Proverbs 11

Chinese TTVH 2021 (現代台語譯本漢字版)

← Chapter 10 Jump to: Chapter 12 →

1欺騙的天秤，上主厭惡；公平的秤錘，伊所意愛。

2有驕傲就有見笑；有謙卑就有智慧。

3正直的人有誠實啲引導；詭詰的人因為奸詐致到毀滅。

4上主大受氣的日，錢財無路用，只有公義會救人脫離死亡。

5無通指責的義人，伊的路直，好行；歹人會因為家己的邪惡跋倒失敗。

6正直的人會互家己的義救著；奸詐的人會陷落家己的歹所設的羅網。

7歹人一下死，伊的向望就無去，伊所期待的嘛會消失。

8義人會當脫離患難；歹人反轉陷落彼內面。

9眼中無上帝的人講話害厝邊；義人因為智識得著解救。

10義人順利亨通，通城歡喜；歹人滅亡，人攏大聲慶祝。

11城因為正直人的祝福興起，因為歹人的話倒壞。

12藐視厝邊的人無常識；明理的人靜靜無出聲。

13四界講人是非的，會漏洩人的祕密；誠實可靠的人囥密代誌。

14無好的領導，國家就衰敗；顧問多，人民就安穩。

15給生份人保證會受大剋虧；拒絕給人擔保就安全。

16賢慧的婦仁人受人敬重；敗德的婦仁人自取恥辱。貧憚的查甫人會散赤；堅強的查甫人會好額。

17仁慈的人家己得著利益；殘忍的人家己受傷害。

18歹人得著的工錢是空空；撒義的種籽得著的報賞才是實在。

19堅持公義，得著性命；繼續做歹，致到死亡。

20歪曲是非的心，上主厭惡；行為正直，伊所意愛。

21歹人一定受刑罰；義人的後代會得著解救。

22婦仁人媠若無明理，親像金環掛佇豬的鼻。

23義人所意愛的，最後攏是好；歹人追求的，惹上帝受氣。

24人愈施捨就愈好額；人愈凍霜就愈散赤。

25愛施捨的，愈豐盛；幫贊人的，得著幫贊。

26囤積五穀毋賣，會受咒詛；歡喜賣出，會受祝福。

27出力做好，會得著恩惠；追求邪惡，會抵著災禍。

28倚靠家己的錢財，會跋倒失敗；義人會興旺親像青翠的樹葉。

29惹起家庭紛爭的人，什麼攏得𣍐著；戇人會做聰明人的奴僕。

30義人結的果子是性命；強暴的人殘害性命。

31義人佇世間得著報賞；有罪的歹人一定受報應。

← Chapter 10 Jump to: Chapter 12 →