Proverbs 13

Chinese TTVH 2021 (現代台語譯本漢字版)

← Chapter 12 Jump to: Chapter 14 →

1智慧的子聽趁老父的教導；自高自大的人毋聽責備。

2人講好話有好的成果；奸詐的人圖謀強暴。

3約束嘴舌，保全性命；隨便開嘴，致到毀滅。

4貧憚的人心欣慕，嘛得𣍐著；拍拼的人會心滿意足。

5義人厭惡白賊話；歹人失體面，留臭名。

6公義保護正直的人；邪惡敗壞有罪的人。

7有人裝做好額，其實無半項；有人裝做散赤，其實有真多財物。

8好額人用錢贖命；散赤人毋驚人威脅。

9義人的光會明亮；歹人的燈會熄去。

10驕傲一定起相爭；聽人苦勸有智慧。

11毋是拍拼得著的錢會愈減少；流汗積聚的錢會愈加添。

12所向望的久無實現，心就痛苦失志；所意愛的一下實現，性命就充滿活力。

13藐視教示，自取滅亡；尊重誡命，得著報賞。

14聰明人的教示是活命的水泉，互人免陷落死亡的羅網。

15明理的人會受尊重，受接納；奸詐的人的路嵁硈歹行。

16通達的人用智慧做代誌；戇人顯露家己的愚戇。

17歹的使者互人陷落災禍；忠信的差使互人得著醫治救助。

18拒絕教督，會致到散赤見笑；願意受責備，會受敬重。

19所意愛的實現，心就歡喜；離開歹代，戇人毋願。

20及智慧的人同行就有智慧；及戇人作伴會受傷害。

21災禍會追趇罪人；繁榮是義人的報賞。

22好人留產業互子孫；罪人積聚的財富最後歸義人。

23散赤人的田園生產真多米糧，毋拘因為無公義煞攏受搶奪。

24毋甘責罰子兒是無疼𪜶；若疼𪜶，就著照時責督。

25義人會當食甲心滿意足；歹人的腹肚不時枵枵。

← Chapter 12 Jump to: Chapter 14 →