Proverbs 12

Chinese TTVH 2021 (現代台語譯本漢字版)

← Chapter 11 Jump to: Chapter 13 →

1意愛智識的人歡喜接受管教；戇人厭惡責備。

2好人會得著上主施恩；詭計多端的人會受上主定罪。

3人𣍐當對做歹得著安全；義人的根基永遠𣍐動搖。

4才德的婦仁人是丈夫的花冠；毋知見笑的婦仁人親像丈夫骨內的毒瘤。

5義人的意念四正；歹人的計謀詭詐。

6歹人的言論當等欲刣人；正直人的嘴會救人。

7歹人會受捙倒消失；義人的家會堅固。

8人因為智慧受謳咾；心歪曲是非會受藐視。

9卑賤的人賺有食，較贏膨風自大的人無物通食。

10義人關心伊的牲生的性命；歹人連對人同情都殘忍。

11種作的人有夠額的米糧；追求空空無價值的事是無智識。

12歹人貪愛邪惡的人搶來的財物；義人的根會結果子。

13邪惡的人因為嘴唇的過失跋落家己的羅網；義人會脫離患難。

14人對嘴所結的果子得著滿滿的福氣；逐個人照伊的所做受報應。

15戇人看家己的路做著；聰明的人聽人苦勸。

16戇人真快顯出受氣；明理的人忍受侮辱。

17講實話作證彰顯公義；濫糝作證顯出詭詰。

18講話無謹慎親像用刀鑿人；智慧的人的舌醫治人。

19誠實的嘴永遠可靠；白賊的舌只有擋一時仔久。

20圖謀歹代的人心存詭詐；勸人和好的人會快樂。

21義人𣍐抵著災害；歹人會抵著真多災禍。

22白賊的嘴唇，上主厭惡；做代誌誠實，伊所歡喜。

23明理的人囥密智識；戇人的心顯露愚戇。

24殷勤的手有力掌權；貧憚的人給人做苦工。

25心有掛慮，互人餒志；一句好話，互人歡喜。

26義人導厝邊行正路；歹人導人行迷路。

27貧憚的人有肉嘛無欲烘；拍拼的人會得著寶貴的財物。

28正直的路互人得著性命；邪惡的路迵到死亡。

← Chapter 11 Jump to: Chapter 13 →