wanuna, swange i xiharhi, U andzisa timbabva exikarhi ka vanhu.

29Makhombo i ya mani xana? “Yoo! Mina!” I swa mani? Timholovo i ta mani? Mikosi i ya mani? Vuntswaka i bya mani? I ya mani mahlo yo tshuka?

30I swa lava tolovelaka ku nwa, Lava huwelaka vhinyo leyi pfanganeke.

31U nga languti vhinyo loko yi tshwukile, Loko yi huhuma xikhuvi, Ni loko yi chuluriwa hi ku olova.

32Makumu ya yona ma kotisa nyoka leyi lumaka, Yi tlhava kukota mhiri.

33Mahlo ya wena ma ta languta vasati va timbiri, Mbilu ya wena yi ta kanela swa ku homboloka.

34U ta kotisa munhu loyi a etlelaka exidziveni xa lwandle, Ni loyi a etlelaka exihondzweni xa byatso.

35Hi kona u nga ta ku: “Va ndzi bile â€” a ndzi twanga ku vava; Va ndzi balesile â€” a ndzi twanga nchumu! Ndzi ta pfuka rini? Ndzi ta tlhela ndzi yi lava kambe!”

← Chapter 22 Jump to: Chapter 24 →