Proverbs 10

Chinese TTVH 2021 (現代台語譯本漢字版)

← Chapter 9 Jump to: Chapter 11 →

1所羅門的箴言：智慧的子互老父歡喜；愚戇的子互老母憂悶。

2不義的錢財攏無利益；只有公義會救人脫離死亡。

3上主𣍐互義人枵餓；伊會破壞歹人的企圖。

4貧憚互人散赤；骨力互人富足。

5照時收成的是聰明人；收割的時愛睏的是敗家子。

6義人的頭殼頂有祝福；歹人的嘴藏強暴。

7義人的名聲受稱讚；歹人一定留臭名。

8心內聰明，會聽受命令；嘴講戇話，一定失敗。

9行路正直，腳步就安穩；行為不正，到尾會露現。

10惡意使目尾，製造糾紛；坦白苦勸人，促進和平。

11義人的嘴是活命的水泉；歹人的嘴藏強暴。

12怨恨惹起紛爭；仁愛遮蓋攏總的過失。

13明理的人嘴內有智慧；無知的人的尻脊有箠仔便便啲等。

14智慧的人積聚智識；戇人的嘴真快致到失敗。

15財富是好額人的保障；貧困是散赤人的災難。

16義人的報賞是性命；歹人的工錢是刑罰。

17聽受勸戒，行活路；棄拺責備，行迷路。

18掩蓋怨恨的人，嘴講白賊；四界造謠的是戇人。

19厚話難免有過失；約束嘴舌才是聰明。

20義人的舌親像純的銀；歹人的心無價值。

21義人的嘴培養真多人；戇人因為無知死亡。

22上主賜的福氣互人富足，內面無摻憂苦。

23愚戇的人看作惡做快樂；明理的人看智慧做歡喜。

24歹人所驚的，會臨到伊；義人所意愛的，會得著。

25狂風吹過，歹人就消失；義人會永遠安穩徛在。

26差貧憚人做代誌，親像嘴齒互醋酸著，目睭互煙燻著。

27敬畏上主會加添日子；歹人的年歲會減少。

28義人的向望帶來歡喜；歹人的期待到尾落空。

29上主的道路對正直的人是保障，對做歹的人是毀滅。

30義人永遠𣍐動搖；歹人𣍐當徛起佇應允的地。

31義人的嘴發出智慧；歪曲是非的舌會受割斷。

32義人講話合宜；歹人出嘴歪曲是非。

← Chapter 9 Jump to: Chapter 11 →