Proverbs 4

Tsonga Xitsonga (Bibele) 1929

← Chapter 3 Jump to: Chapter 5 →

1Vana, yingisani dyondzo ya tatana, Mi yi anakanya, mi ta kuma ku twisisa;

2Hikuva ndzi mi dyondzisa dyondzo leyinene: Mi nga tshiki tidyondzo ta mina.

3Hikuva na mina a ndzi ri n'wana wa xiviri eka tatana, N'wana la nga yexe la rhandziwaka hi manana,

4Tatana a ndzi dyondzisa, a ku eka mina: “Mbilu ya wena a yi hlayise marito ya mina; U yingisa ku lerisa ka mina, u ta hanya.

5Fuwa vutlhari, fuwa ku twisisa; U nga rivali marito ya nomu wa mina, u nga ma tshiki.

6U nga fularheli vutlhari, byi ta ku hlayisa; U byi rhandza byi ta ku hanyisa.

7Ku sungula ka vutlhari, i ku lava byona; U xava ku anakanya hi hinkwaswo leswi u nga na swona,

8Kurisa vutlhari, byi ta ku kurisa; Loko u byi namarhela, byi ta ku dzunisa,

9Byi ta ku bombisa nhloko hi xibombiso lexinene, Byi ta ku rhwexa harhi ya vuhosi yo kwetsima.”

10Yingisa, n'wananga, u amukela marito ya mina, Malembe ya ku hanya ka wena ma ta andzisiwa.

11Hikuva ndzi ku dyondzisa ndlela ya vutlhari, Ndzi ku fambisa emitileni ya ku lulama.

12Loko u famba, u nga ka u nga kamiwi milenge, Loko u tsutsuma, u nga ka u nga khunguvanyeki.

13Khoma dyondzo, u nga yi tshiki, U yi hlayisa; hikuva i vutomi bya wena.

14U nga ngheni endleleni ya va nsele, U nga kandziyi emitileni ya lavo homboloka;

15Hundzuluka, u nga kongomi kona, U hambuka, u tifambela;

16Hikuva a va yi eku etleleni va nga si endla swo biha; Va nga ka va nga kumi vurhongo loko va nga si wisa munhu.

17Hikuva vuswa lebyi va byi dyaka, i swo biha, Kambe tihanyi i vhinyo leyi va yi nwaka.

18Ndlela ya lavo lulama yi kotisa ku vonakala, Ku hatima ka kona ku engeteleka ku fikela nhlekanhi lowukulu.

19Kambe ndlela ya vadyohi yi kotisa munyama, A va tivi laha va welaka kona.

20N'wananga, yingisisa marito ya mina, U xiya timhaka ta mina.

21Ti nga suki emahlweni ya wena, U ti hlayisa embilwini ya wena;

22Hikuva i vutomi eka hinkwavo lava ti kumaka, I ku tsaka ka miri hinkwawo wa vona.

23Hlayisa mbilu ya wena ku tlurisa leswi hlayisiwaka, Hikuva i xihlovo xa vutomi.

24U alela ririmi ro homboloka, U hambana ni milomu yo kanganyisa.

25Mahlo ya wena a ma langute ma lulamile, Tinxiye ta wena a ti pfuleke hi ku lulama.

26Anakanya ndlela ya nenge wa wena, Tindlela ta wena hinkwato ti ta tiya.

27U nga tshuki u hambukela exineneni kumbe eximatsini, U tshineta nenge wa wena ekule ni leswo biha.

← Chapter 3 Jump to: Chapter 5 →