Proverbs 19

Chinese TTVH 2021 (現代台語譯本漢字版)

← Chapter 18 Jump to: Chapter 20 →

1行為正直的散赤人較贏講話詭詐的戇人。

2熱心無智識毋好；硞硞闖顛倒會走毋著路。

3人因為愚戇破壞家己的前途；伊的心顛倒怨嘆上主。

4好額，朋友就加真多；散赤，朋友就攏離開。

5作偽證一定受刑罰；講白賊𣍐當逃脫責罰。

6有權的，人人給伊扶挺；慷慨的，人人做伊的朋友。

7散赤人連兄弟都厭惡，朋友閣較會離開伊；伊趇欲及人講話，人毋插伊。

8有智慧才會曉疼惜家己的性命；珍惜智識會得著福氣。

9作偽證一定受刑罰；講白賊會滅亡。

10戇人生活奢華無合；僕人管轄主人閣較無應該。

11人有見識就𣍐快受氣；無追究人的過失是家己的光榮。

12王的受氣親像獅大聲哮；伊的恩惠親像草頂的露水。

13子戇是老父的災禍；某吵鬧親像雨水㴙㴙滴。

14厝宅財產是祖公所留；賢慧的某是上主所賜。

15貧憚互人睏重眠；懶屍的人會枵餓。

16遵守誡命會保全家己的性命；無致意上主的路會致到死亡。

17賑濟散赤人是借互上主，上主會照伊的所做還伊。

18趁猶有向望，著管教家己的子，毋拘毋通過頭煞給伊害死。

19𠢕發大受氣的人一定受處罰；若欲救伊，一定加了工。

20著聽苦勸受教示，互你到尾有智慧。

21人心內有真多計劃，只有上主的旨意會實現。

22貪心互人致到見笑；寧可散赤嘛無愛白賊。

23敬畏上主會得著性命；伊會安居樂業，𣍐抵著災禍。

24貧憚的人手伸到盤裡，嘛毋肯提到嘴。

25拍自高自大的人，會互戇直的人得著教示；責備明理的人，會互伊得著智識。

26歹款待老父，趕老母出去的，此款子帶來見笑，留臭名。

27我的子啊，你若無繼續聽教示，會偏離智識的話。

28作偽證是啲戲弄公平；歹人用罪惡做飯食。

29刑罰是為著自高自大的人準備；鞭拍是為著戇人的尻脊骿安排。

← Chapter 18 Jump to: Chapter 20 →