Proverbs 27

Tsonga Xitsonga (Bibele) 1929

← Chapter 26 Jump to: Chapter 28 →

1U nga tidzunisi hi siku ra mundzuku, Hikuva a ku tivi leswi nga ta humelela hi siku rero.

2La ku dzunisaka a ve un'wana ri nga ri ririmi ra wena, A a ve un'wana, wu nga ri nomu wa wena.

3Ribye ra tika, na rona sava, Kambe ku kariha ka xihunguki ku tlula swilo leswimbirhi.

4Ku kariha ku ni nsele, ku holova i ku tala ka nambu, Loko ma ri mavondzo i mani a nga ta yima emahlweni ka wona?

5Ku tshinya ka le rivaleni, Ku tlula rirhandzu leri fihliweke.

6Timbanga leti endliwaka hi munghana ti kombisa rirhandzu ra yena, Kambe ku ntswontswa ka lava ku vengaka ka kanganyisa.

7La xurheke u nyenya vulombe; Kambe wa ndlala, swa ku bava swa nandziha eka yena.

8Munhu la fambafambaka ekule ni le kaya ka yena, U kotisa nyanyana leyi wongelaka ekule ni xisaka xa yona.

9Mafurha, ni leswi nun'hwelaka ku nandziha, swi tsakisa mbilu; Hi sweswo, ku lerisa loku humaka embilwini ya nakulobye, ka nandziha.

10U nga fularheli nakuloni, hambi a ri munghana wa tata wa wena; U nga ngheni endlwini ya makwenu siku a nga ekhombyeni; Loyi u akeke kun'we na wena u tlula makwenu la nga ekule.

11N'wananga, tlhariha, u tsakisa mbilu ya mina, Ndzi ta kuma rito ku hlamula lava ndzi rhukanaka.

12Munhu wa ku anakanya u vona khombo ra ha ta, a tisivelela; Murivali, yena, u hundza emahlweni, a rihiseriwa.

13N'wi tekeleni nguvu, hikuva u tibohile hi nandzu wa van'wana, N'wi rihiseni hikwalaho ka va le handle.

14Loyi a dzunisaka nakulobye wa ha ri mixo hi rito leri tlakukeke, Va ta ku: “Wa n'wi rhuketela.”

15Yindlu leyi pfutaka hi siku ra mpfula, Ni nsati wa timholovo, i xilo xin'we;

16La n'wi khomeke, u khomile mheho, Ni voko ra yena ra xinene ri tamele mafurha.

17Nsimbhi yi lota nsimbhi, Hi sweswo eka munhu, u hlohlotela vukari bya munhu.

18La rindzaka nkuwa u ta dya mihandzu ya wona, Ni la hlayisaka n'wini wa yena u ta dzunisiwa.

19Ku kota nghohe leyi voniwaka ematini, yi fana ni n'wini wa yona, Mbilu ya munhu yi fana ni mbilu ya munhukulobye.

20Xivandla xa vafi ni tihele a swi xurhi, Mahlo ya munhu, na wona, a ma xurhi.

21Mbita i ya ku nyukisa silivhere, ni fulo ra nsuku; Munhu u ringisa sweswo nomu lowu n'wi dzunisaka.

22Hambi u kandza xihunguki entshurini, U kandza hi musi u pfanga ni mavele lama siriwaka, Vuhunguki bya xona byi nga ka byi nga n'wi sukeli.

23Tivisisa swinene tinyimpfu ta wena ha yin'we, U hlayisa swinene mitlhambi ya wena;

24Hikuva ndzalo a hi ya malembe hinkwawo, Ni harhi ya vuhosi a yi tshami hi masiku.

25Byanyi bya susiwa, rihlaza ra humelela, Ku laviwa byanyi etintshaveni.

26Swinyimpfana swi ta va swa tinguvu ta wena, Swiphongo swi ta xava nsimu;

27Ntswamba wa timbuti swi ta va swakudya swa wena ni swa yindlu ya wena, Ni swa malandza ya wena ya xisati.

← Chapter 26 Jump to: Chapter 28 →