Proverbs 2

Tsonga Xitsonga (Bibele) 1929

← Chapter 1 Jump to: Chapter 3 →

1N'wananga loko u amukela marito ya mina, U va u tihlayisela milawu ya mina,

2Loko u rhiya ndleve ya wena ku yingisa vutlhari, U nyiketa mbilu ya wena eku yingiseni;

3Ndzi ri, loko u rilela vutivi, Loko u huwelela ku twisisa,

4Loko u swi lava kukotisa mali, U hakuta kukotisa xuma lexi fihliweke,

5Hilaha u nga ta twisisa ku chava ka Yehovha, U ta kuma ku tiva ka Xikwembu.

6Hikuva Yehovha hi yena la nyikaka vutlhari; Ku tiva ni ku twisisa swi huma enon'wini wa yena.

7U hlayisela lavo lulama ku kateka, A va xitlhangu eka lava fambaka eku lulameni.

8U tiyisa mitila ya lava fambaka hi mfanelo, U hlayisa ndlela ya lava n'wi rhandzaka.

9Hi kona u nga ta tiva ku lulama ni mfanelo. Ni ku saseka, ni mikhuva hinkwayo ya leswinene.

10Loko vutlhari byi ta nghena embilwini ya wena, Ku tiva ku ta tsakisa moya wa wena;

11Ku anakanya ku ta ku langutela, Ku twisisa ku ta ku hlayisa,

12Ku ku tshunxa endleleni leyo biha, Ni ku ku hambuxa eka lava vulavulaka swo homboloka,

13Eka lava fularhelaka ndlela yo lulama, Lava fambaka hi tindlela ta munyama,

14Lava tsakelaka ku kanganyisa, Va tsakela mikhuva yo biha,

15Valavo tindlela ta vona ti hambukeke, Ni mafambele ya vona ma hombolokeke;

16Ku ku namurhuta eka wansati wa un'wana, Eka wansati wa dlakuta la kanganyisaka hi ku vulavula ka yena,

17La fularheleke nakulobye wa vuntshwa bya yena, A rivala ntwanano wa Xikwembu xa yena.

18Kunene yindlu ya yena yi voyamele rifu, Tindlela ta yena ti yisa eka lava feke;

19Eka lava yaka eka yena, a ku na un'we la nga vuya, A khoma ndlela ya vutomi.

20Hikwalaho, famba hi mitila ya lavanene, U tiyisela endleleni ya lavo lulama.

21Hikuva lava lulameke va ta aka emisaveni, Lavo tenga va ta siyiwa kona;

22Kambe lavo biha va ta susiwa la emisaveni, Ni timbabva ti ta tsuvuriwa eka yona.

← Chapter 1 Jump to: Chapter 3 →