Proverbs 6

Tsonga Xitsonga (Bibele) 1929

← Chapter 5 Jump to: Chapter 7 →

1N'wananga, loko u tibohile hi nandzu wa warikwenu, Loko u nyikile voko ra wena ku tiyisa un'wana;

2Loko ku vula ka nomu wa wena ku ku phasile, Ni marito ya nomu wa wena ma ku bohile,

3N'wananga, endla sweswo, famba u ya tikutsula, Hikuva u le mandleni ya warikwenu; Famba, u khinsama, u tikhongelela eka warikwenu.

4U nga nyiketi mahlo ya wena vurhongo U nga pfumeleli tinxiye ta wena ti nembelela;

5U phonyoka kukota ntshembe emarindzini, Kukota nyanyana entlhan'wini wa muhloti.

6Wena lolo, yana eka vusokoti, U xiya mikhuva ya byona, u ta tlhariha.

7A byi na murisi, Hambi mukamberi, kumbe hosi;

8Byi tilunghisela swakudya swa byona hi ximumu, Byi tihlengeletela mphamo loko ku tshoveriwa.

9Wena lolo, u ta etlela ku yisa kwihi xana? U ta pfuka rini evurhongweni bya wena?

10Ku etlelanyana, ku khudzehela switsanana, Ku tilata nkarhinyana hi ku khondla mavoko!

11Vusiwana bya wena byi ta ku wonga kukotisa muendzi, Ni ndlala, kukotisa munhu la hlomeke.

12I munhu wa hava, wo homboloka, La fambaka hi nomu wa ku kanganyisa;

13A copeta mahlo, a vulavula hi milenge, A encanyeta timhaka hi tintiho;

14Mbilu ya yena yi onhakile, Yi kanela swo biha hi masiku, Yi kucetela ku hambana.

15Hikwalaho ku onhaka ka yena ku ta n'wi tshukisa, U ta lova hi nomu lowu, ku nga ri na murhi.

16Ku ni swilo swa ntlhanu na xin'we leswi vengiwaka hi Yehovha, Ndzi ri ntlhanu na swimbirhi lama nga manyala eka yena:

17I mahlo yo tikukumuxa, ni ririmi ra vunwa, Ni mavoko lama halataka ngati leyi nga riki na nandzu;

18I mbilu leyi kanelaka swo biha, Ni milenge ya matsambu leyi tsutsumelaka eku biheni.

19I mbhoni ya vunwa leyi vulaka mavunwa, Ni la pfuxaka timholovo exikarhi ka vamakwavo.

20N'wananga, hlayisa milawu ya tata wa wena, U nga fularheli dyondzo ya mana wa wena,

21U yi bohelela embilwini ya wena hi masiku, U yi tsimba enhan'wini ya wena.

22Loko u famba, yi ta ku fambisa, Ni loko u etlela, yi ta ku rindza; Loko u pfuka evurhongweni yi ta vulavula na wena.

23Hikuva xitsundzuxo i rivoningo, ni dyondzo i ku vonakala, Ku tshinya ka ku laya i ndlela ya vutomi:

24Swi ta ku chavisa nsati lowo biha, Ni ririmi ra mandzendze ra nghwavavana,

25U nga tshiki mbilu ya wena yi navela vubombi bya yena, U nga kokiwi hi tinxiye ta yena.

26Hikuva hi nsati wa mbiri, munhu u sala ni xipandzwa xa vuswa ntsena, Ni nsati wa munhu a etlelela vutomi bya risima.

27Xana munhu a nga okela makala exifuveni, Tinguvu ta yena ti nga tshwi-ke?

28Xana munhu a nga kandziya makala, Mikondzo ya yena yi nga dzuvuki xana?

29Swi endlisa sweswo eka la yaka eka nsati wa warikwavo, Mani na mani la n'wi khumbaka a nga pfumali nandzu.

30A va nyenyi muyivi loko a yiva Ku tixurhisa loko a ri ni ndlala.

31Kambe siku a khomiwaka u fanela ku riha kantlhanu na kambirhi; A ta humesa xuma hinkwaxo xa yindlu ya yena.

32La oswanaka ni wansati u heleriwe hi ku anakanya, La endlaka sweswo u lovisa moya wa yena;

33U ta kuma ku biwa, ni tingana; Ku sandziwa ka yena ku nga ka ku nga susiwi.

34Hikuva mavondzo ma karihisa wanuna, U ta pfumala tintswalo siku a tirihiselaka.

35A nga ka a nga amukeli miriho, Vukari bya yena a byi lamuriwi, hambi u humesa xuma lexo tala.

← Chapter 5 Jump to: Chapter 7 →