Proverbs 14

Chinese TTVH 2021 (現代台語譯本漢字版)

← Chapter 13 Jump to: Chapter 15 →

1智慧的婦仁人建立家己的家庭；愚戇的婦仁人親手拆毀。

2做事正直的人敬畏上主；做代誌歪斜的人藐視伊。

3戇人講話家己受責罰；智慧的人的話保護家己。

4無牛耕作就無五穀；牛有力土產就愈多。

5誠實的證人𣍐講白賊；虛假的證人滿嘴胡說。

6自高自大的人尋智慧，尋𣍐著；聰明的人真緊得著智識。

7著離開戇人，因為對伊講的話尋𣍐著智識。

8通達的人的智慧互伊了解著行的路；戇人的戇致到行迷路。

9戇人看犯罪做滾笑；正直的人分享上帝的恩惠。

10人的艱苦，只有家己的心知；伊的歡喜，外人𣍐當分享。

11歹人的厝會倒壞；正直人的布棚會興旺。

12有一條路看起來正閣直，到尾迵到死亡。

13人啲笑的時心猶有憂悶；快樂的結局會變做悲傷。

14歹人一定受報應；好人一定得報賞。

15戇直的人逐項攏信；通達的人步步謹慎。

16智慧的人事事謹慎，遠離歹代；戇人驕傲放肆。

17快受氣的人做代誌愚戇；詭詐的人互人怨恨。

18戇直的人承接愚戇做產業；通達的人得著智識做花冠。

19歹人仆落佇好人的面前；罪人仆落佇義人的門口。

20散赤人連厝邊都厭賤；好額人朋友真多。

21看輕厝邊的人有罪；憐憫散赤的人有福氣。

22計謀歹代會行入迷路；計謀好事會得著人的真誠憐憫。

23逐款的拍拼攏有利益；空談會致到散赤。

24智慧的人的財富是𪜶的花冠；戇人的戇到尾嘛是戇。

25講實話作證救人的性命；作偽證是用詭詐害人。

26敬畏上主有堅固的倚靠；伊的子兒有逃閃的所在。

27敬畏上主是活命的水泉，互人免陷落死亡的羅網。

28百姓多，國王有榮光；人民少，人君就衰敗。

29𣍐快受氣是大聰明；無耐心的顯出愚戇。

30心平靜互身體健康；怨妒互骨頭朽爛。

31壓迫散赤人是褻瀆創造𪜶的主；好款待無錢人是尊敬主。

32歹人會因為所做的歹滅亡；義人到死猶有倚靠。

33智慧愛𫢶佇聰明人的心內；戇人的心內尋無智慧。

34公義互國家強盛；罪惡互人民受凌辱。

35王意愛用智慧辦代誌的官員，責罰失職的人臣。

← Chapter 13 Jump to: Chapter 15 →